Revelesin 22 - U Bulunagana U Niga

¹ Ba angelo e hatare nei lia a ramun olona tara nitöatöa. Nonei e kankanaha na e tara butu here ii u galas u niga na e oloma turu gumgum u göagono tere Sunahan na tara Tunan Sipsip.

² Nonei e olo silaia i gusuna kalana tara taun a tsimus i Jerusalem. Na a huol a harerehina a ramun e kaia a man rueina tara nitöatöa ti roron hua mei a maloto na huol a pöata turu töa u hiningal. Na man kalaren i kato haniga pouts rai a man hun katuun.

³ E möa nou tu hamal tara taun teka. U gumgum u göagono tere Sunahan na tara Tunan Sipsip e ka noua tara taun teka, na u katunun kui i tanen e hatsunone rouen.

⁴ Nori e tare riou a matanen, na solonen e ka noua i poleren.

⁵ E möa lel nou ta bong, na nori ema ngil lele roi tu lam na ta pitala. A Tsunono e Sunahan nonei u ualesala i taren. Ba nori te tsunono riou tara mamana pöata i murimuri.

E Iesu e la nama romana

⁶ Ba angelo e poeiena i tar, “U ranga teka e manana na egi hamani. Na Tsunono e Sunahan te hatakeiena u namnamei turu propet te haleiema a angelo i tanen gomi hatara meraien u katunun kui i tanen aha te sukusukun butuna.”

⁷ Be Iesu e poeiena, “Hengo! Ema lehana noi ba lia te la guma romana. U buku teka e hatei nena a manka te butu nou, na katuun te kukutena u raranga i tanen ega sasaala.”

⁸ Alia e Jon. Alia nonei tu hengo a manka teka na tu tareien. Pöata tu hengo hakapeien lia na tu tara hakapeien lia, ba lia e tuhopö nena i mouna a angelo te haröte ii lia a manka teka tego hatsunono uu lia i tanen.

⁹ Ba nonei e poeiena i tar, “Alö goma markato uai teka! Alia has a katunun kui tere Iesu, alia na lö na man hahatoulana i tamölö u propet, na pala hoboto te hengoeier u raranga turu buku teka. Ara hoboto u katunun kui tere Iesu. Alö go hatsunoni e Sunahan!”

¹⁰ Ba nonei e pei hasena i tar, “Alö goma hamouse ii u raranga turu buku teka te hatei nena a manka te butuna romana. Taraha? A pöata te butu hamana noien e sukusuku nama.

¹¹ Haka ban a katuun a omi ega kato homi noa has, na katuun te ka mena a markato a korkoriana ega kato hakorkoriana noa has. Na katuun a niga has ega kato haniga noa has iou, na katuun a matskö ega kato hamatskö noa has iou.”

¹² “Hengo! Ema lehana noi balia te la guma. Alia ena la meguma romana a man hamatana balia temi mar hala hapopo has goua turu katuun hoboto timar kato uamen i puta.

¹³ Alia a Hatania na Kapakapa na tu Mam na tu Hamurimurima. Alia te ka gou tara mamana pöata.”

¹⁴ U katuun te galuser u hasobö i taren egi sasaala. Nori te tatei tasu ria tara tamana tara taun na e tatei nou ria tara huana u rueina tara nitöatöa.

¹⁵ Ielesala tara taun te ka ria u mar katuun teka: u katuun u omi, na u matmatuna, na u tsiktsikolo na u lulu tson, na u hihipuli, na u katuun te hatsunoner u kesa, na u katuun hoboto te gamogamor na te kukutier u raranga u gamo.

¹⁶ Be Iesu e poeiena, “Alia u haleiema a angelo i tar i tamölö tegana hatei menaien a hun katuun i tar a mamanaka hoboto teka. Alia e tubuna e Devit, na lia e hatubuna has gia i tanen. Alia a Tounlan te alesala hapanina.”

¹⁷ U Namnamei tere Sunahan e poeiena, “Lama!” Na hun katuun tere Iesu te hereri a tahol te katsin hitöluna e poeier, “Lama!” Na esi te hengoena a ka teka ega pei hasi, “Lama!” La muma, u katuun hoboto te makar. Eresi te ngilin uar emi tatei ueier u ramununa tara nitöatöa te möa ta hihol.

A kapakapana u rangana turu buku

¹⁸ Alia e ranga hatagala gia turu katuun hoboto te hengoer u raranga turu buku teka te hatei nena a manka te butuna romana: te haponena romana ta katuun tu tana tu raranga turu raranga teka, be Sunahan te hala hase neien romana a man niomi te hatei nena u buku teka.

¹⁹ Na te luba nena romana ta katuun tu raranga turu buku teka, be Sunahan te luba has nena romana a tsi makum i tanen turu rueina tara nitöatöa na tara Taun a Göagono, te hatei nena u buku teka.

²⁰ E Iesu, te hatei nena te mana uana a manka teka, nonei e poeiena, “U mana koru, ema manasa noi ba lia te la guma romana!” U mana. Lama, o Iesu a Tsunono!

²¹ A Tsunono e Iesu e tatei taguhu rena u katuun hoboto i tanen. U mana.