U Bulungana u Niga tere Iesu Kristo te kolotein e Mak 7 - U Bulunagana U Niga

U hihatuts turu katuun pan

¹ U Parasi na u palair u tson hihatuts tara Lo ti lama i Jerusalem i gonogono hahisi e Iesu.

² Ba nori e tara raier a palair u katunun tsitsilo i tanen ti nou mei u lima u tabuna galus.

³ U Parasi na u Jiu hoboto ema tatei nou mamri e antunana te galuse rien a limaren, a markato ti roron kukute u tuburen. Nori ema tatei nou mamri tema galus noe rien a limaren temar ranga uana a lo turu tuburen.

⁴ Nori ema antunan a nou haseri a kannou te lue rima tara töana e antunana te galuse rien. Na e ka has mena a palaina man markato a man para te kukute ren, a markato te galus haniga menari a pelete na kap na sosopene na ketol.

⁵ Ba u Parasi nu tson hihatuts tara Lo e rangateier e Iesu me poeier, “Taraha ba u katunun tsitsilo i tamölö tema kukutieri u hihatuts turu tuburara bate nou mer u lima u korkoriana?”

⁶ Be Iesu e ranga palis ranen, “E Aisaia e ranga hamana sil raiou limiou i manasa, alimiou u katuun u gamogamo me mar koloto uana teka, ‘U katuun teka e hatsunono meri lia u ranga tuun i taren, kaba a toriren e lehana ba nanou lia.

⁷ Nori e mastein hatsunone riou lia, bate hihatuts ner a man markato turu katuun tuun, bate poeier nonei a man markato tere Sunahan.’

⁸ “Alimiou e hapolasa ba namiou u raranga tere Sunahan bate pile kap namiou a markato turu katuun tuun.”

⁹ Ba nonei e poeiena i taren, “Alimiou e rama nemiou a man raranga tere Sunahan bate pile kap namiou a man markato i tamilimiou.

¹⁰ E Mosis e poei, ‘Hapaneiam e tamamilimiou ne tsinamilimiou,’ me pei hasena, ‘A katuun te ranga homi nena e tamanen tsi e tsinanen egi atung hamate korui.’

¹¹ Kaba alimiou e poeiemiou, sanena ta katuun ego pei tere tamanen ne tsinanen, ‘Alia e taatagi korugu, a ka tego halei lia lö, alia e haka begien e Sunahan.’

^12-13 A katuun teka ema taguhu tale nei e tamanen tsi e tsinanen. E markato uana teka ba limiou te hihatuts nitöa namiou a man markato turu tubumilimiou ba limiou te hipus namiou u raranga tere Sunahan. Na palair a man markato a man parpara te katoe milimiou e markato has uana iesana.”

A manka te kato hakorkoriana hamana rena u katuun

¹⁴ Be Iesu e ngö lel rena u katuun me poeiena, “Hahengo haniga mia i tar bate atei sile miou a ka teka.

¹⁵ E möa ta ka ta omi ielesala tara katuun tega antunan kato homi a katuun, kaba a ka te lakasa nama tara torina a katuun, nonei te kato homie nou lö.”

¹⁶

¹⁷ Pöata te laba raia e Iesu u katuun me tasuna i luma, bu katunun tsitsilo i tanen e rangate rien u haharuei teka.

¹⁸ Ba e Iesu e poeiena i taren, “Alimiou ema atei lasmi? Alimiou go atei sileiam a ka te tasuna tara katuun ema antunan kato homie neien.

¹⁹ Taraha, e tasuna tara katuun batema lauanei tara tui kaba e lauana i torina a katuun bate lakasa ba pouts nena a katuun.” (Tara markato teka be Iesu te poeiena a mamana mar kannou a man kannou a man niga.)

²⁰ Ba nonei e peiena, “A ka te lakasa nama tara katuun, nonei a ka te kato homie nen.

^21-22 Taraha e lakasa nama iogana tara tui tara katuun, te lakasa nama: u hakats u omi, na tsikolo na kop na hipuli na tsikolen a katuun a hitöl na mamangilin a manka tara tana katuun na markato a omi. Na gamogamo na markaton hamatsingolo tua na u hiomi nu tuts na hipus na u hirata u omi.

²³ A mamanaka a omi hoboto teka e tuhana nama iogana tara katuun bate kato hakorkoriane nen.”

A nihamana tara töa tahol

²⁴ E Iesu e laban a han teka me la uana tara taun i rehina i Taia. Nonei e tasuia tara töa luma na nonei e ma ngile ii ta katuun ega atei sil te kaien. Kaba u katuun i sabe noa haseien.

²⁵ A töa tahol e kamei a pien tahol i tanen a liliahanei e roron sesei ien. Ba tahol teka e hengonena e Iesu ba nonei ena hatukun na i matanen.

²⁶ A taholuna i Grik, i poseia i Pinisia tara provins i Siria. Ba nonei e ranga hataatagina tere Iesu tego tsuga ba menaien a liliahanei tara pien tahol i tanen.

²⁷ Be Iesu e ranga palisina me haharuei nena u Jiu na u katuun tema Jiu ri me poeiena, “Hanou mam raiam a galapien. E ma niga nei tego lu menai lam a kannou tara galapien bate lapo rami u muki.”

²⁸ Ba tahol e poeiena, “E manana, Tson Hihatuts. Kaba u muki te karia i kopina u tebol e nou haser a matsi kökoto tara galapien.” Ba e Iesu e atei silena nonei a tahol e mar hakhakats uu teka: u Jiu i ngörai u palair u katuun u muki, kaba u katuun teka e tatei lu noa haser a palaina a manka man niga tere Sunahan.

²⁹ Be Iesu e poeiena tara tahol, “Alö e tatei la poutsum i han i tamölö, taraha alö e ranga palis haniga mula. A liliahanei e laba hakapa nelala a pien tahol i tamölö.”

³⁰ Ba tahol e la pouts uana i han i tanen mena tarena a pien tahol i tanen te opöia tara inana. A liliahanei e laba hakapa naien.

E Iesu e kato haniga poutsi a katuun a talingatu

³¹ Be Iesu e laba nena a taun i Taia mena silana tara taun i Saidon te la uu tara ramun a perperere i Galili, tara makum i Dikapolis.

³² Bu katuun e la merima a katuun a talingatu na ema ranga haniga balai. Ba nori ena ranga hataatagi ria tere Iesu tego hatakopo menaien a limanen tara katuun teka.

³³ Be Iesu e las menanei a katuun teka tara makum a ski be tupa nena a man kabelenen turu talingatu me kahus hasena a kabelenen me sebelena a miana a katuun.

³⁴ Be Iesu e tara sei uana iasa i Kolö me husa takana me poeiena tara katuun, “Epata.” U ranga teka e poeiena, “Takalata.”

³⁵ Ma pina töa ii ba talingana a katuun e hengona me ranga haniga poutsuna.

³⁶ Be Iesu e ranga hatagalana i taren, tegima hahatei uaien, kaba nori ina hahatei noahas.

³⁷ U katuun hoboto i asingoto koruni a ka teka, ba nori te poeier, “A mamanaka hoboto te katoenen e nigana. Nonei e kato haniga pouts rena u talingatu ba nori te hengo poutsur, na nonei e kato haranga pouts has rena u katuun u biru ba nori te ranga haniga poutsur.”