እብራውያን 1 - Halaba New Testament

መገኑ ቤትስ አዲን ጠወዕዮገ

¹ ብሬ ዘማኔን መገኑ ልግብ አደደ እኮ ዎቃን አበናኖተኔ ነብያኖ አዲን ልግብ ወክት ጠወዕዮ እቅ።

² እኮጎሬ ከን መጨረሽ ዘማኔን ጉዕመንከ ረገአኖሃ አዕዮስ ቤትስ አዲን ኔሳሃ ጠወዕዮኔ። ህትን ጉዕመንከ ከለቆሁ እስ አዲንት።

³ ቤቱስ መገን ኬዕምኝ ለሊሰኖሃን፤ እስን ዊመ ዊሚን መገኑ አጉደኖሃን፤ ወልቀት ዮ ላጋንከስ ጉዕመንከ ድክሽ አፎኡ፤ ህትን መነ ጩቢች ነጠ አዕዮች ኤተሮን ሎረ መገን መኬ አዲን ሰማን አፉዕልዮኡ።

ኢስ መላይካች ሎረ እሁስ

⁴ መገን ቤቱ መላይከ ሱዕሚች ሎሩ ሱዕሙ ኣሰሞስ ሃሊን እሳች በትሽ በተዕዮሃ እኮ።

⁵ መሰንትስ መገኑ መላይካችስ መቲሀሲ «አት ቤቱሃኤ፤ አን አናክ» ህከረንገ «አን አነ እሃንስ፤ እሲሁ ቤቱእ እሀኖ» ዬኢሁ አዬህት?

⁶ ህትን ሀንገፈ ቤቱስ ኣዱንያ አል ኤቦ ወክት «መገን መላይከት ጉዕሙንኩ እሲሃ ሰገዶስተ» ሀስሰኖ።

⁷ እኮጎሬ መላይከተኔሃ ጠወአን «መላይከስ ቦብረ፥ ካዲመተ ጊረ ለበነተ አአኖ» የኖ።

⁸ ጠው እኮጎሬ ቤትስተኔሃ፤ «መገኖ! ዳኞመክ ቦርጭመት ዘላለሚሃ ሄኣአ። ዎምነቶንከክ ጡመገ አት ገሽታንት፤

⁹ አት ፈዩተ ኢትት ሂለ ጠወ ግቦንት፤ ህከን መሳን መገኑ መጠሮሄ፤ ሙንዲኑተ ኣሰኖ ዘይተ ቡር ጃላችክ በትሽ ኢቴሄ» የኖ።

¹⁰ ቴሁ ቤትስተኔሃ ህት የኖ፤ «ቀርቾ! አት ሄጭት ኡለተ ከለቆንት፤ ሰሞንኩ አንገክተ ሆጉ።

¹¹ እሰ ጉዕሙንኩሰ በኣአ፤ እኮጎሬ አት ሄኣንት፤ እሰ ጉዕሙንኩሰ ኦድኖገ ኑባጵታአ።

¹² ቡሉኮገን ጣጣንትሰ፤ እሰ ኦድኖገን ዶረንታአ። 2 አት ጉዕመ ወክትንከ አቴት፤ ዘማኑክ ሆሮ ጎፈኖበአ» የኖ።

¹³ ጠው እኮጎሬ መገኑ መላይከ በሊች፤ «ባለጋረክ ሎካችክ ዎሮን አኦተ ኢለ መኬእ አዲን አፉዕል» ዬኢሁ አዬት?

¹⁴ ህከረ መላይከት ጉዕሙንኩ ጡሙ ደእታ መነ ካደንቶተ ሶሀንቶ አያናከተበእንዶ?