U Bulungana u Niga tere Iesu Kristo te kolotein e Mak 8 - U Bulunagana U Niga

E Iesu e hanour u 4,000 tara katuun

¹ Tara pöata teka u katuun u parpara i gono poni me möana ta kannou tegi noueien, be Iesu e ngö rena u katunun tsitsilo i tanen me poeiena,

² “Alia e taatagi koru regu u katuun teka, taraha nori i ka gono meiou lia turu topisa u lan na kannou i taren e kapa.

³ Te hala besbes pouts ragoien lia turu han i taren ba nori te tuhatupu la ranoua i maroro. Taraha, a palai i lama turu han i lehana koru.”

⁴ Bu katunun tsitsilo i tanen e ranga palise ren me poeier, “Ime temar sabe mena roira ta kannou tara makum a palaka teka tegi hanou raira u katuun teka?”

⁵ Be Iesu e rangatana, “A lahisa beret te ka memi limiou?” Ba nori e poeier, “A tohit.”

⁶ Be Iesu e ranga merena u katuun egi gum ia turu tsiktsiki. Ba nonei e luena a tohit a beret teka me haniga uana tere Sunahan me posepose nen. Ba nonei e hala raneien u katunun tsitsilo i tanen egi molamola raien u katuun.

⁷ Nori i ka has mei a matsi iena mats tetenei, ba i murina te haniga uu e Iesu tere Sunahan ba nonei e hala raneien u katunun tsitsilo egi molamola has naien.

⁸ U katuun hoboto i nou me masulur. Ba u katunun tsitsilo e goneier a man nouba me antunena a tohit a kalobaka a saputu.

⁹ U katuun teka i antunaia tara 4,000 a katuun.

¹⁰ Be Iesu e hala ba ranen ba nonei e osa gono meraiena u katunun tsitsilo i tanen tara tolaala ba nori e la uaier tara provins i Dalmanuta.

U Parasi i ngilin tarein tu mirakol

¹¹ U Parasi i lama memi tanian hia raharaha gono meren. Nori i ngilin torohaneien me rangate rien tego haröto menaien ta hatöatongo tega lama i Kolö tere Sunahan.

¹² Be Iesu e sökana koru ranen me poeiena, “Taraha ba limiou u katunura i romana te ngilin tara namiou tu mirakol tega harötein, a nitagala tere Sunahan? Alia e hatei hamana ragou limiou, alia ema antunan haröto ragi limiou u katunura i romana tu mirakol.”

¹³ Ba nonei e laba ranen, mena osa pouts na turu bout me la uana i hapalana a ramun a perperere.

U is turu Parasi na tere Herot

¹⁴ U katunun tsitsilo i solopalema tegi söata mena meien ta beret. Nori i kamei a töa puku a beret turu bout.

¹⁵ Be Iesu e ranga hatagalana i taren tegima hengo menaien u hihatuts u gamo turu katuun me poeiena, “Tarakap haniga noaiam bate hanei silemiou u is turu Parasi na e Herot.”

¹⁶ Ba nori e hiararangar me poeier, “Nonei e ranga menei a ka teka taraha ara i möa ta beret.”

¹⁷ E Iesu e atei sil nori i rangein u is tuun me poeier, “E hana ba limiou te hiararanga namiou te möa uana ta beret? Alimiou ema atei halesala noa hasmi na ema atei noami na baku milimiou e tutu noalasina?

¹⁸ Alimiou e ka memiou u mata kaba limiou ema tara mi na limiou e ka memiou u talinga kaba limiou ema hengo mi, e hana alimiou u solopala hakapaiam?

¹⁹ Pöata tu poseposeia lia a tolima beret tara 5,000 turu katuun, a lahisa kalobaka nouba tu ongeiam limiou?” Ba nori e ranga palise ren me poeier, “A maloto na huol a kalobaka.”

²⁰ Be Iesu e rangata lenina, “Na tara pöata tu poseposeia lia a tohit a beret tara 4,000 turu katuun, a lahisa kalobaka nouba tu ongeiam limiou?” Ba nori e ranga palisir me poeier, “A tohit.”

²¹ Ba nonei e rangata ranen, “Ga limiou ema atei noa hasmi?”

Iesu e kato haniga poutsi a katuun a matakiou

²² Nori i tukuia i Betsaida bu katuun e la merima a töa katuun a matakiou. Ba nori emi piou narien tere Iesu me ranga hataatagi ria tere Iesu tego sebele menaien a katuun teka.

²³ Be Iesu e pile nena a limana a katuun a matakiou me lase nen me la halakasa ba ner a han teka. Be Iesu e sahi nena u kinahus i matana a katuun me hatakopena a limanen i tanen me rangate nen, “Alö e tara hasem ta ka?”

²⁴ Ba katuun teka e tara seiena me poeiena, “Alia e tara raiegu u katuun, kaba nori e here rari a ruei te hula lar.”

²⁵ Be Iesu e hatakopo lelena a limanen i matana a katuun ba nonei e tara haniga talena a mamanaka.

²⁶ Ba nonei e hala pouts mena neien i luma i tanen me poeiena, “Möa tu la pouts uu tara han te lakasa ruma ra.”

E Pita e ngöei e Iesu e Mesaia

²⁷ E Iesu na u katunun tsitsilo i tanen i la uu tara han i rehina i Sisaria i Pilipai. Pöata ti la noaien i maroro ba nonei e rangata ranen, “U katuun e ngöeri lia esi?”

²⁸ Ba nori e ranga palisir me poeier, “A palair u katuun e poeier alö e Jon a Tsonun Baptais, na palai e poeier alö e Ilaitsa, na palai e pei haser alö a töa turu propet.”

²⁹ Ba nonei e rangata ranen, “Ga limiou e ngöe milia esi?” Be Pita e ranga palise nen me poeiena, “Alö e Mesaia.”

³⁰ Be Iesu e ranga hatagala koru mera nen, egima hate ii ta töa ta katuun.

E Iesu e ranga mamin a tou mate na nitöatöa i tanen

³¹ Be Iesu e tanian hatuts raneien tega lu menai a Pien Tson te butun Katunuma a kamits a kapan koru, na tegima ngil menaien u tson hihatuts tara Lo na pal kapan turu pris. Ba nonei e poeiena, “Alia ena atung hamatie riou romana, ba i murina u topisa u lan balia te takei pouts gou.”

³² Nonei e ranga halesala koru meraien a ka teka. Be Pita e lu hatalisena e Iesu me tanian ranga hapiou nanen.

³³ Kaba e Iesu e habirits me tara uana turu katunun tsitsilo i tanen me ranga hapiou nena e Pita me poeiena, “O Satan, la hatalisila. Alö ema hakats nami a manka tere Sunahan. Alö e hakats tuun nem a manka turu katuun tuun.”

³⁴ Be Iesu e ngö rena u katuun na u katunun tsitsilo i tanen egi la uama i tanen. Ba nonei e poeiena, “Te ngilin kukute nama lia ta katuun, nonei ega solopali a peisanen, bate haniga nena tego sagoho menaien a kamitsina te kukute mena neien lia te markato uana a katuun te söatena a kuruse na tara tou mate i tanen, bate la gono mena moulia.

³⁵ Taraha, a katuun te peits nena a nitöatöa i tanen ena hatia nouen romana. Kaba a katuun te hatia sile nei a nitöatöa i tanen te ngil koru mena neien lia na u Bulungana u Niga, nonei ena sabie nou a nitöatöa hamana.

³⁶ Gaha te lue nou a katuun te ka menou a mamanaka na i puta bate hataie nou a nitöatöa i tanen?

³⁷ U mana koru aha te antunan hala palise roui a nitöatöa i tanen?

³⁸ E resi te matsingolo nariou lia na u Bulungana u Niga i tar turu katunura i romana te katoeier a mamanaka a omi, a Pien Tson te butun Katunuma ena matsingolo has ranouen romana tara pöata te la gono menamen romana u angelona turu ualesala pan tere Tamar.”