Revelesin 5 - U Bulunagana U Niga

A pits pepa na Tunan Sipsip

¹ Ba lia e Jon e tareiegu u lima u pal matou tere Sunahan e pilein a pits pepa te gum ien turu gumgum u göagono. Nonei a pits pepa teka i koloto hihapalein, na i harokoto kap nai u tohit u kaan harokotokap.

² Ba lia e taregu a töa a angelo a tagala koru e ranga hapan me poeiena, “Esi te ka mena a nitsunono te antunan lukapa nena u kaan harokotokap bate palatena a pits pepa teka?”

³ Kaba e möa ta töana i Kolö na tara han i puta na tara han turu mate tega antunan palati a pits pepa bate tarana iahanen.

⁴ Ba lia e tabe hapan megu e möa ta katuun tega ka mei a nitsunono tega palata menai a pits pepa teka bate röte nen.

⁵ Ba töa a tsunono e poeiena i tar, “Möa tu tabe. Tara! A katuun te ngöeri a Laion tara hun katuun tere Juda, a Hatutubunei tere Devit e tusaluhe hakapa. Nonei te antunan lukapa nena a tohit a kaan harokotokap bate palatena a pits pepa!”

⁶ Ba lia e taregu a töa Tunan Sipsip. Nonei e tuol ia i gusur a tohats a ka a töatöa na u tsunono i rehina u gumgum u göagono. A Tunan Sipsip e tara here ii atung hamati me töatöa poutsuna. Nonei e ka mei a tohit a kii na u tohit u mata te haharuein u tohit u namnamei tere Sunahan te hala menai e Sunahan tara mamana han hoboto i puta.

⁷ Ba nonei ena luena a pits pepa turu lima u pal matou tere Sunahan te gum ien turu gumgum u göagono.

⁸ Pöata te lu hakapeien a pits pepa, ba tohats a ka a töatöa na u huol u maloto na tohats a tsunono e hopöe ria a peisaren i puta i matana Tunan Sipsip. Nori i ka hoboto mei a man kaan köma te ngöeri a hap na man kap ti katoe ii a goul e saputi u insens. U insens e haharuei nena a man singosingo turu katuun tere Sunahan.

⁹ Ba nori e kömeier u töa u hets u tsimus te mar ranga uana teka tara Tunan Sipsip: “Alö e ka mem a nitsunono tego lu menai lö a pits pepa bate lukapem u kaan harokotokap i tanen. Taraha? Alö i atung hamati na u rahatsing i tamölö e sakahis merai u katuun tere Sunahan, u katuun i lama tara mamana hun katuun hoboto, Na turu mamana u mar ranga hobotona tara mamana han.

¹⁰ Na lö u kato has raien u pris tegi taguhi e Sunahan i tarara, na lö u kato has raien u tsunono, ba nori te tsunono roua i puta.”

^11-12 Ba lia e taregu, be hengoegu a rungur u angelo u parpara koru tema antunan ase rari, bate tuol hahiser u gumgum u göagono na tohats a ka a töatöa na u katuun u tsunono. Ba lia e hengoegu ti hets hapan uaien bate poeier, “E matsköna tego ka menai a Tunan Sipsip ti atung hamati a nitsunono na mamanaka a niga na u hakats u matskö na nitagala. E nigana te hapan mena roien a mamanaka bate soloseie ren bate haniga uaier i tanen!”

¹³ Ba lia e hengoegu a mamanaka i Kolö na i puta na i han turu mate na i tasi, a mamanaka hoboto i hets bate poeier, “E Sunahan te gumna turu gumgum u göagono na Tunan Sipsip e ka mena a nitsunono pan. A mamanaka hoboto egi haniga uu i taren bate hapan raren bate solosei raren!”

¹⁴ Ba tohats a ka a töatöa e hatanganar me poeier, “U mana!” Ba u tsunono e hopöeria a peisaren i puta me hatsunono raren.