1 कुरिन्थियो 1 - Halbi

जुहार

¹ पौलुस चो बाटले जोन माहापुरू चो इच्छा ले ईशु मसीह चो पठालोबिता होतो काजे हाग दिया गेलो आउर भाई सोस्थिनेस चो बाटले,

² माहापुरू चो हुन कलीसिया चो नाव जोन कुरिन्थुस ने आसे, बल्लोने हुनमन चो नाव जोन मसीह ईशु ने पवितर कराया गेला, आउर पवितर होतो काजे हाग दिया गेला सोत; आउर हुन सपाय चो नाव बले जोन हर जगा आमचो आउर आपलो परबु ईशु मसीह चो नाव ले पारथना करू आत।

³ आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ।

पौलुस चो माहापुरू के धन्यबाद

⁴ मय तुमचो बारे ने आपलो माहापुरू चो धन्यबाद सदा करूं आंय, ऐईकाजे कि माहापुरू चो ऐ अनुग्रह तुमचो उपरे मसीह ईशु ने होली,

⁵ कि हुन थाने होऊन भाती तुमी हर गोठ ने, बल्लोने पुईतराय बचन आउर पुईतराय गिआन ने सवकार कराय गेलास

⁶ कि मसीह चो गोहई तुमचो थाने पक्की निकरली

⁷ ऐथा ले कि कोनी बर ने तुमके घाटा निआय, आउर तुमी आमचो परबु ईशु मसीह चो परकट होतोर बाट टाकते रऊ आहास।

⁸ हुन तुमके आखरी तक जमखम बले करें दें कि तुमी आमचो परबु ईशु मसीह चो दिन ने बेकसूर ठेबा।

⁹ माहापुरू बिश्वास लायक आय, जोन तुमके आपलो बेटा आमचो परबु ईशु मसीह चो संगती ने हाग दिलो से।

कुरिन्थुस चो कलीसिया ने बटवारा

¹⁰ हे भाईमन, मय तुमचो ले आमचो परबु ईशु मसीह चो नाव ले बिनती करें से कि तुमी सपाय गोटक ची गोठ बोला, आउर तुमचो ने फूट नी होओ, मान्तर गोटक ची मन आउर गोटक ची मति होऊन भाती मिलुन राआ।

¹¹ कसनबल्लोने हे मोचो भाईमन, बहिन खलोए चो घरमन चो लोगमन मोके तुमचो बारे ने सांगला से कि तुमचो ने झगड़ा होये से।

¹² मोचो बोलतोर अरत ऐ आय कि तुमनमन ले कोनी तो आपन खुद के “पौलुस चो,” कोनी “अपुल्लोस चो,” कोनी “कयफा चो,” तो कोनी “मसीह चो” बोलु आय।

¹³ काय मसीह बाटा गेलो? काय पौलुस तुमचो काजे कुरूस थाने चेगाया गेलो? नाहले तुमके पौलुस चो नाव थाने डूबन मिरली?

¹⁴ मय माहापुरू चो धन्यबाद करें से कि क्रिसपुस आउर गयुस के छांडुन मय तुमनमन ले कोकीई बले डूबन नी दिले।

¹⁵ काहांय असन नी होओ कि कोनी बोलो कि तुमके मोचो नाव थाने डूबन मिरली।

¹⁶ आउर हव, मय स्तिफनास चो घरलोगमन के बले डूबन दिले; ऐ मन के छांडुन मय नी जाने कि मय आउर काकीई डूबन दिले।

¹⁷ कसनबल्लोने मसीह मोके डूबन देतो काजे नाई, मान्तर नगतखबर सुनातो काजे पठालो से, आउर ऐ बले शब्दमन चो गिआन चो अनुसार नाई, असन नी होओ कि मसीह चो कुरूस फकाहा ठेबो।

मसीह चो शक्ति आउर माहापुरू चो गिआन

¹⁸ कसनबल्लोने कुरूस चो कथा नाश होतो बितामन काजे मुरूकता आय, मान्तर आमी मुक्ति पावतो बितामन काजे माहापुरू चो सामरत आय।

¹⁹ कसनबल्लोने लिकलोर आसे, “मय गिआन बितामन चो गिआन के नष्ट करें दें, आउर समजदारमन चो समज के तुच्छ करून देयें दें।”

²⁰ काहां रलो गिआन बिता? काहां रलो शास्तरी? काहां रलो ऐ संवसार चो झगड़ाहा? काय माहापुरू संवसार चो गिआन के मुरूकता नी ठेबालो?

²¹ कसनबल्लोने जिदलदाय माहापुरू चो गिआन चो अनुसार संवसार गिआन ले माहापुरू के नी जानलो, तेबे माहापुरू के ऐ अच्छा लागली कि ऐ परचार चो मुरूकता चो दुवारा बिश्वास करतो बितामन के मुक्ति देओ।

²² यहूदी तो चिना चाहाऊं आत, आउर यूनानी गिआन चो खोज ने आसोत,

²³ मान्तर आमी तो हुन कुरूस थाने चेगलो बिता मसीह चो परचार करू आंव, जोन यहूदीमन चो काजे ठोकरना चो कारन आउर दुसर जातिमन चो काजे मुरूकता आय;

²⁴ मान्तर जोन हाग दीलोर आसोत, काय यहूदी काय यूनानी, हुनमन चो लगे मसीह माहापुरू चो सामरत आउर माहापुरू चो गिआन आसे।

²⁵ कसनबल्लोने माहापुरू चो मुरूकता मानेमन चो गिआन ले गिआन बिता आय, आउर माहापुरू चो कमजोरी मानेमन चो बल ले खुबे बलवान आय।

मात्र परबु ने घमण्ड

²⁶ हे भाईमन, आपलो हाग दिलोर के तो बिचारा कि ना देंह चो अनुसार खुबे गिआन बिता, आउर ना खुबे सामरती, आउर ना खुबे सवकार हाग दिया गेला।

²⁷ मान्तर माहापुरू जगत चो मुरूकमन के चुनलो से कि गिआन बितामन के लाज करो, आउर माहापुरू जगत चो कमजोरमन के चुनलो से कि बलवानमन के लाज करो;

²⁸ आउर माहापुरू जगत चो नीचमन आउर तुच्छमन के, मान्तर जोन आत बले नाई हुनमन के बले चुनलो कि हुनमन के जोन आसे, फकाहा ठेबा ओ।

²⁹ बल्ले कोनी जीव माहापुरू चो पुरे घमण्ड नी करूक पाओ।

³⁰ मान्तर हुनचेई बाटले तुमी मसीह ईशु ने आसास, जोन माहापुरू चो बाटले आमचो काजे गिआन थेबलो, बल्लोने धरम, आउर पवितरता, आउर छुटकारा;

³¹ बल्ले जसन लिकलोर आसे, असने ची होओ, “जोन घमण्ड करे दे हुन परबु ने घमण्ड करो।”