1 कुरिन्थियो 10 - Halbi

इस्राएल चो इतिहास ले जनातोर

¹ हे भाईमन, मय नी चाहायें कि तुमी ऐ गोठ ले अनजान राआ कि आमचो सपाय बुआ दादीमन बादरी चो खाले रवत, आउर सपाय चो सपाय समुन्द चो मंजी ले पार होऊन गेला;

² आउर सपाय बादरी ने आउर समुन्द ने, मूसा चो डूबन धरला;

³ आउर सपाय गोटक ची आत्मिक भोजन करला;

⁴ आउर सपाय गोटक ची आत्मिक पानी पिवला, कसनबल्लोने हुनमन हुन आत्मिक पकना ले पिवते रवत जोन हुनमन चो संगे-संगे जाते रली, आउर हुन पकना मसीह रये।

⁵ मान्तर माहापुरू हुनमन थानले खुबेमन ले हरिक नी होलो, ऐईकाजे हुनमन रान ने कुड़ाय होला।

⁶ ऐ गोठमन आमचो काजे कहनी ठेबली, कि जसन हुनमन लालच करला, असने ची आमी खराप तीजमन चो लालच नी करू;

⁷ आउर ना तुमी मुरती पुजा करू बना, जसन कि हुनमन थानले कितरो बनुन जाऊ रवत, जसन लिकलोर आसे, “लोग खाऊक-पिऊक बसला, आउर खेलुक-कुदुक उठला।”

⁸ आउर ना आमी बेबीचार करू, जसन हुनमन ले कितलोमन करला; आउर गोटक दिन ने तेब्बीस हजार मरून गेला।

⁹ आउर ना आमी परबु के परकु, जसन हुनमन थानले कितलोमन करला, आउर सांपमन चो बाटले नष्ट करा गेला।

¹⁰ आउर ना तुमी कुड़ कुड़ावा, जोन रीति ले हुनमन थानले कितलोमन कुड़ कुड़ाला आउर नष्ट करतो बिता चो बाटले नष्ट करा गेला।

¹¹ मान्तर ऐ सपाय गोठमन, जोन हुनमन उपरे पढ़ली, कहनी चो रीति थाने रली; आउर हुनमन आमचो चेता तो काजे जोन जगत चो आखरी समया ने रऊ आत लिका गेली से।

¹² ऐईकाजे जोन समजु आय, “मय थीर आंसे,” हुन चलाक रओ कि काहांय घसरुन नी पड़ो।

¹³ तुमी कोनी असन परीक्षा ने नी पढ़लास, जोन माने चो सहन ले बाहार आय। माहापुरू बिश्वास लायक आय आउर हुन तुमके सामरत ले बाहरे परीक्षा ने नी पडुक देयेदे, मान्तर परीक्षा चो संगे निकास बले करेदे कि तुमी सऊक सका।

मुरती पुजा नी करा

¹⁴ ऐ लागुन, ऐ मोचो लाड़रामन, मुरती पुजा ले बचु राआ।

¹⁵ मय अकल बिता जानुन भाती, तुमचो ले बलेंसें: जोन मय बलेंसें, हुनके तुमी परका।

¹⁶ हुन धन्यबाद चो बटका, जेचो उपरे आमी धन्यबाद करूं से; काय मसीह चो लऊ चो सामिलता नुआवं? हुन रोटी जेके आमी टुटाऊ से, काय हुन मसीह चो देंह चो शामिल नुआय?

¹⁷ ऐईकाजे कि गोटक ची रोटी आंव तेबे आमी बले जोन खुबे आंसु, गोटक देंह आंव कसनबल्लोने आमी सपाय हुनी गोटक रोटी ने शामिल होऊ आंव।

¹⁸ जोन देंह हिसाब ले इस्राएली आत, हुनमन के दका: काय बलिदानमन चो खातो बितामन बेदी चो शामिल नुआत?

¹⁹ फेर मय काय बलेंसें? काय ऐ कि मुरती थाने चेगालो बिती बलिदान काई आय, नाहले मुरती काई आय?

²⁰ नाई, मान्तर ऐ कि दुसर जाति जोन पुजु आत; हुनमन माहापुरू चो काजे नुआय मान्तर दुष्टआत्मामन चो काजे बलिदान करू आत आउर मय नी चाहायें कि तुमी दुष्टआत्मामन चो शामिल हुआ।

²¹ तुमी परबु चो बटकामन आउर दुष्टआत्मामन चो बटकामन दुनो थानले नी पीऊक सकास। तुमी परबु चो मेज आउर दुष्टआत्मामन चो मेज दुनो चो शामिल नी होऊक सकास।

²² काय आमी परबु के रीस दिआऊ से? काय आमी हुनचो ले शक्ति बिता आंव?

मसीही छुटछाड़ा

²³ सपाय तीजमन मोचो काजे नगत तो आय, मान्तर सपाय लाब चो नुआय। सपाय तीज मोचो काजे अच्छा तो आय, मान्तर सपाय तीजमन ले उन्नती निआय।

²⁴ कोनी आपन चो नुकु के नाई, मान्तर दुसरमन चो नुकु के डगरा ओ।

²⁵ जोन काई कसाईमन थाने बिकरी होऊ आय, हुन खाआ आउर बिबक चो लागुन काई नी पचारा?

²⁶ “कसनबल्लोने धरतनी आउर हुनचो भरपूरी परबु चो आय।”

²⁷ आउर बिश्वासिमन थानले कोनी तुमके नेवता देओ, आउर तुमी जाऊक चाहा, तेबे जोन काई तुमचो पुरे संगाया जाओ हुनी खाआ; आउर बिबक चो लागुन काई नी पचारा।

²⁸ मान्तर अगर कोनी तुमचो ले बलोत, “ऐ तो मुरती चो पुजा करलो बिती तीज आय,” तेबे हुन सांगलो बिता चो लागुन आउर बिबक चो लागुन नी खाआ।

²⁹ मोचो मतलब तुचो बिबक नुआय, मान्तर हुन दुसर चो। नुकु, मोचो छुटछाड़ा दुसर चो बिचार ले केंव परका जाए?

³⁰ अगर मय धन्यबाद करून शामिल होयें से, तो जोन थाने मय धन्यबाद करें से हुनचो लागुन मोचो दोषी केंव होये से?

³¹ ऐईकाजे तुमी भले खाआ, भले पिआ, भला जोन काई करा, सपाय काई माहापुरू चो महिमा चो काजे करा।

³² तुमी ना यहूदीमन, ना यूनानीमन, आउर ना माहापुरू चो कलीसिया चो काजे ठोकर चो कारन बना।

³³ जसन मय बले सपाय गोठमन ने सपाय के हरिक संगाऊ आय, आउर आपलो नाई मान्तर खुबेमन चो लाब डगराऊ आंय कि हुनमन मुक्ति पाओत।