Revelesin 11 - U Bulunagana U Niga

A huol a tsonun hahatei

¹ Ba lia e haleri u töa u ruein tunatuna me hatei riou, “Na tuneiema a Luman Lotu Pan tere Sunahan na makumun haats. Balö te ase rem u katuun te lotu ria tara Luman Lotu Pan.

² Kaba, möa tuna tunei a makumun oho ielesala. Taraha? Nonei i hala hakapa naia turu katuun tema hamanari. Nori e tötö homier romana a Taun a Göagono e antunana turu tohats u maloto na huol a tsihou.

³ Na lia e hale goi a huol a tson hahatei i tar a nitagala te hahatei menaroien u raranga tere Sunahan, e antuna noa turu 1,260 u lan. Ba nori te hasoge riou u hasobön mo.”

⁴ A huol a katuun teka nori u huol u ruein olip na u huol u lam te tuol ria i matana Tsunono te tsunono nena a han i puta.

⁵ Te katsin kato homie noua ta katuun a huol a katuun teka, ba u tula te lakasa nama romana i rungren bate kato homi rena u pakö i taren. Esi te torohanan kato homi ranen e mar kulupu hamate mena roi teka.

⁶ Nori e ka mer a nitagala tegi keits menaien a langits ba tema polo nei tara pöata te hatei narien u ranga tere Sunahan. Na nori e ka has mer romana a nitagala tegi hapalis menaien a man ramun bate butun rahatsingina. Na nori e ka has mer romana a nitagala tegi hala menaien a mamana mar niomi tara han i puta tara saha pöata tegi ngileien.

⁷ Pöata te hatei hakapa narouien u ranga, ba ka a omi te butu nama iahana kiou te möa ta nönöanen te hiatatung mera nen romana. Ba nonei te tagala saluhe ranen romana bate atung hamate ranen.

⁸ Ba u tuenrei i taren te opöna romana tara kalana tara taun pan ti nila naia a Tsunono i taren tara kuruse. A man solon haharuei tara taun teka i Sodom na i Itsip.

⁹ Turu topisa na hapalana u lan, u katuun tara mamana hun katuun na tara mamana han na turu mamana u mar ranga e röter romana a tuenreiren, ba nori te hapiou ner tegi kaho meraien.

¹⁰ U katunura i puta e sasaala mer romana tegi mate uu a huol a katuun teka. Nori e katoeier romana a man kannoun sasaala, bate hiahalhala ner a man hebala i taren. Taraha? U tsonun hahatei i mate hakapa, nori a huol ti kato hakamits korur u katunura i puta.

¹¹ Kaba i murina u topisa na hapala u lan, e Sunahan e pihu hatöatöa ranoen ba nori te taker. Ba u katuun hoboto te tara raren romana bate matout korur.

¹² Ba huol a katuun te hengoer romana u raranga panina i Kolö bate poeiena i taren, “La sei uamuma teka!” Ba nori te la sei uaier romana i Kolö turu köasi, ba u pakö i taren te tara raren.

¹³ Nonei has tara pöata teka e ka mena romana a nun pan a tagala, ba nonei te kato homiena a hamalotona a pala tara taun teka bate kato hamate rena u 7,000 tara katuun. Ba palair u katuun te ka noar te matout korur romana, ba nori te soloseie riou e Sunahan te kana i Kolö.

¹⁴ A hahuoluna a niomi e kapa. Kaba hahengo iam! E ma lehana noi ba hatopisana niomi te la nama.

A hatohitina tuhil

¹⁵ Ba hatohitina angelo e pihena a tuhil i tanen. Ba u raranga u panina i Kolö e poeiena: “A Tsunono i tarara na e Mesaia i tanen e tsunono hamanasa ner u han hoboto i puta, ba nonei te tsunono nitöa nou tara mamana pöata!”

¹⁶ Ba u huol u maloto na tohats tara pal kapan ti gum ia turu gumgum u göagono i taren i matana e Sunahan e hopöe ria a peisaren i puta me hatsunoner e Sunahan.

¹⁷ Ba nori e poeier: “O Tsunono, alö e Sunahan te Tagala Korum. Alö e kam, na lö u ka mam noahas. Alam e haniga mem tu haröto menai lö a nitagala a kapan i tamölö na e tsunono mia tara han i puta.

¹⁸ U katunura i puta i raharaha korue ioulö, kaba pöata tego hala menai lö a nihahuna e butu hakapa. A pöata e butu hakapama tego ona merai lö u katuun ti mate. Na pöata e la hakapama tego hala menai lö a hihol a niga turu katunun kui i tamölö u propet, na u katuun hoboto i tamölö te matoute riou lö, u katuun u kapan na u katuun papala has. A pöata e butu hakapama tego kato homi merai lö u katuun ti kato homi a han i puta!”

¹⁹ Ba pöata ti ranga hakapa ien, ba Luman Lotu Pan tere Sunahan i Kolö e kalater, ba lia e taregu a bokis te ka mei u rangan kits. Ba u gururu na u kanaha na nun e butu nama na man palaina manka te olongo hasima, ba aisina tara langits a tiama e rus uana i puta.