Revelesin 7 - U Bulunagana U Niga

U katuun tere Sunahan i antunaia turu 144,000

¹ I murina a ka teka alia u tari a tohats a angelo i tuol ia tara tohats a makum tara han i puta. Nori i pile kapiin a tohats a lomolomo tara han i puta, bate möana ta lomolomo tega bahu ia i tasi na ta töa ta makum i puta na tu töa tu ruei.

² Na lia u tarei a tana angelo e la seima tara pala te butu nama a pitala, na nonei e ka mei a kaan titi tara nitsunono tere Sunahan te töatöana. Ba nonei e ku hapan uana tara tohats a angelo ti halara ii a nitagala tegi kato homi menaien u tsiktsiki na u tasi.

³ Ba angelo teka e poeiena, “Alimiou goma kato homiemi u tsiktsiki tsi u tasi tsi a ruei e antunana te titi hakapa mera moi lö a poler u katunun kui tere Sunahan.”

^4-8 Na lia u hengoi u hihase turu katuun ti hatiin a hatöatongo tere Sunahan i poleren. U hihase i taren e antunaia turu 144,000 turu katuun tara maloto na huol a hun katunura i Israel. U hihase tara man töa man hun katuun ti hatiin a hatöatongo e antunana teka: tere Juda u 12,000 tere Ruben u 12,000 tere Gat u 12,000 tere Aser u 12,000 tere Naptali u 12,000 tere Manase u 12,000 tere Simion u 12,000 tere Livai u 12,000 tere Isaka u 12,000 tere Sebulun u 12,000 tere Josep u 12,000 tere Bentsamen u 12,000

U katuun hobotora tara mamana han

⁹ I murina a ka teka alia u tari a katuun a parpara koru, e möa ta katuun tega antunan ase sabe raien. Nori i lama tara mamana han hoboto tara man hun katuun, na turu mamana u mar ranga. Nori e tuol ria i matana u gumgum u göagono tere Sunahan na i matana a Tunan Sipsip. Nori i kamei a man hasobö a man hiaka bate pile ner a man kalan kikia i limaren.

¹⁰ Ba nori e ku hapanir me poeier: “A Sunahan i tarara te gumna turu gumgum u göagono na Tunan Sipsip te lu pouts merai ra tere Sunahan!”

^11-12 Ba u angelo hoboto e tuol hahiser u gumgum u göagono na u tsunono na tohats a ka a töatöa. Ba u angelo e hopöeria a peisaren i puta i matana u gumgum u göagono me hatsunoner e Sunahan me poeier: “U mana! A nisasaala na solo pan na niatei na nitsunono na nitagala, ena manka e Sunahan! A mamanaka e tatei haniga uaier i tanen bate hapane ren tara mamana pöata hoboto! U mana!”

¹³ Ba töa tara man tsunono e rangate noulia, “Eresi nori u katuun te ka mer u hasobö u hiaka na ime ti la men?”

¹⁴ Ba lia e poeiegu i tanen, “A tsi tsunono, alö te ateim.” Ba nonei e poeiena i tar, “Nori u katuun ti lama tara pöata tara kamits pan. Nori i galus hahiake mei u hasobö i taren u rahatsing tara Tunan Sipsip.

¹⁵ Tara markato teka te tuol sila rien i matana u gumgum u göagono tere Sunahan, nori e soloseieren tara mamana pöata, tara lan na bong, iahana Luman Lotu Pan i tanen. Ba nonei te ka gono meranen bate tara kap ranen.

¹⁶ Nori ema bes lel roi, na ema maka lel roi. A pitala na saha ka a hiski ema tatei ski ranoien romana.

¹⁷ Taraha? A Tunan Sipsip te taratara kap ranouen, nonei te kana i gusuna u gumgum u göagono tere Sunahan. Nonei e peigi mera noien tara man ramun te bututuna te hala nena a nitöatöa. Na e Sunahan e hasokolei nitöa ranouen.”