Revelesin 12 - U Bulunagana U Niga

A tahol na kökötsi pan

¹ Ba u hiharöto u kapan koru e butuna i Kolö. A tahol te hasogi a pitala, na tsihou e kaia i kopina pitapitana mounen, na u hatan tsunono i bakunen e ka mei a maloto na huol a pitopito.

² Nonei e pika ba pöata te katsin posaien, ba nonei e ku hapan mena te sagoho menaien a kamitsina tega posa uaien.

³ Ba u tana u hiharöto e butu hasina i Kolö. A ka rörö a kapan koru te tara here ii a kökötsi. Nonei e ka mei u tohit u baku na maloto a ki, na man hatan tsunono e ka hobotoia tara man baku i tanen.

⁴ A hisnen e salo bani a hatopisana pala turu pitopito me lapo ba ranen i puta. Ba kökötsi ena tuolna i matana a tahol te katsin posa. Nonei e ngilin noui a pien tara pöata tegi poseien.

⁵ Ba tahol e poseiena a pien tson, ba nori e lu borobore ren me la menarien iasa tere Sunahan te gum na turu gumgum u göagono i tanen. Nonei a pien teka te tsunono hatagala ranou u han hoboto.

⁶ Ba tahol e bus uana tara makum a palaka. E Sunahan e kato hamatskö hakapa beien a makum teka, ba nonei tena tara kap nanouen e antuna turu 1,260 u lan.

⁷ Na turu hiharöto teka alia u tari a töa a hiatatung te butuia i Kolö. Be Maikol na u angelo u niga i tanen e hiatatung gono mer a kökötsi pan na u angelo u omi i tanen.

⁸ Ba pala tara kökötsi e rus ria tara hiatatung ba nori e möa lelir ta makum taren i Kolö.

⁹ Ba kökötsi na u angelo hoboto i tanen e lapo ba merarumei i puta. Nonei noa has a kökötsi na i manasa e Satan, a liliahanei a omi te gamogamo rena u katunura i puta.

¹⁰ Ba lia e hengoegu u töa u raranga panina i Kolö te pei: “E Sunahan e sakahis hamanasa rena u katuun i tanen na e haröto has nena a nitagala i tanen. Nonei a Tsunono Pan. Na e Mesaia has i tanen e haröto nena a nitsunono i tanen. Taraha? Nori i lapo ba hakapa nama a katuun a omi i Kolö te roron hahatein u hahatoulana i tarara i matana e Sunahan tara mamana pöata.

¹¹ Nori i tagala saluheien tara nitagala turu rahatsing tara Tunan Sipsip na turu ranga hamana ti habulungana naien. Nori ima peits nai a peisaren, na ima matout hasei tegi mate sil menaien e Sunahan.

¹² Alimiou hoboto te ka mia i Kolö go sasaala iam! Kaba a niomi pan e butu noa i tamilimiou u katuun te ka mia turu tsiktsiki na i tasi. Taraha? E Satan e koul hakapa uu i tamilimiou na nonei e raharaha koruna. Nonei e atei silena a pöata i tanen e sukusukun kapana.”

¹³ Ba pöata te atei sileia a kökötsi ti lapo ba menaien i puta, ba nonei e tanian kuteiena a tahol te posei a pien tson.

¹⁴ Kaba tahol i hale ii u huol u pakapaka tara manu pan tega tapa meien tara makum i tanen i gusuna makum a palaka. Nonei ena tara kap naroua tara makum teka antunana turu topisa u hiningal na tönomo a tsihou, na e hatongo kap has naroien tara kökötsi.

¹⁵ Ba kökötsi e pula nena u ramun u parpara te here ii a ramun olo, te olo uu tara tahol bate katsin las ba nanen.

¹⁶ Kaba u tsiktsiki e taguhi a tahol me pangana be tongolena a ramun olo te lakasama i runguna a kökötsi.

¹⁷ A kökötsi e raharaha korui a tahol be lana tegana pula gono menaien a pala tara tahol, nori u katuun te kukutier u raranga tere Sunahan na u hihatuts tere Iesu.

¹⁸ Ba kökötsi ena tuolna i kotolana.