Revelesin 8 - U Bulunagana U Niga

A hatohitina a kaan harokotokap

¹ Tara pöata te lukapeia a Tunan Sipsip a hatohitina a kaan harokotokap, a ka e kakamoto koruia i Kolö, e antunaia tara hap aua.

² Ba lia e taregu a tohit a angelo te roron tuol ria i matana e Sunahan. Nori i hala rai a tohit a tuhil.

³ A tana angelo te ka mei a kaan hohongo turu insens a goul emi tuol ia i rehina makumun haats. Nonei i hale ii u insens u para tegi hala gono menaien u singo turu katuun hoboto tere Sunahan. Ba nonei e haatse nen tara makumun haats a goul te kana i mam turu gumgum u göagono.

⁴ Ba u ruhu turu insens e la sei gono mena u singo turu katuun tere Sunahan i limana a angelo.

⁵ Ba angelo e lueiena a kaan hohongo turu insens me hongeneien u tulana tara makumun haats me lapo nena men tara han i puta. Ba u gururu na u kanaha na nun e butuna, na man palaina manka e olongo has.

A tohit a tuhil

⁶ A tohit a angelo ti kamei a tohit a tuhil i katsin pihu hamanasa talei a man tuhil ti ka meien.

⁷ Ba angelo tutuun e pihena a tuhil i tanen. Ba aisina tara langits na u tula ti sohale ii u rahatsing e lapo naria i puta. Ba hatopisana pala turu tsiktsiki na turu ruei e atsir. Ba u garas u pelpeli e ats hoboto hasir.

⁸ A hahuoluna a angelo e pihu a tuhil i tanen. Ba töa ka te here ii u pokus pan te kulupu e lapo naria i tasi.

⁹ Ba hatopisana pala turu tasi e palis uana turu rahatsing, ba hatopisana pala tara manka man töatöa i tasi e mater, na hatopisana pala turu tolaala i tasi e kato homi raier.

¹⁰ Ba hatopisana angelo e pihena a tuhil i tanen. Ba töa pitopito pan te kulupu hapan here ii u bito e rus nama i kolö me rus uana tara hatopisana pala turu ramun olo na tara man ramun te bututuna.

¹¹ A solona pitopito teka e Mal. Ba hatopisana pala tara ramun e butun malina, ba katuun a parpara e mater tara pöata ti ueien u ramun teka. Taraha? I kato hamal korui.

¹² Ba hatohatsina angelo e pihena a tuhil i tanen. Ba hatopisana pala tara pitala na tara tsihou na turu pitopito e kato hakuhil raier, ba u ualesala i taren e momona. Ba hatopisana pala tara lan ema alesala nei, ne möa has tu ualesala tara hatopisana pala tara bong.

¹³ Ba lia e taregu a töa manu te tapa uu iasa koru, ba lia e hengogu te ranga hapan uaien me poeiena, “Niomi, niomi, niomi. U niomi pan e butu noa turu katuun te ka ria i puta tara pöata te pihe roua a tana topisa angelo u tuhil i taren. Nori e katsin pihu hamanaseren.”