1 कुरिन्थियो 11 - Halbi

मुण्ड ढाकतोर सम्बंध ने सला

¹ तुमी मोचो असन चाल चला जसन मय मसीह चो असन चाल चलु आंय।

² हे भाईमन, मय तुमके सहरायें से कि सपाय गोठमन ने तुमी मोके सुरता करू आहास; आउर जोन रीति रिवाज मय तुमके सोपले से, हुनचो पालन करू आस।

³ मान्तर मय चाहायें से कि तुमी ऐ जाना कि हरकोनी चो मुंडी मसीह आय, आउर बायले लेकी चो मुंडी मनुक आय, आउर मसीह चो मुंडी माहापुरू आय।

⁴ जोन माने मुंडी ढाकुन पारथना नाहले अगम गोठ करू आय, हुन आपलो मुंडी चो बेईजित करू आय।

⁵ मान्तर जोन बायले लेकी उगाढ़लो मुंडी पारथना नाहले अगम गोठ करू आय, हुन आपलो मुंडी चो बेईजित करू आय, कसनबल्लोने हुन मुंडी होतोर बराबर आय।

⁶ अगर बायले लेकी ओढ़नी नी ओढ़े तेबे केश बले कटाओ, अगर बायले लेकी चो काजे केश कटातोर नाहले मुण्ड खुरातोर लाज चो गोठ आय, तो ओढ़नी ओढ़ो।

⁷ हव, मनुक के आपलो मुण्ड ढाकतोर ठीक नुआय, कसनबल्लोने हुन माहापुरू चो रूपरंग आउर महिमा आय; मान्तर बायले लेकी मनुक चो महिमा आय।

⁸ कसनबल्लोने मनुक बायले लेकी ले नी होलो, मान्तर बायले लेकी मनुक ले होली से,

⁹ आउर मनुक बायले लेकी चो काजे नी बनालोर आसे, मान्तर बायले लेकी मनुक चो काजे बनालोर आसे।?

¹⁰ ऐईकाजे सरग दूतमन चो लागुन बायले लेकी के ठीक आय कि अधिकार आपलो मुण्ड थाने संगाओ।

¹¹ तेबले बले परबु ने ना तो बायले लेकी बिना मनुक, आउर ना मनुक बिना बायले लेकी चो आत।

¹² कसनबल्लोने जसन बायले लेकी मनुक ले आसे, असने ची मनुक बायले लेकी चो बाटले आसे; मान्तर सपाय तीजमन माहापुरू ले आय।

¹³ तुमी खुद ची बिचार करा, काय बायले लेकी के उगाढ़लो मुंडी माहापुरू ले पारथना करतोर सुन्दर देऊ आय?

¹⁴ काय स्वभाविक रीति ले तुमी नी जानास कि अगर मनुक डेंग केश संगा ओ, तो हुनचो काजे बेईजित आय।

¹⁵ मान्तर अगर बायले लेकी लाम केश संगा ओ तो हुनचो काजे सुन्दर आय, कसनबल्लोने केश हुनके ओढ़नी चो काजे दिया गेली से।

¹⁶ मान्तर अगर कोनी झगड़ा करूक चाह ले, तेबे ऐ जानो कि ना आमचो आउर ना माहापुरू चो कलीसियामन चो असन रीति आय।

परबु भोज चो बारे ने

¹⁷ मान्तर ऐ गिआन देते-देते मय तुमके नी सहरायें, ऐईकाजे कि तुमचो रूंड़ा होलो ले नुकु नुआय, मान्तर हानि होऊ आय।

¹⁸ कसनबल्लोने पयले तो मय ऐ सुनु आंय, कि जिदलदाय तुमी कलीसिया ने रूंडा होऊ आस तेबे तुमनमन ने फुट होऊ आय, आउर मय ऐ थाने खिन्डिक-खिन्डिक बिश्वास बले करूं आंय।

¹⁹ कसनबल्लोने दल बन्दी बले तुमनमन ने जरूर होयेदे, ऐईकाजे कि जोन लोग तुमनमन ने खर आसोत हुनमन परकट होऊन जादे।

²⁰ आउर तुमी जोन गोटक जगा ने रूंड़ा होऊ आस तो ऐ परबु भोज खातो काजे नुआय,

²¹ कसनबल्लोने खातोर समया गोटक दुसर ले पयले आपलो भोज खाऊ आय, ऐ परकार कोनी तो भुके रऊ आय आउर कोनी मतवार होऊन जाऊ आय।

²² काय खातो-पिवतो काजे तुमचो घर निआय? नाहले माहापुरू चो कलीसिया के तुच्छ जानु आस? आउर जेचो लगे निआय हुनके लाजे करू आस? मय तुमचो ले बोलु आंय? काय ऐ गोठ ने तुमचो बड़ाई करूं आंय? नाई, मय बड़ाई नी करे।

²³ कसनबल्लोने ऐ गोठ मोके परबु ले अमरली, आउर मय तुमके बले अमराऊन दिले कि परबु ईशु जोन राती हुन धराया गेलो, रोटी धरलो,

²⁴ आउर धन्यबाद करून हुनके टुटालो आउर बल्लो, “ऐ मोचो देंह आय, जोन तुमचो काजे आय: मोचो सुरता काजे ऐई करा।”

²⁵ ऐई रीति ले हुन बिआरी चो पाटकुती बटका बले धरलो आउर बल्लो, “ऐ बटका मोचो लऊ ने नवा बायदा आय: जेबे केबीई पिआ, तेबे मोचो सुरता काजे ऐई करा।”

²⁶ कसनबल्लोने जेबे केबीई तुमी ऐ रोटी खाऊ आस आउर ऐ बटका थानले पीऊ आस, तेबे परबु चो मरना के जिदलदाय ले हुन नी ऐये परचार करू आस।

²⁷ ऐईकाजे जोन कोनी गलत रीति ले परबु चो रोटी खाओ नाहले हुनचो बटका थानले पिओ, हुन परबु चो देंह आउर लऊ चो अपराधी ठेबे दे।

²⁸ ऐईकाजे मनुक आपन खुद के जाचो आउर ऐई रीति ले ऐ रोटी थानले खाओ, आउर ऐ बटका थानले पिओ।

²⁹ कसनबल्लोने जोन खातो-पीतो समया परबु चो देंह के नी चिताये, हुन ऐ खातो आउर पीतो ने आपलो उपरे डण्ड आनु आय।

³⁰ ऐ लागुन तुमनमन ने खुबे असन कमजोर आउर रोगी आसोत, आउर खुबे असन मरून बले गेला।

³¹ अगर आमी आपन खुद के जाचतु तो डण्ड नी पावतु।

³² मान्तर परबु आमके डण्ड देउन आमचो ताड़ना करू आय, ऐईकाजे कि आमी संवसार चो संगे दोषी नी ठेबु।

³³ ऐईकाजे, हे मोचो भाईमन, जिदलदाय तुमी खातो काजे रूंड़ा होऊ आस तेबे गोटक दुसर चो काजे ठेबा।

³⁴ अगर कोनी भुके होओ तो आपलो घर ने खाओ, जेचो ले तुमचो रूंड़ा होतोर डण्ड चो कारन नी होओ। बाकी गोठ के मय ऐऊन भाती अच्छा करेंदे।