U Bulungana u Niga tere Iesu Kristo te kolotein e Mak 9 - U Bulunagana U Niga

¹ Be Iesu e ranga lelna i taren me poeiena, “Alia e hatei hamana ragou limiou, a palair u katuun te ka ria teka ema materi romana e popona tegi tara menaien a Nipepeito tere Sunahan te butu menama romana a nitagala pan.”

A peisana e Iesu e palis

^2-3 I murina u tönomo u lan be Iesu e lueiena e Pita mere Jemis na e Jon me la meranen iasa turu töa u pokus pan tina ka pepeisaien. Ba pöata ti taraien ba peisana e Iesu e palisina, ba u hasobö i tanen e butun hiakana me kankanaha koruna. E möa ta töa ta katuun ega antunan markato hahiaka menai u hasobö temar hiaka uu hasobö i tanen.

⁴ Be re Ilaitsa mere Mosis e butur me ranga gono mer e Iesu.

⁵ Be Pita e poeiena tere Iesu, “Tson Hihatuts, e nigana te ka uarara teka. Alam go kui a topisa a taluhu, a töa i tamölö na töa tere Mosis na töa tere Ilaitsa.”

⁶ U katunun tsitsilo i matout koru ne Pita e ma atei sil lelei a saha ka tego ranga naien.

⁷ Bu töa u köasi e butuna me kopo kap ranen, ba u ranga e butu nama i gusuna u köasi me poeiena, “Nonei a Pien Tson a tsomi koru i tar teka. Hahengo mia i tanen.”

⁸ Pöata ti hula tara ien nori ima tara lele ii ta katuun, e Iesu puku te ka gono meraien.

⁹ Pöata ti koul pouts men turu pokus, be Iesu e ranga hatagala mera nen me poeiena, “Alimiou ema antunan hatei moi ta töa ta katuun a ka te tare mula limiou, e antunana tara pöata, Alia tu butun Katunuma e takei pouts goua tara tou mate i tar.”

¹⁰ Ba nori e totoneier u raranga teka me harangata sei ner u ranga te poeiena, “Alia e takei pouts goua romana tara tou mate.”

¹¹ Ba nori e rangateier e Iesu, “E hana bu tson hihatuts tara Lo te poeier e Ilaitsa ega mam nema romana e Mesaia?”

¹² Ba nonei e ranga palis ranen me poeiena, “E Ilaitsa ena mam hamana pouts romana nama batemi hamatsköeiena a mamanaka. Kaba i kolotein, Alia tu butun Katunuma e sagohe gou a kamits pan batema ngileri.

¹³ Kaba lia e hatei ragou limiou, e Ilaitsa e la hakapama, kaba u katuun i kato menaien timar ngil uaien, timar koloto menaien turu Buku u Göagono.”

E Iesu e kato haniga poutsi a pien tson a biru

¹⁴ Pöata ti hihitupala meraien a palair u katunun tsitsilo, ba nori e tarer a katuun a parpara koru ti gono. Ba u tson hihatuts tara Lo e hiangenngena gono meraier u katunun tsitsilo.

¹⁵ Ba pöata ti tareia u katuun e Iesu ba nori e asingoto korur me sasaalar me piata uaier i tanen me hatsi söasa naren.

¹⁶ Be Iesu e rangata ranen me poeiena, “Alimiou e hiangenngena silemiou aha?”

¹⁷ Ba töa katuun te kaia i gusuren e ranga palisina me poeiena, “Tson Hihatuts, alia e la meguma a pien tson i tar i tamölö, taraha a töa liliahanei a omi e kana i tanen, nonei te biru sila nen.

¹⁸ Pöata te takeina a liliahanei teka ba nonei te lapo nena a pien i puta, ba rungunen te poepoe hakapana bate kutu hangilngiliki hakapena a liho nen ba tuenrei nen te söei hakapana. Alia e tahul ragula u katunun tsitsilo i tamölö tegi tsuga ba menien a liliahanei teka, kaba nori ema antunan tsuga nalileien.”

¹⁹ Be Iesu e poeiena i taren, “Alimiou u katunura i romana e hahamana korumiou. Alia e sökana koru megu u nihahamana i tamilimiou. Mi piou namia a pien i tar.”

²⁰ Ba nori emi piou naria a pien i tanen. Ba pöata te tareia a liliahanei e Iesu, ba nonei e kato hapetpetete ponena a pien, ba pien e rus uana turu tsiktsiki me hula tegelena ba rungnen te poepoe hakapana.

²¹ Be Iesu e rangatena e tamana a pien tson, “I hangisa te taniaia a markato teka i tanen?” Ba e tamanen e poeiena, “Te tetenei noaien.

²² A pöata a parpara a liliahanei teka e katsin kato hamatieien bate harus beneien u tula na u ramun has. Tego antuna uu lö, ba lö te taatagi ramumoulam bate taguhu ramumoulam.”

²³ Be Iesu e poeiena i tanen, “E hana balö te poeiem, ‘Tego antuna uu lö?’ A katuun te ka mena a nihamana e antunan kato nena a mamanaka.”

²⁴ Ba tamana pien e ku hapanina me poeiena, “Alia e hamanagu. Alö ego taguhema a tsi nihamana a tsi tetenei i tar.”

²⁵ Pöata te tareia e Iesu a katuun a parpara i piata gögonoma, ba nonei e hakopiseiena a liliahanei me poeiena, “Alö a liliahanei te kato habiruem na te hasiköem a pien teka, alia e ranga megou lö, koul bani balö tema antunan ka lel mia i tanen.”

²⁶ Ba liliahanei e ku hohomi koruna me kato hapetpetete hapan koruena a pien me laba nanen, ba pien e here nei te mate uana a katuun ba parpara i taren e poeiena, “E mate tala.”

²⁷ Kaba e Iesu e lui a limana a pien me las hatakeie nen ba nonei e tuoluna.

²⁸ Ba pöata te tasuia e Iesu i luma, ba u katunun tsitsilo i tanen e rangata hamouse ren me poeier, “E ha lala ba lam tema antunan tsuga ba na mulei a liliahanei?”

²⁹ Be Iesu e poeiena i taren, “A toa puku a ka te antunan tsuga banena a marka teka: tego singo hatagala uaiam limiou tere Sunahan”

E Iesu e ranga lenin a tou mate i tanen

³⁰ Nori i laban a han teka me sila ria i gusuna a provins i Galili. Nonei e raman u katuun egi atei sil ime te kaien,

³¹ taraha nonei e hatutsir u katunun tsitsilo i tanen. Ba nonei e poeiena i taren, “Alia tu butun Katunuma ena hala naroua tara pal tson tena ranga hohomi nariou lia romana. Nori ena kato hamate riou lia, ba i murina u topisa u lan ba lia te takei pouts gou.”

³² Kaba nori ima atei haniga silei a saha ka te ranga sileien, ba nori e matoutun harangate rien a ka teka.

Esi te panina?

³³ Nori i tukuia i Kapenium. Ba pöata ti kaien i luma be Iesu e rangata ranen, “Alimiou e hiarangrangata namuma a saha ka i maroro?”

³⁴ Kaba nori ima ranga paliseien, taraha nori i hiaraharaha sileiema esi te panina.

³⁵ Be Iesu e gumuna me ngö renama a maloto na huol a katunun tsitsilo i tanen me poeiena i taren, “A katuun te ngilin tsunono panina ega kato hatetenei korui a peisanen bate kui haniga beraiena u katuun hoboto.”

^36-37 Ba nonei e luena a töa pien a tetenei me hatuole nen i mataren. Ba nonei e lukutu nanen me poeiena i taren, “A katuun te hala nanou a niniganiga i tanen tara pien teka e haniga hase noulia. Na katuun te hanige noulia ema haniga pepeise noi lia, kaba e haniga hasena e Sunahan te hala na moulia.”

A katuun tema pal ranei ra e haniga ranoura

³⁸ Be Jon e poeiena i tanen, “Tson Hihatuts, alam u tarema a katuun te tsuga bar u liliahanei u omi tara solo mölö. Ba lam e ranga hapiou namen, taraha nonei ema ka neia tara pala i tarara.”

³⁹ Be Iesu e poeiena, “Möa tu ranga hapiou naiam, taraha a katuun te katoena u mirakol bate poeiena a solor ema antunan ranga homi nanei lia.

⁴⁰ A katuun tema pal raneira e haniga ranoura.

⁴¹ Alia e hatei hamana ragou limiou, a katuun te atei silena alimiou u katuun i tar bate haua ranoui limiou ta tsi ramun, a katuun teka e lu hamane nou u hamatana i tanen.”

A markato a omi te kato homiena a nihamana

⁴² E Iesu e ranga lel me poeiena, “Sanena ta töa ta katuun i gusumilimiou ega kato homi ta töa ta pien i gusur a galapien te hamana ria i tar ba pien te hapolasa ba nanou a nihamana i tanen, e niga bala nena tegi kits menai ta hatu pan i totongolo na a katuun teka ba nonei tena harukue ria i gusuna loul.

⁴³ Na tega kato homieia lö a limamölö, ngats kotsi balö te ba namen. E niga bala nena tego kamei lö u ualima u korus balö te lueiem a nitöatöa te ka nitöana. Kaba e omi koruna tego ka menai lö u huol u ualima balö te lauam tara hanin hahuna i hel, turu tula tema antunan hoso nari.

⁴⁵ Na tego kato homieia alö a moumölö, ngats kotsi balö te ba namen. Taraha, e niga bala nena tego ka menai lö u mou u korus balö te lueiem a nitöatöa te ka nitöana. Kaba e omi koruna tego ka menai lö u huol u mou ba nori te lapo ba naria lö i hel.

^46-47 Na tega kato homieia lö a matamölö, has bani balö te ba namen. E niga bala nena tego ka menai lö u töa u mata balö te tasu mia tara Nipepeito tere Sunahan. Kaba e omi koruna tego ka menai lö u huol u mata ba nori te lapo ba naria lö i hel.

⁴⁸ Tara makum teka u kakaminei te noueier u tuenreina u mate na ema tatei mate roi, na u tula ema antunan hoseri.

⁴⁹ “A man nitiama te butuna romana turu katuun hoboto e here hase nou ii u tula bate kato haniga ranoura, te kato has uana u sol te hake ria tara kannou bate kato hanige nen.

⁵⁰ U sol u ka u niga. Kaba te taia ba nena u sol a nitatasena i tanen, ba lö temar kato hatatasena pouts mena moien ime? E möa. Na limiou go here hasemi u sol ba limiou te hiakaka haniga hobotomiou.”