Matiu 4 - U Bulunagana U Niga

E Satan e torohani e Iesu

¹ Tara pöata teka u Namnamei tere Sunahan e peigi menai e Iesu tara makum a palaka tegona torohana menaien e Satan.

² E Iesu ema nouei ta kannou e antunaia turu tohats u maloto u lan na u tohats u maloto a bong. Ba i murinen ba nonei e bes koruna.

³ Be Satan emi torohane nen me poeiena i tanen, “Tego Pien uu lö tere Sunahan, ba lö te rangam, bu hatu teka te palis uar tara beret.”

⁴ Kaba e Iesu e ranga palis uu i tanen me poeiena, “Turu Buku u Göagono tere Sunahan i koloto hasiin, ‘A beret peisa ema antunan hala nanei a nitöatöa tara katuun. E möa. A katuun te kukutiena a man raranga tere Sunahan nonei e luenou a nitöatöa.’”

⁵ Nonei e mar ranga uu teka, be Satan e lu mena neien tara taun i Jerusalem, mena hatuole nen iasa koru i pungana tara Luman Lotu Pan.

⁶ Ba nonei e poeiena tere Iesu, “Tego Pien uu lö tere Sunahan, ba lö te kurapa uam i puta. Taraha, turu Buku u Göagono i koloto hasiin, ‘E Sunahan e ranga mera nou u angelo i tanen tegi tara kap menaien lö. Na nori e pile sei nariou lö, ba u hatu tema tatei toke roi a mou mölö.’”

⁷ Be Iesu e ranga menen me poeiena, “Turu Buku u Göagono i koloto hasiin, ‘Alö goma torohanei a Tsunono. Nonei e Sunahan i tamölö.’”

⁸ Be Satan e lu mena neien turu töa u pokus iasa koru. Ba nonei e haröte neien a man han hoboto i puta na mamanaka a niga i taren.

⁹ Be Satan e poeiena tere Iesu, “Te hatukun moa lö bate hatsunono uaiem i tar, ba lia te hale goi lö a mamana han hoboto teka.”

¹⁰ Be Iesu e ranga menen me poeiena, “Satan, alö go laba naiou lia! Turu Buku u Göagono i koloto hasiin, ‘Alö go hatsunono uu tere Sunahan. Nonei puku a töa a Tsunono i tamölö tego kukuti lö.’”

¹¹ Be Satan e laba nanen. Ba u angelo e la rima memi taguheier e Iesu.

E Iesu e hatanieia a toukui i tanen i Galili

¹² Pöata te hengo naia e Iesu u raranga ti haka menai e Jon tara karabus, ba nonei e lana i Galili.

¹³ Ba nonei e laba nena i Nasaret mena kana tara taun i Kapenium i rehina a Ramun a Perperere i Galili. I Kapenium e kaia tara pala turu Sebulun na u Naptali, a huol a pala turu Jiu.

¹⁴ A ka teka e butu sil tega kato hamana menaien u raranga te ranga naia e Sunahan tere propet Aisaia i manasa.

¹⁵ Ba nonei e poeiena, “U katunura turu tsiktsiki i Sebulun na turu tsiktsikina i Naptali, te ka ria tara maroro pan te la uana i tasi na turu tsiktsiki te kana i hapalana ramun i Jodan, na turu tsiktsikina i Galili te ka has ria u katuun tema Jiu ri.

¹⁶ U katuun ti kaia turu kuhil, nori i tara hakapi u ualesala pan! Na pala ti kaia turu tsiktsiki turu kuhilina tara tou mate, u ualesala pan e alesala uanou i taren.”

¹⁷ Nonei tara pöata teka, e Iesu e tanian habulunganein a man raranga i tanen ba e poeiena, “Alimiou go palis ba naiam a man markato a man omi! Taraha, a Nipepeito tere Sunahan e sukusuku hakapa.”

E Iesu e ngör u katunun tsitsilo tutuun

¹⁸ Pöata te tataalaia e Iesu i kotolana tara Ramun a Perperere i Galili, ba nonei e tareiena e Saimon ti ngö hase ii e Pita na e toulanen e Endru, bate hagala ria i ramun, taraha nori u katunun hagala. Nori i holei a kannou i taren a iena.

¹⁹ Be Iesu e poeiena i taren, “La gono memu moulia, ba lia te hatuts ragoui limiou temar sooho merari u katuun.”

²⁰ Ba nori e laba ner u abe i taren, me kukuteier e Iesu.

²¹ Ba nonei e gamon la lenina me tarena u taina u mun toulana ere Jemis mere Jon, a galapien tere Sebedi. Nori i kaia tara tolaala i taren bate sugeier a man abe i taren, ba nonei e ngö ranen egi la gono meien.

²² Ba nori e laba ner e tamaren na tolaala na u tsonun kui. Ba nori a huol e la gono meier e Iesu.

E Iesu e hihatutsia turu katuun me kato haniga pouts ranen

²³ E Iesu e hula laia tara man han hoboto i Galili, me hihatutsna tara man luman lotu turu Jiu. Nonei e hihatutsin u Bulungana u Niga tara Nipepeito tere Sunahan bate kato haniga pouts has raiena u katuun ti ka mei a mamana mar siki.

²⁴ Ba u katunura tara mamana han hoboto tara provins i Siria e hengo ner a toukui na u hihatuts te katoe e Iesu. Ba nori e la merarima u katuun hoboto ti ka mei a mamana mar siki, u katuun ti sagohi a mamana mar kamits, na u katuun u popolöana, nu katuun u kotskotsibong, nu katuun u matekata. E Iesu e kato haniga hoboto pouts raien.

²⁵ Bu katuun u parpara koru e kukutier e Iesu: u katunura i Galili na i Dikapolis na i Jerusalem na i Judia na turu tsiktsiki i hapalana a ramun i Jodan.