U Bulungana u Niga tere Iesu Kristo te kolotein e Mak 16 - U Bulunagana U Niga

E Iesu e takei poutsia tara tou mate i tanen

¹ Pöata te kapaia u Lan u Göagono, bere Maria Matalina mere Salome ne Maria e tsinana e Jemis e holer a man uapi a man masi hanigantöa tegina sapeien u tuenrei tere Iesu.

² Ba tara bongbong koru turu lan tutuun turu wik, a pitala e butu hakapa noama, ba nori e la uaier tara kioun mate.

³ Nori i hiarangrangata me poeier, “Esi tena hategele ba beranoi ra a hatu te tupena a matana kiou?”

⁴ Pöata ti tara len ba nori e tarer, a hatu pan koru i hategele ba hakapein.

⁵ Pöata ti tasuien tara kioun mate ba nori e tarer a töa tson a hitots te kamei u hasobö u hiakan töa e gumia tara pal matou. Ba nori e asingotor me matout korur.

⁶ Kaba nonei e ranga meraien me poeiena, “Alimiou goma asingotomi na goma matoutmi. Alimiou e sakiemiou e Iesu na i Nasaret ti nila naia tara kuruse? Nonei ema ka lel nei. Nonei e takei pouts hakapa lala. Taraiam tara makum ti hopöeien.

⁷ Kaba la mula, na hatei raiam u katunun tsitsilo i tanen na e Pita, u raranga teka: Nonei e mam ranou limiou i Galili, alimiou ena tare mouen i Galili, temar hatei noahas meraien limiou.”

⁸ Ba nori e lakasar me bus ba ner a kioun mate, taraha nori i asingoto koru me toltololo mer a nimatout. Ba nori ema hateieri ta töa ta katuun, taraha nori i matout koru.

E Iesu e butuia tere Maria Matalina

⁹ I murina te takeia e Iesu tara tou mate i tanen, turu lan tutuun turu wik, ba nonei e butu mam na tere Maria Matalina, a tahol te tsuga ba mam naien a tohit a liliahanei a omi.

¹⁰ Be Maria e la uana turu katuun ti roron ka gono mei e Iesu i hahuri bate taber.

¹¹ Ba nonei e poeiena i taren, “E Iesu e töatöana, alia e tare gumen.” Pöata ti hengoeien a ka teka ba nori e hahamana naren.

E Iesu e butuia tara huol a katunun tsitsilo

¹² Ba i murinen ba nonei e butuna tara huol a katunun tsitsilo ti tataala uen tara man makumun kui, kaba peisanen e butu halhal koru.

¹³ Ba nori e kopis poutsur mena hatei raier a palai ti roron ka gono meien. Kaba nori i hahamana has raien.

E Iesu e butuia tara maloto na töa a katunun tsitsilo

¹⁴ Ba i murinen be Iesu e butuna tara maloto na töa a katunun tsitsilo tara pöata ti nou ien. Ba nonei e ranga hatagala mera nen, taraha nori ima hamana korui, nori i hahamaneir u katuun ti tareien i murina te takei poutsien.

¹⁵ Ba nonei e poeiena i taren, “La uaiam turu han hoboto i puta batena rarariemiou u Bulungana u Niga turu katuun hoboto.

¹⁶ A katuun te hamanana na te lueiena a baptais te lu poutse riou romana. Kaba a katuun tema hamana nei e rus noa romana turu Kout tere Sunahan.

¹⁷ Na u katuun te hamanar e katoeier romana a man mirakol tara nitagala tere Sunahan te markato uana teka: nori e poeier romana a solor bate tsuga ba raier u liliahanei u omi. Na nori e ranga ria romana tara man ranga man tsimus tema atei sileri.

¹⁸ Na te pile naroien a kökötsi ba nori te ueier u ramun te kato hamatiena a katuun, nori ema antunan mate roi. Nori e hatakoperoua a limaren turu katuun te ka mer a siki ba nori te niga pouts riou.”

E Sunahan e lu pouts menai e Iesu i Kolö

¹⁹ A Tsunono e Iesu e ranga hakapa meraien be Sunahan e lu pouts mena neien i Kolö, tena gum ien tara pal matou tere Sunahan.

²⁰ Bu katunun tsitsilo e lar mena habulungana ner U Bulungana na tara Nitöatöa turu han hoboto. Ba Tsunono e kato sila nana a man mirakol i taren te harötein a man raranga i taren e manana.