U Bulungana u Niga tere Iesu Kristo te kolotein e Mak 11 - U Bulunagana U Niga

E Iesu e tukuia i Jerusalem me here nei a king

^1-2 Pöata ti la hasukusuku men i Jerusalem i Betpats na i Betani tara tsi pokus te ngöeri u Pokus tara Ruein Olip. Be Iesu e tula nena a huol a katunun tsitsilo i tanen me poeiena i taren, “La mula tara han te ka nama ili, ba pöata tena butu moa limiou i han ba limiou tena tare mou a tunan rongki a hitots te kits na lila na ema mala osa noaria ba limiou te purese men bate la memumen.

³ Tena rangata noua ta katuun, ba limiou te hateie men, A Tsunono e ngile namen, nonei ena hala pouts nenamen romana.”

^4-5 Ba nori e lar mena sabier a rongki ti kits naia tara tamana i rehina kalana. Ba pöata ti pureseien bu katuun ti tuol ia i sukusuku e rangata raren, “Aha te purese sile milimiou a rongki?”

⁶ Ba nori hatei rarien temar ranga uama e Iesu. Bu katuun e hanigar ba nori e lueren.

⁷ Ba nori e las menari a rongki tere Iesu me haholaseier a man hasobö a man ngahangaha i taren tara rongki, be Iesu e osana i tanen.

⁸ U katuun u parpara ti haholasi a man hasobö a man ngahangaha i taren tara kalana, ba palai e ngatse rima a man kalan ruei memi haholase rien i kalana.

⁹ U katuun ti mam na u katuun has ti kutema i ku hoboto bate poeier, “Soloseiam! Hatsunoneiam a katuun te la nama tara solona a Tsunono!

¹⁰ E Sunahan e kalalena romana a katuun temar pepeito kap uana romana temar pepeito kap uu e tuburara e Devit i manasa. Solosei korue iam e Sunahan!”

¹¹ Be Iesu ena tuku na i Jerusalem mena tasuna i Luman Lotu Pan. Pöata te tara hakapaien a mamanaka ba nonei e la pouts merena a maloto na huol a katunun tsitsilo i tanen. A ka e lahi hakapa ba nori e kopis pouts uaier i Betani.

E Iesu e ranga homin u ruein fik

¹² Turu taina u lan, ti la pouts men i Betani, e Iesu e bes.

¹³ Nonei e tare ma u töa u ruei te ngöeri u fik i lehana e tanian hulung pouts ba nonei ena tarena tego ka menaien ta hua. Pöata tena tukuien turu ruei teka, nonei e tari a kala puku, taraha a pöata tega hua meien ema butu noa ii.

¹⁴ Be Iesu e poeiena turu ruei teka, “E möa nou ta töa ta katuun tego nouia i tamölö.” Na u katunun tsitsilo i tanen i hengo a ka te ranga naien.

E Iesu e kute ba ra ii u katuun a Luman Lotu Pan

¹⁵ Nori i tukuia i Jerusalem be Iesu e tasuna tara Luman Lotu Pan be tanian kute rena u katuun ti hihol na ti hahol ia i Luman Lotu Pan. Ba nonei e tula baba rena a man tebol turu katuun ti hahapalisir u moni na e pita ba hasir a man gumgum turu katuun ti haholin u kulu.

¹⁶ Na nonei e hapiou hasir u katuun ti katsin sila meia a man kaan hahol i taren iahana Luman Lotu Pan.

¹⁷ Ba nonei e hatuts rena u katuun me poeiena, “I koloto hasiin, ‘A luma i tar e ngöe roi a luma tena singo ria ra.’ “Kaba alimiou e kato here namien a kiou turu kopkop.”

¹⁸ Pöata ti hengoia u pris pan na u tson hihatuts tara Lo, nori i sakesake noahasi ta maroro tegi mar atung hamate menaien e Iesu. Nori i matouteien, taraha u katuun hoboto i asingotein a manka te hihatuts naien.

¹⁹ Ba tara lahibong be Iesu na u katunun tsitsilo i tanen e laba ner a taun.

U hihatuts turu rueien fik te lango

²⁰ Tara bongbong, pöata ti la lel ien i kalana, ba nori e tareier nonei u ruei te ngöeri u fik e lango hakapan töa mena noana i polosonen.

²¹ Be Pita e hakats sabe nena nonei u ruei me poeiena tere Iesu, “Tson Hihatuts, tara! U ruei tu ranga homin lö e lango hakapa.”

²² Be Iesu e poeiena i taren, “Hamana mia tere Sunahan.

²³ Alia e hatei hamana koru ragou limiou, tego rangaia lö turu pokus teka, ‘takei balö te la uam i tasi,’ ba ka teka te butu hamana benoulö. Kaba a ka teka e butu hamana menou tegoma hula hakats uai lö.

²⁴ Na lia e ranga hamana koru meragou limiou, aha te rangata nemölö turu singo i tamölö tere Sunahan alö e lu hamane mouen.

²⁵ Pöata te tuol mialö bate singom, solopali a raharaha i tamölö tara tana katuun be Sunahan e Tamarara iasa koru te solopala hase nou a man markato a man omi i tamilimiou.

²⁶ Kaba tema solopale moi limiou a man markato a man omi tara taina katuun, be Tamamilimiou te kana i Kolö tema solopala hase noi a man markato a man omi i tamilimiou.”

A nitsunono tere Iesu e lama ime?

²⁷ Nori i tuku pouts lel ia i Jerusalem. Ba pöata te tataala laia e Iesu iahana Luman Lotu Pan, bu pris pan na u tson hihatuts tara Lo na pal kapan e la uarima i tanen.

²⁸ Ba nori e rangate ren, “Esi te hanigein tego kato menai lö a manka teka? Alö e kato memi a manka teka a nitsunono teresi?”

²⁹ Be Iesu e poeiena i taren, “Alia e rangata has ragoui limiou u töa u harangata. Te palise moien limiou, ba lia te töan hatei ragoui limiou esi te hale mei lia a nitsunono tego kato menai lia a manka teka.

³⁰ Pöata te baptais raia e Jon u katuun, nonei e ka mei a nitsunono tere Sunahan tsi tara katuun tuun? Ranga palise mumoulia.”

³¹ Ba nori e hihirangatsir me poeier, “Ime temar ranga uarou ra? Te pei rouara, ‘E Jon e ka mei a nitsunono tere Sunahan,’ be Iesu te peie nou, ‘Ga limiou ima hamana sile mi e Jon aha?’

³² Na te pei hase rouara, ‘E Jon e ka mei a nitsunono tara katuun tuun.’” Nori i matoutir u katuun, taraha u katuun hoboto i pei e Jon a propet hamana tere Sunahan.

³³ Ba nori e ranga paliseier e Iesu me poeier, “Alam ema atei mi.” Be Iesu e poeiena i taren, “Alia has ema hatei ragou ii limiou esi te hale mei lia a nitsunono tego kato mena ii lia a manka teka.”