U Bulungana u Niga tere Iesu Kristo te kolotein e Mak 3 - U Bulunagana U Niga

A katuun a lima mate

¹ Be Iesu e tasu pouts uana i luman lotu me tarena a töa katuun a lima mate.

² A palair u katuun i ngilin koutin e Iesu ba nori e tarakap naren tega kato haniga menaien nonei a katuun turu Lan u Göagono.

³ Be Iesu e poeiena tara katuun a limamate, “La uama i mam teka.”

⁴ Ba nonei e rangata rena u katuun, “A Lo i tarara e ranga nena aha tegi kati ra turu Lan u Göagono? Aragi kato a markato a niga tsi aragi kato a markato a omi? Aragi taguhi a katuun te katsin matena tsi aragi atung hamateien?” Kaba nori ima ranga paliseien.

⁵ Be Iesu e hula tara uana i taren ba nonei e raharaha koruna, taraha a torir u katuun teka e roto koru batema hahan ranga palis ri. Ba nonei e poeiena tara katuun a lima mate, “Hasoa nema a limamölö.” Ba nonei e hasoa nena a limanen ba limanen e niga poutsuna.

⁶ Ba u Parasi e lakasa ba ner a luman lotu mena hagum boroboro gono meraier a pal katuun tere Herot a King. Ba nori e korupaköner tegi atung hamate menaien e Iesu.

U katuun u parpara koru i gonoia i rehina a ramun

⁷ E Iesu na u katunun tsitsilo i tanen i la uu tara Ramun i Galili ba u katuun u parpara koru e kukute raren.

⁸ Nori i lama i Galili na i Judia na i Jerusalem na i Idumia na i hapalana ramun i Jodan na tara man han tara taun i Taia na i Saidon. U katuun u para teka i la uu tere Iesu, taraha nori i hengoein a manka te katoeien.

⁹ U katuun i parpara koru be Iesu e poeiena turu katunun tsitsilo i tanen, “Alimiou go na lue muma tu bout. Ba lia te osa gia turu bout ba u katuun tema antunan songe roi lia.”

¹⁰ Nonei e kato haniga hakapa poutsir u katuun u parpara, ba u katuun hoboto ti ka mei a siki e hiasösongo siler tegi sebele menaien e Iesu.

¹¹ Tara man pöata ti tara reia u katuun ti kamei u liliahanei e Iesu, ba nori te hatukun ria i matanen. Ba nori te ku hapanir bate poeier, “Alö a Pien Tson tere Sunahan!”

¹² Be Iesu e ranga hatagala koru meranen, nori egima hatei rai u katuun nonei esi koru.

E Iesu e hopö kapir a maloto na huol a katuun

¹³ Be Iesu e la sei uana turu pokus ba nonei e ngö rena u katuun te ngil raien ba nori e la uaier i tanen.

^14-15 Ba nonei e hopö kap rena a maloto na huol a katuun me poeiena, “Alia e hopö kap meragi limiou tego ka gono menami limiou alia. Na lia e hala has ragou limiou, tegona habulungana mena milimiou u raranga tere Sunahan, bate hala has ragi limiou a nitagala tego tsuga ba mera milimiou u liliahanei u omi.”

¹⁶ Nonei e hopö kapir a maloto na huol a katuun: e Saimon (te hala hasien a tana solo, e Pita).

¹⁷ Na e Jemis a pien tere Sebedi ne Jon e toulanen (te hala haseien a solo, e Boanetsis, te poeiena a galapien turu gururu).

^18-19 E Endru na e Pilip ne Batolomio na e Matiu ne Tomas na e Jemis a pien tere Alpius, ne Tadius mere Saimon a toun Kenan, na e Judas Iskariot, a katuun tena hala nanoua e Iesu turu katuun ti korupakö naien.

E Iesu ne Belsebul

²⁰ Be Iesu ena tasuna tara töa luma. Bu katuun e gono lel rima be Iesu na u katunun tsitsilo i tanen e moar ta pöatan nou i taren.

²¹ Ba pöata ti hengo naia a hun katuun i tanen a ka teka, ba nori ena katsin lu poutse ren, taraha nori i pei, “Nonei e tutu hakapa.”

²² Ba u palair u katunun hihatuts tara Lo ti lama i Jerusalem e poeier, “E Belsebul e seie nen. A tsunono turu liliahanei te hale neien a nitagala tega tsuga ba meraien u liliahanei u omi.”

²³ Be Iesu e ngö rena u katuun egi la uama i tanen, ba nonei e ranga nena u haharuei i taren me poeiena, “Ime temar tsuga ba mena noi e Satan e Satan?

²⁴ Te hiatatung pouts ria u katuun iahana töa han pan, ba han teka tema antunan tuol hatagala noi.

²⁵ Na te hiatatung pouts ria u katuun tara töa hun haposa ba u katuun teka tema antunan ka haniga lel has roi.

²⁶ Na tegi hiatatung pouts ia e Satan mere Satan, ime temar tuol hatagala uanoien, nonei e kapa nitöa nou.

²⁷ “E möa ta katuun tega antunan seia tara luma tara katuun a tagala bate na kopena a manka i tanen. E möa. Nonei ega kits kap mamin a katuun a tagala teka ba nonei tena töan luena a manka te kana i luma tara katuun teka.

²⁸ “Alia e hatei hamana koru ragou limiou, e Sunahan e tatei luba nanou a man markato a man omi hoboto te katoeier u katuun, na man ranga man omi has te katoe ren.

²⁹ Kaba esi te ranga homi nanou u Namnamei u Göagono tere Sunahan, e Sunahan ema antunan luba koru nanoi a markato a omi i tanen. Nonei e ka nitöa menou a markato a omi teka.” Nonei temar ranga uu e Iesu,

³⁰ taraha nori i ranga mam me poeier, “Nonei e ka mena a liliahanei a omi te seie nen.”

E tsinana e Iesu na u toulanen

³¹ U toulana e Iesu na e tsinanen i tuku me tuol ria ielesala tara luma be hala menari u ranga tere Iesu.

³² Ba u katuun u parpara ti gum hahisi e Iesu e poeier i tanen, “E tsinamölö na u toulamölö na u hahinamölö e ka ria ielesala, nori e ngöe riou lö.”

³³ Be Iesu e ranga palis ranen me poeiena, “Esi nonei e tsinar na u toular?”

³⁴ Ba nonei e hula tara uana turu katuun ti gum hahiseien me poeiena, “U katuun teka, nori u tsinar na u toular.

³⁵ Eresi te markato uaier turu ngil tere Sunahan, nori u toular na u hahinar na u tsinar.”