U Bulungana u Niga tere Iesu Kristo te kolotein e Mak 14 - U Bulunagana U Niga

A pal kapan i korupaköni e Iesu

¹ U huol u lan patu ba kannouna turu Paska na u lan pan tara kannouna tara Beret te möa ta is te butuna. U pris pan na u tson hihatuts tara Lo i sake ta maroro tegi mar pile kap hamous menaien e Iesu bate atung hamatie ren.

² Ba nori e poeier, “Ara gima tatei katoeien tara man lan pan turu lotu, taraha u katuun e namots hiatatungur.”

A tahol e kis naia u uapi u soksoka haniga i bakuna e Iesu

³ Pöata te kaia e Iesu i Betani tara luma tere Saimon te ka mei a toba i manasa. Ba pöata ti nouien ba töa tahol e tasu menama a botolo ti katoeia a hatu a kankanaha nitöa e kamei u uapi u masi na u soka haniga koru, na u uapi teka i hole ii a moni pan koru na i katoe ii u nat. Ba nonei e buteiena a botolo me tsu nena u uapi u masi na u soka hanigantöa teka i bakuna e Iesu.

⁴ Kaba a palair u katuun ti ka e hiaraharahar me poeier, “E hana ba nonei te hakapa pinopinoena u uapi u masi teka?

⁵ U uapi teka e antunan hahol naria tara moni te saluhena 300 denarius, ba moni tena tatei hala rari u katuun ti möa ta ka.” Ba nori e raharaheier a tahol.

⁶ Kaba e Iesu e pei, “Haka ba naiam. Alimiou e ngena silemien aha? Nonei e katoe lala a ka a niga koru i tar.

⁷ U katuun ti möa ta moni e ka gono nitöa mera riou limiou, ba limiou te tatei taguhu ramen tara pöata te ngil mia limiou. Kaba lia ema ka gono nitöa mera goi limiou.

⁸ A tahol teka e katoe lala a ka te antunan kato nanen. Nonei e tsu mammam nelala u uapi u masi hanigantöa i tuenreir ba lia tena toan kaho nariou romana.

⁹ Alia e hatei hamana koru ragou limiou, tara mamana han hoboto i puta tena habulungana naroua u Bulungana u Niga, nori ena rarare riou a tahol teka bu katuun te hakats nariou a ka a niga teka te katoe lalen.”

E Judas e hanigein tego haröto menaien e Iesu turu pakö i tanen

¹⁰ E Judas Iskariot, a töa tara maloto na huol a katunun tsitsilo, e la uu turu pris pan, taraha nonei ena katsin harötein e Iesu i taren.

¹¹ Ba nori e sasaala koru meier ti hengo menai a ka teka me ranga hamana koru ner tegi hala menaien ta moni. Be Judas e tanian sake nena ta maroro tegona haröto menaien e Iesu turu katuun teka.

A kannouna turu Paska

¹² Turu lan tutuun tara pöata te noue ria a beret te möa ta is, u lan te atung raria u tunan sipsip tara kannouna turu Paska, ba u katunun tsitsilo e rangater e Iesu, “Alö e ngilem alam ego la uu ime batena hamatsköeiam a kannou i tamölö turu Paska?”

¹³ Be Iesu e tula nena a huol a katunun tsitsilo i tanen me poeiena i taren, “La uaiam iahana taun, ba limiou tena tupale mou a töa tson te söatena a tabeli ramun. Kukute iam

¹⁴ ba ime tena tasu nouen tasu hasiam balimiou tena rangate mou a tson tere na luma, ‘A Tson Hihatuts e rangatanama, Ime te kana a rum i tar, te nou gono meragoua lia u katunun tsitsilo i tar a kannouna turu Paska?’

¹⁵ Nonei ena haröto ranoui limiou a töa rum pan iasa te hamatskö hakape lila. Hamatskö bera meira a makum teka tena nou rouara.”

¹⁶ Ba huol a katunun tsitsilo e lar me lauar tara taun, nori ina sabi a mamanaka temar ranga uama e Iesu. Ba nori e kato hamatsköeier a kannouna turu Paska.

¹⁷ A pöata te lahibong ia a ka be Iesu e la gono merena a maloto na huol a katunun tsitsilo i tanen.

¹⁸ Na tara pöata ti gumien bate nour be Iesu e poeiena, “Alia e hatei hamana koru ragou limiou, a töa i tamilimiou ena haröto nanoua lia turu pakö i tar, a katuun teka e nou gono has menou lia.”

¹⁹ Ba u katunun tsitsilo e tokur me rangate ren, “Ema lia nei?”

²⁰ Be Iesu e ranga palisina, “Nonei a töa tara maloto na huol a katuun teka te habu gono melalei lia a beret tara töa pelete.

²¹ Alia tu butun Katunuma emar mate uagou te ranga uu Buku u Göagono. Kaba a niomi pan koru tara katuun teka te haröto nanoua lia turu pakö i tar. A katuun teka, e niga bala nena nonei gima mala pose ii.”

A Komunio tutuun

²² Na tara pöata ti nouien, be Iesu e luena a beret me haniga uana tere Sunahan me posepose nen me hala raneien. Ba nonei e poeiena, “Lueiam. Nonei u tuenrei i tar teka.”

²³ Ba nonei e lu lelena a kap uain me haniga uana tere Sunahan me hala raneien, ba nori e ua hoboto ria i tanen.

²⁴ Ba e Iesu e poeiena, “Nonei u rahatsing i tar teka te kato hatagale nou u rangan kits u tsimus tere Sunahan te tatsu beranou u katuun u parpara.

²⁵ Alia e hatei hamana koru ragou limiou, alia ema tatei ua lele goi u uain e antunana tara pöata te ue gia romana lia u uain u tsimus tara Nipepeito tere Sunahan.”

²⁶ Ba pöata ti köma hakapeien u hetsina turu lotu, ba nori e la uaier turu Pokus tara Ruein Olip.

E Iesu e hatei mamin tego holis menaien e Pita

²⁷ Be Iesu e poeiena i taren, “Alimiou hoboto e bus ba namou lia, taraha i kolotein: ‘Alia e atunge gou romana a katunun taratarakap turu sipsip ba u sipsip te bus kalakalar romana.’

²⁸ “Kaba i murina te hatakei poutse noua lia e Sunahan tara tou mate i tar, ba lia te mam ragou limiou i Galili.”

²⁹ Be Pita e poeiena i tanen, “U katuun hoboto teka e laba nariou lö romana, kaba lia ema antunan laba koru nagou ii lö.”

³⁰ Be Iesu e poeiena tere Pita, “Alia e hatei hamana korue goulö, i mam te kekeretskö hahuol noua a keriou i bong teka, ba lö te holis namou tego atei sil menai lö alia tara topisa pöata.”

³¹ Be Pita e ranga palis hatagala koruna, “Alia ema antunan holis koru nagoi lö, noahasina tena mate gono megoua lia alö.” Bu katunun tsitsilo emar ranga hoboto has uaier temar ranga uu e Pita.

E Iesu e singo uu tere Sunahan i Getsemani

³² Nori i la uu tara makum ti ngöe ii Getsemani, be Iesu e poeiena turu katunun tsitsilo i tanen, “Gum mia teka ba lia tena singo uagu tere Sunahan.”

³³ Ba nonei e la merena ere Pita mere Jemis na e Jon, a torinen ema niga koru ii ne toku koru.

³⁴ Ba nonei e poeiena i taren, “A peisar e tiama koru mena a nitaatagi, alia e katsin mate hakapagu. Kaka bumia teka bate taratara kap miou.”

³⁵ Ba nonei e gamon la halehanana me tuhopö nena turu tsiktsiki. Ba nonei e singo uana tere Sunahan tego antuna uaien bate hapiou nena tega butu uu a pöata tara tou kamits i tanen.

³⁶ Ba nonei e poeiena, “O Tamar, alö e antunam tara mamanaka hoboto, luba nei lia a kamits teka. Kaba lö goma kato ua ii turu ngil i tar. Alö go markato uu turu ngil i tamölö.”

³⁷ Ba nonei e hakopis nama bemi saberena a topisa a katunun tsitsilo i tanen bate sohor. Ba nonei e poeiena tere Pita, “O Saimon, alö e sohom? Alö ema antunan kalata lase mi ta töa ta aua?

³⁸ Tara kap iam bate singo uamiou tere Sunahan. Te möa nen, bu hiamus u omi temi butu roua i tamilimiou U namnamei i tamilimiou e ngilina, kaba u tuenrei ema tagala nei.”

³⁹ Ba nonei e la pouts lenina mena mar singo pon uana temar singo mam has uamen.

⁴⁰ Ba pöata te la pouts pon men nonei emi sabe noahas raien ba nori te sohor, taraha nori i topi koru. Ba nori ema atei sileri aha tegi poeien i tanen.

⁴¹ Ba pöata te kopis hatopisa men, ba nonei e poeiena i taren, “Alimiou e soho noahas miou na e husa noahas miou? E noa talana. A pöata e butu hakapa. Röto mula. Alia tu butun Katunuma e hala tala naroua tara nitagala turu katuun u omi.

⁴² Takei iam, bara te lara. Rötoiam, a katuun te haröto nanoua lia turu pakö i tar e tuku hakapa.”

Nori i pile kapiin e Iesu

⁴³ E Iesu e ranga noahas be Judas a töa tara maloto na huol a katunun tsitsilo i tanen te tukuna. Nonei e peigi rema u katuun u parpara koru ti söatema a man kilatan hiatatung na man baru. U pris pan na u tson hihatuts tara Lo na pal kapan ti tula ramen.

⁴⁴ A katuun tena haröto nanou e Iesu e hatei mam hakapein a ka tena katoe nouen. “A katuun tena mutsi nagoua lia i abuabunen, nonei a katuun te ngilin lu nami limiou. Pile kap naiam ba limiou te peige men bate tara kap haniga namen.”

⁴⁵ Bate tukuia e Judas ba nonei e la uana tere Iesu me poeiena, “Tson Hihatuts.” Ba nonei e mutsi nanen i abuabunen.

⁴⁶ Ba nori e pile naren ba e pile kap hakarapoto naren.

⁴⁷ Kaba töa katuun te tuol hasukusuku e lousi u kilatan hiatatung i tanen me ngats harusena a talingana a katunun kukui puku turu pris pan.

⁴⁸ Be Iesu e rangata ranen, “Alimiou e kato here koru na milia a katuun a kopkop balimiou te söate muma a man kilatan hiatatung na man baru tegomi pile kap mena milimiou alia?

⁴⁹ Turu mamanu lan alia u ka gono meraiou limiou tara Luman Lotu Pan bate hihatutsugu, ba limiou tema pile kap nami lia. Kaba a ka teka e butu silena tega mana uu Buku u Göagono.”

⁵⁰ U katunun tsitsilo hoboto i tanen i laba naien me busur.

^51-52 A töa hitots te kamei u obe tuun e kukuti e Iesu, ba nori e pile kap naren kaba nonei e bus me bus mena u beloso.

E Iesu e tuol ia i matar u Jiu

⁵³ Nori i lu menai e Iesu tara tsunono pan turu pris, bu pris pan na pal kapan na u tson hihatuts tara Lo e gono hobotor.

⁵⁴ E Pita e kukute halehanama me la nitöa uana iahana makumun roro tara tsunono pan turu pris, ba nonei ena gum gono merena u tson taratarakap me meimeina turu tula.

⁵⁵ U pris pan na u katuun hoboto ti kaia turu Kout Pan i sake tu ranga tegi kout mei e Iesu bate atung hamateier. Kaba nori ima sabiei ta ka.

⁵⁶ U katuun u parpara ti gamoein e Iesu, kaba man ranga i taren ema boei ii u töa.

^57-58 Ba palair u katuun e taker me gamo ner e Iesu me poeier, “Alam u hengoe nonei e pei, ‘Alia e kato lupegou romana a luma tere Sunahan teka ti kui u katuun, ba i murina u topisa u lan balia te hatakei poutse gouen kaba ema limana a katuun nei te kuie nouen.’”

⁵⁹ Kaba a man ranga i taren ema bou hase ii u töa.

⁶⁰ Ba tsunono pan turu pris e tuolna i mataren hoboto me rangatena e Iesu, “Alö ema ranga palis memi aha? Aha nonei te kout merilö u katuun teka?”

⁶¹ Kaba e Iesu e kakamoto mema ranga nei. Ba tsunono pan turu pris e rangata lele nen, “Alö e Mesaia, a Pien Tson tere Sunahan?”

⁶² Be Iesu e poeiena, “Nonei alia. Alimiou e tare mou romana Alia tu butun Katunuma e gum goua tara pal matou tere Sunahan te tagala koruna, ba lia te osa guma romana turu köasi na i kolö.”

⁶³ Ba tsunono pan turu pris e kiisena u hasobö i tanen me poeiena, “Ara ema tatei ngö lele roi ta katuun tega kout gono meien.

⁶⁴ Alimiou e hengo hakape mula temar ranga mela leien e Sunahan. Nonei u ranga u omi koru teka. Alimiou e peimiou aha?” Ba nori e ranga hobotor, “Nonei egi atung hamati.”

⁶⁵ Ba palai e tanian kahuseier e Iesu me kits kap ner a matanen me muke ren. Ba nori e poeier i tanen, “Poa talei esi te muke lalou lö.” U tson taratarakap i lu haseien me atunge ren.

E Pita e holisin e Iesu

⁶⁶ Pöata te kaia e Pita i puta tara makumun roro, ba töa taholun kui tara tsunono pan turu pris e la nama.

⁶⁷ Pöata te tareien e Pita te meimeien ba nonei e tara tötose nen me poeiena, “Alö u ka gono has mei e Iesu na i Nasaret.”

⁶⁸ Kaba e Pita e holis me poeiena, “Alia ema atei silegi a ka te ranga nemu lö.” Be Pita e lauana tara tamana tara ololo, ba keriou e kekeretsköna.

⁶⁹ Kaba a taholun kui e tareien me ranga lel na turu katuun ti tuol ia i sukusuku me poeiena, “Nonei a töa i taren.”

⁷⁰ Kaba e Pita e holis lel has. Kaba ema lehana ii ba u katuun ti tuol ia i sukusuku e poeier tere Pita, “U mana koru alö a töa i taren, taraha alö has a katununa i Galili.”

⁷¹ Ba nonei e poeiena, “E Sunahan e tatei hahune noulia te goma ranga hamana uai lia. Alia ema atei silegi a katuun te ranga nami limiou.”

⁷² Tara pöata koru teka ba keriou a tson e kekeretskö hahuoluna. Be Pita e töan hakats pouts tala nena temar ranga memeien e Iesu, “I mam te kekeretskö hahuol noua a keriou alö e holis topisa namou lia.” Be Pita e tabe koru lasina.