Revelesin 16 - U Bulunagana U Niga

U kap raharaha tere Sunahan

¹ Ba lia e Jon e hengoegu u töa u raranga pan te butuma i Luman Lotu Pan, ba nonei e ranga uana tara tohit a angelo me poeiena, “Alimiou go na kis namia a tohit a kap raharaha tere Sunahan i puta!”

² Ba angelo tutuun e na kis nena a kap i tanen turu tsiktsiki. Ba man pi a man omi ti kamits koru e buturia i tuenreir u katuun ti ka mei a hatöatongo tara ka a omi a töatöa na ti hatsunoni u kesa i tanen.

³ Ba hahuoluna a angelo e kis nena a kap i tanen turu tasi. Ba u tasi e palisina me here nei u rahatsing tara katuun a mate, ba mamanaka hoboto ti kaia i tasi e mater.

⁴ Ba hatopisana a angelo e kis nena a kap i tanen turu ramun olo na tara man ramun te bututuna ba nori e palis has uaier turu rahatsing.

⁵ Ba lia e hengoegu a angelona tara man ramun bate poeiena: “O Sunahan, alö e göagonom, alö tu ka mam na lö te ka noa hasim i romana. Alö tu ona hamatsköön töama.

⁶ Taraha, nori u katuun u omi ti atung hamater u katuun i tamölö na u propet i tamölö bate kis ner u rahatsing i taren. Bate here tale nei alö e hala palis ramien u rahatsing tegi ueien. Nori e lueier u nihahuna e popona tara markato a omi i taren.”

⁷ Ba lia e hengoegu u töa u ranga te butuma tara makumun haats me poeiena: “O Tsunono, o Sunahan. Alö e tagala saluhem! A markato te hahuna mera mei lö u katuun e matsköna na e mana nitöana!”

⁸ Ba hatohatsina a angelo e kis nena a kap i tanen tara pitala, bu hiski pan e skiena a tuenreir u katuun.

⁹ U katuun e ski homir u hiski pan teka, ba nori e ranga homi koru ner e Sunahan te tsunonin a man niomi teka. Kaba nori ima palis bana ii a man markato a man omi i taren bate soloseier e Sunahan.

¹⁰ Ba hatolimana angelo e kis nena a kap i tanen turu gumgum u göagono tara ka a omi a töatöa. Bu kuhil e kopo kap nena a han i tanen, bu kamits pan e butuna, ti har koru mei u katuun.

¹¹ Ba nori e ranga homi koru ner e Sunahan i Kolö ti sagoho menaien a kamits pan na u pi u omi. Kaba nori ima palis bana ii a markato a omi i taren.

U tsunono i gonoia tara han i Amagedon

¹² Ba hatönomona a angelo e kis nena a kap i tanen tara ramun olo pan i Yupretis. Ba ramun teka e rakarakana bu tsunonor tara pala te butu nama a pitala te antunan aroho rima.

¹³ Ba lia e taregu a topisa liliahanei a omi te tara here ii a topisa kura. A töa e lakasama i runguna kökötsi pan, na tai e lakasama i runguna a ka a omi a töatöa, na tai lel e lakasama i runguna propet a gamogamo.

¹⁴ Nori u liliahanei u omi koru ti tatei kato a man mirakol. A topisa liliahanei teka i la uu turu tsunono turu han hoboto i puta. Nori i la sil tegi gono hoboto sil menaien a hiatatung turu Lan u Kapan tere Sunahan te tagala saluhena.

¹⁵ “Hengo iam! Alia e songotei la hasingoto guma romana. A katuun te kalatan töana ega sasaala. Alimiou go heremi a katuun te tara kap haniga nena u hasobö i tanen batema tatei beloso neia i matar u katuun.”

¹⁶ Ba u liliahanei u omi e gono hoboto raier u tsunono tara töa makum te ngöeri i Amagedon turu HaHibru.

¹⁷ Ba hatohitina a angelo e kis nena a kap i tanen iasa. Ba u töa u raranga pan e butu nama turu gumgum u göagono iahana Luman Lotu Pan me poeiena, “E kapa tala!”

¹⁸ Ba u kanaha e butu nama, na u gururu, na nun pan, na man tana manka e olongo hasima. A nun teka e pan balein u nun hobotona i manasa koru te antunana i romana.

¹⁹ Ba nonei a taun a kapan e takatana tara topisa makum, na u taun turu han hoboto i tarura hakapa. E Sunahan e hakats poutsin a taun a omi i Babilon, ba nonei e kato here ranei u katuun i tanen u katuun te ueier u uain u tagala te haharuei nena a raharaha a kapan tere Sunahan.

²⁰ Ba a man tolo hoboto na man pokus e taia hakapar.

²¹ Ba u aisina tara langits e rus nama i kolö me rus uana turu katuun, a nitiama tara man tötöa i taren e antunaia tara tohats a maloto a kilogrem. Ba u ais teka e kono homi koru rena u katuun, ba nori e ranga homi koru ner e Sunahan ti hala meraien a nihahuna teka.