Revelesin 15 - U Bulunagana U Niga

A tohit a angelo

¹ Ba lia e taregu u tana u hiharöto pan i Kolö: nonei a tohit a angelo ti ka mei a nitagala tegi hala menaien a tohit a niomi i puta, a kapakapa tara man niomi. Taraha, nori e hakape riou a raharaha tere Sunahan.

² Ba lia e taregu a ka te tara here ii u tasi, ne here hase ii u galas ti sohale ii u tula. Na lia u tara hasi u katuun ti tagala saluheia tara ka a omi a töatöa na turu kesa i tanen na turu hihase tara solonen. Nori i tuol ia i rehina u tasi te here ii u galas bate pile ner a man hap te hala raien e Sunahan.

³ Nori i kömei u hets tere Mosis a katunun kui tere Sunahan na u hets tara Tunan Sipsip, bate mar hets uaier teka: “O Tsunono, o Sunahan, alö te tagala saluhem! A man toukui i tamölö e pan koruna na e niga soköna. Alö a Tsunono Pan turu han hoboto. A man markato i tamölö e matsköna na e mana hasina.

⁴ O Tsunono, u katuun hoboto e matoute rioulö bate soloseie riou lö. Alö a töa te göagonom na te niga nitöam. U han hoboto emi hatsunono roua i tamölö, taraha a markato a matskö i tamölö i haröto hakapein.”

⁵ I murina a ka teka alia u tari a Luman Lotu Pan i Kolö na makum a göagono i tanen e kalata.

⁶ Ba tohit a angelona tara tohit a niomi e lakasa rima tara Luman Lotu Pan. U hasobö i taren e hiaka na e gogoso nitöa. Na man sasaaherö a man goul e hahisi a man lumlumaren.

⁷ Ba töa tara tohats a ka a töatöa e hala ranei a tohit a angelo a tohit a kap ti kuiei a goul. A man kap teka i saputi a raharaha tere Sunahan, nonei te töatöa nitöana.

⁸ Bu ualesala na nitagala tere Sunahan e habutena u ruhu me saputena a Luman Lotu Pan. E möa ta katuun ga antunan tasu romanaia tara Luman Lotu Pan e antunana te kapa noa a tohit a niomi tara tohit a angelo.