U Bulungana u Niga tere Iesu Kristo te kolotein e Mak 15 - U Bulunagana U Niga

E Iesu e kaia turu kout tere Pailat a gamman

¹ Tara bongbong koru ba u pris pan na pal kapan na u tson hihatuts tara Lo na u katuun hoboto turu Kout Pan e hagumur. Ba nori e kits kap ner e Iesu me la meren mena hala narien tere Pailat a gamman.

² Be Pailat e rangate nen, “Alö a king turu Jiu?” Be Iesu e ranga palise nen me poeiena, “Alö peisa temar ranga uaiem teka.”

³ Bu pris pan e kout meri e Iesu a mamanaka a parpara.

⁴ Be Pailat e rangata lele nen, “Alö ema antunan ranga palismi? Alö ema hengoemi a mamanaka teka te kout merien lö?”

⁵ E Pailat e asingoto koruni tema palis mei e Iesu tu töa tu ranga.

E Pailat e halani e Iesu egina kato hamati

⁶ Tara pöata tara kannouna turu Paska, e Pailat e roron hapuresi a töa karabus ti ngil u katuun.

⁷ Tara pöata teka a katuun ti ngöei e Barabas e kaia tara karabus gono meir u katuun ti hiatatung gono mei a gamman na ti hihipuli tara pöata tara pula.

⁸ Ba u katuun ena gono ria tere Pailat me rangate ren tego markato uen te roron markato uaien i taren.

⁹ Be Pailat e rangata ranen me poeiena, “Alimiou e ngilemiou alia ego hapurese berai limiou a king turu Jiu?”

¹⁰ Nonei e atei sil u pris pan i hala mei e Iesu i tanen taraha nori i hiomi.

¹¹ Kaba u pris pan i tuker u katuun egi rangata sil hoboti tego hapurese menai e Pailat e Barabas pepeisa.

¹² Be Pailat e rangata lel ranen, “Ime te markato menagoi lia a katuun te ngöe milimiou a king turu Jiu?”

¹³ Ba nori e ku pouts uaier i tanen “Nila namia tara kuruse!”

¹⁴ Be Pailat e rangata ranen, “E hana? A saha ka a omi te katoeien?” Kaba nori i ku hapan koru noa lahas, “Nila namia tara kuruse!”

¹⁵ E Pailat e ngilin hamomolei a toriren me hapurese ba bera neien e Barabas. Ba nonei e halahus nena e Iesu me hala menaneien i taren tegina nila menaien tara kuruse.

U soldia i hahakosia tere Iesu

¹⁶ Bu soldia e lu menari e Iesu i pal matana luma tara gamman (a makum teka i ngöei Peretorium). Ba nori e ngö gögono rer u katuun ti ka hoboto mei u töa puku u hakats.

¹⁷ Ba nori e hasogeri e Iesu u hasobö u rörö u ngahangaha te tara here ii u hasobö tara king, me hil haperperere ier a kolits a hihitoka me hake rien i bakunen.

¹⁸ Ba nori e hohou hatsunone ren me poeier, “Solosei iam a king turu Jiu.”

¹⁹ Ba nori e singsingateri a bakunen u nga me kahuse ren me hatukun uaier i tanen.

²⁰ Pöata ti hahakos hakapa naien e Iesu, ba nori e his ba pouts ner u hasobö u rörö me hasogo poutse rien u hasobö i tanen. Ba nori e lakasa meren tegina nila menaien tara kuruse.

E Iesu i nila naia tara kuruse

²¹ Nori i tupali a töa toun Sairini, a solonen e Saimon e tamar ere Aleksenda mere Rupas. Ba nori e lue ren me hatöerien a kuruse tere Iesu.

²² Ba nori e la merumei e Iesu tara makum ti ngöei i Golgota (u ranga teka e poeiena “A Makum turu Lakö”).

²³ Ba nori e hale rien u uain ti sohalei u mer, kaba e Iesu ema ueien.

²⁴ Ba nori e nila narien tara kuruse me satu siler esi tego lui tu töa tu hasobö tara hasobö tere Iesu.

²⁵ Nori i nila naien tara kuruse tara 9 kilok tara bongbong.

²⁶ U raranga ti nila nai i bakuna a kuruse, nonei has u ranga ti kout meien te poeiena: A King turu Jiu.

^27-28 E Iesu i hakute gono mei a huol a kopkop tara man kuruse i rehina e Iesu, a töa tara pal matou na tai tara pal keruka.

²⁹ Na u katuun ti silaia i sukusuku i hahakosiin e Iesu me tsibtsibil ner a bakuren me poeier, “Bara, alö nonei tego kato lupi a Luman Lotu Pan bate hatakei pouts memien u topisa u lan.

³⁰ Alö go taguhu talei a peisamölö bate koul ba namuma a kuruse.”

³¹ U pris pan na u tson hihatuts tara Lo i kato has uu iesana me hia raranga poutsur ti hahakos menaien e Iesu me poeier, “Nonei e taguhu hanigeir a palair u katuun, kaba nonei ema antunan taguhu tsipon nanei a peisanen.

³² E Mesaia a Kingina i Israel ego koul talama tara kuruse bara te tare ren bate hamane ren.” Na huol a katuun ti nila gono mei e Iesu tara man kuruse i taren i hahakos has naien.

E Iesu e mate

³³ Tara 12 kilok tara söasa, bu kuhil e kopo kap nena a man han hoboto e antunaia tara 3 kilok.

³⁴ Ba tara 3 kilok be Iesu e ku hapan koruna me poeiena, “Eloi, Eloi, lama sabaktani?” U raranga teka e poeiena, “O Sunahan i tar, Sunahan i tar, aha te laba sile mulei lö alia?”

³⁵ Ba palaina u katuun ti tuol ia i sukusuku e hengoe ren me poeier, “Hengoiam. Nonei e ngöeiena e Ilaitsa.”

³⁶ Ba töa katuun e piatana me hapölisena u spants turu uain u melil me hake nen turu nga. Ba nonei e hale neien e Iesu tego ous menaien me poeiena, “Ka buiam, bara te tarera tega la uama e Ilaitsa batemi hakoule nen tara kuruse.”

³⁷ Be Iesu e ku hapanina me matena.

³⁸ Bu labalaba pan te kuteia i Luman Lotu Pan e takiis kata nitöana i hagus me la nitöa uana i puta.

³⁹ Ba tsunono turu soldia te tuol ia i matana e Iesu e tari temar mate uaien me poeiena, “A katuun teka a Pien Tson hamana koru tere Sunahan.”

⁴⁰ E ka has mei a touhaliou ti tara ma i lehana, ere Maria Matalina mere Salome ne Maria e tsinana e Jemis a tetenei ne Josep.

⁴¹ Nori i lala gono mei e Iesu i Galili me taguhe ren. Na palair a touhaliou u para ti la gono meien i Jerusalem i ka gono has meien.

E Iesu i hongeia tara kiou

⁴² Na turu lan teka u katuun i kato taatago mami a mamanaka, taraha i mahö u Lan u Göagono turu Jiu. A ka e lahibong hamanasa, be Josepina i Arimatia e tukuna.

⁴³ Nonei a katununa turu Kout Pan te ka mei a solo a niga, e hahaloso hasi a Nipepeito tere Sunahan. E Josep ema matout ii me la uana tere Pailat mena rangata nena u tuenrei tere Iesu.

⁴⁴ E Pailat e hula hakats me hangö ne lala a tsunono pan turu soldia me rangatenen tega solon mate uala e Iesu.

⁴⁵ Pöata te hengo naia e Pailat te mate uu e Iesu tara tsunono turu soldia, ba nonei e hanigana tega hakoul menai e Josep u tuenrei tere Iesu.

⁴⁶ Be Josep ena holena u labalaban kopo mena hakoulena u tuenrei tere Iesu me pitse neien u labalaba mena hopöe nen iahana kioun mate ti kui ia turu lapo. Ba nonei e hategeleiena a hatu pan me tupe neien a matana a kioun mate.

⁴⁷ E Maria Matalina na e Maria e tsinana e Josep i tara ti hopöeia e Iesu.