U Bulungana u Niga tere Iesu Kristo te kolotein e Mak 2 - U Bulunagana U Niga

E Iesu e kato haniga poutsi a katuun a matekata

¹ U lahisa u lan e la hakapa, ba u katuun e hengo naier te ka uaien i han.

^2-3 Bu katuun u parpara koru emi gonor ba luma e saputu nitöana, a matana tamana has e möa ta töa ta makum tega ski. Tara pöata te habulungana naia e Iesu u bulungana tere Sunahan, ba tohats a katuun e söate rima a töa katuun a matekata.

⁴ A mamana makum e saputu koru tara katuun ba tohats a katuun teka ema antunan söata menarien tere Iesu. Ba nori ena luba ner a töa makum tara luma i pungana te matina ia tere Iesu. Pöata ti kato hakapeien a tabutu, ba nori e hakouler a katuun te opöia tara pöapöa.

⁵ Pöata te tareia e Iesu u nihamana i taren ba nonei e poeiena tara katuun a matekata, “A tsi pien, a man markato a man omi i tamölö e luba hakapa na lila.”

^6-7 A man tson hihatuts tara Lo i gum has ba nori e hakats tuun hasir me poeier, “E ha koruna ba katuun teka temar ranga uana teka? Nonei e katsin gulena a nitsunono tere Sunahan? E möa ta töa ta katuun tega tatei luban a man markato a man omi, e Sunahan puku lasi a töa te antunana.”

⁸ E Iesu e atei sil hakapi u hakats turu katuun teka ba nonei poeiena i taren, “Taraha tsiponi ba limiou te ka memiou u mar hakats teka i tori milimiou?

⁹ Alia go mar ranga uu ime tara katuun a matekata? ‘A man kato homi i tamölö e luba hakapa nalila?’ Tsi, alia go mar ranga uu, ‘Alö go takei bate söatem a holholasa i tamölö bate tataalam?’ U saha u mar ranga te hahan kana?

^10-11 Ba limiou te atei sile miou, alia tu butun Katunuma e ka megu a nitagala i puta tego luba has menai lia a man markato a man omi.” Be Iesu e ranga mena a katuun a matekata me poeiena, “Alia e ranga megou lö, takei balö te söatem a holholasa i tamölö ba lö te lam i han.”

¹² Ba katuun teka e takeina me söatena a pöapöa i tanen i matar u katuun hoboto me lana. Ba u katuun e asingoto korur me soloseier e Sunahan me poeier, “Ara ima mala tarei ta ka tego markato uu teka!”

E Iesu e ngöi e Livai

¹³ Be Iesu e la pouts uana i kotolana i rehina Ramun i Galili bu katuun hoboto e la uaier i tanen ba nonei e hihatutsna i taren.

¹⁴ Pöata te tataalaia e Iesu ba nonei e tarena a katuun a lulu takis, a solonen e Livai a pien tere Alpius, nonei e gum ia tara luman takis i tanen bate kuina. Be Iesu e poeiena i tanen, “Kukutie moulia.” Be Livai e takeina me la gono menen.

¹⁵ Be Iesu ena gumna i luma tere Livai me nou gono meraiena u katuun u lulu takis na u katuun ti roron kato homi. A para a mar katuun teka ti kukuti e Iesu. U aposol tere Iesu i ka gono has meraien.

¹⁶ A pöata ti tareia u tson hihatuts tara Lo (ti ngörai u Parasi) e Iesu e nou gono mer u katuun u omi na u katuun ti lului a takis, ba nori e rangata raier u katunun tsitsilo i tanen, “Taraha tsiponi be Iesu te nou gono meraiena u katuun te lulueier a takis na palair u katuun u omi?”

¹⁷ E Iesu e hengo ti rangata uaien ba nonei e poeiena, “U katuun tema ka meri ta siki ema antunan la uari tara dokta. E möa. U katuun lasi te ka mer a siki te la uaier tere dokta. Alia uma la sile mei tegomi ngö merai u katuun u niga. E möa. Alia u la silema tegomi ngö merai u katuun u omi.”

A markato te agono menari a kannou

¹⁸ E Jon na u katunun tsitsilo i tanen na u Parasi i agonein a kannou. Ba palair u katuun emi rangater e Iesu me poeier, “E hana bu katunun tsitsilo tere Jon na u katunun tsitsilo turu Parasi te agono ner a kannou, ba u katunun tsitsilo i tamölö tema agonori?”

¹⁹ Be Iesu e poeiena i taren, “Tara pöata te katoeria a hitöl, ba tson te katsin hitölina te kana, a pala tara tson ema tatei agonori. E möa. Tara pöata te ka noana a tson te katsin hitöluna tara kannou, a pala tara tson tema antunan agonoroi.

²⁰ Kaba te luba tala naroua a tson te katsin hitöluna, ba pala i tanen te töan agono riou nonei tara pöata.”

E Iesu e haharuein u hihatutsuna i manasa na u hihatuts u tsimus

²¹ Be Iesu e poeiena, “E möa ta katuun tega tatei halakopeia a tsi makumun labalaba ats tsimus tega tupu kap menaien a tabutu turu labalaba u toutounei. Te markato tala uanen teka ba pöata te galuse rien, bu labalaba u tsimus te roropitsina bate takiis ba nena a makumun labalaba a toutounei, ba tabutu te pan koru lel talana.

²² Na e möa has ta katuun tega tatei osuleia u uain u tsimus tara pikpiköna meme a toutounei. Te markato tala uanoen teka ba nitagala turu uain u tsimus te pan susuluna bate kato buteiena a pikpiköna meme a toutounei tema talas nei, ba uain na kaan o osul te omi hobotor. A katuun e tatei osulena u uain u tsimus tara kaan osul a tsimus.”

U rarangana turu Lan u Göagono turu Jiu

²³ Turu töa u Lan u Göagono turu Jiu e Iesu e tataala silaia i gusuna a kuin wit. U katunun tsitsilo i tanen i la gono meien ba nori e patsikeier a hua turu wit.

²⁴ Ba u Parasi e poeier tere Iesu, “Hengo, a Lo i tarara e ranga hapiou nena tegi kato menai u katunun tsitsilo i tamölö a ka teka turu Lan u Göagono.”

²⁵ Be Iesu e ranga palis ranen me poeiena, “Alimiou go mala rit hanigeiam a ka te katoe e Devit e tuburara a kingina i manasa. Nori na pal katuun i tanen i möa ta kannou ba nori e besir.

²⁶ Ba nori ena tasu ria tara luma tere Sunahan mena noueier a beret a göagono te kaia i matana e Sunahan. A ka teka e butuia tara pöata te tsunono pania e Abiatar turu pris. Tara Lo i tarara u pris puku te tatei noueier a beret teka. Kaba e Devit e noueien me hala has rena a pal katuun i tanen.”

²⁷ Be Iesu e poeiena i taren, “E Sunahan ema kato sile ii a katuun ega kukute u Lan u Göagono. E möa. Nonei e haka bei u Lan u Göagono ega taguhir u katuun.

²⁸ Na lia tu butun Katunuma e pan bala negu u Lan u Göagono.”