Matiu 3 - U Bulunagana U Niga

E Jon a Tsonun Baptais e habulunganein u raranga

¹ Nonei tara pöata teka e Jon a Tsonun Baptais, e habulungana naia u raranga tere Sunahan tara makum a palaka i Judia.

² Ba nonei e poeiena, “Alimiou go palis ba naiam a man markato a man omi. A Nipepeito tere Sunahan e sukusuku hakapa.”

³ E Jon nonei a katuun te rangein e Aisaia a propet i manasa. Ba nonei e poeiena, “A töa katuun ena ku hapan noa romana tara makum a palaka bate poeiena, ‘Kato hamatsköeiam a maroro, a Tsunono e ngilin sila nama romana tara maroro a matskö.’”

⁴ E Jon e roron hasogi u hasobö ti katoei a huluna a kemol, bate pouseiena a lete. Na nonei e roron noui a köno na möröana.

⁵ Na tara pöata teka, u katunura i Jerusalem na tara man han hoboto tara provins i Judia na tara man han has i rehina a ramun i Jodan, i la hoboto uama tere Jon.

⁶ Ba nori e pokeier a man markato a man omi i taren, ba nonei e baptais ranen tara ramun i Jodan.

⁷ Be Jon e tara rena u Parasi na u Sadiusi u parpara koru i la silema tegimi habaptais uen, ba nonei e poeiena i taren, “Alimiou u katunura tara kökötsi a omi, alimiou u katuun u gamogamo! Alimiou ema antunan bus ba namoi a raharaha tere Sunahan te butu nou!

⁸ Te hapolasa ba namia limiou a man markato a man omi i tamilimiou, bora hatara marei tala naiam a markato a niga, tu habirits ba menami limiou a man markato a man omi i tamilimiou.

⁹ Alimiou goma tatei mar hakats uami teka, ‘Alam e kamem e Abraham e tubumulam.’ Alia e hatei ragou limiou, e Sunahan e antunan katoe nei u hatu teka a hun haposa tere Abraham. E Sunahan ema antunan ngil pinopinoe nei a katuun te pala uana tere Abraham. E möa. E ngileiena a katuun te kato hanigana.

¹⁰ A nikö e ka hakapaia i mouna u ruei. A man ruei tema hua haniga ri e ngats ba rariou bate lapo ba raroa turu tula.

¹¹ “Alia e baptais ragi limiou u ramun tuun, e hatara nena alimiou u habirits ba hakapa naiam a man markato a man omi i tamilimiou. Kaba a katuun te la hamurimuri nama romana i tar e pan bala koru nanou lia. Nonei a tsunono pan, na lia a katuun papala koru ema antunan söata nagi u sendol i tanen. Nonei te baptais ranoui limiou u Namnamei u Göagono na u tula.

¹² Nonei e katsin kato hamanasena a toukuin hamou turu wit. Nonei e lu kaakata ranou u katuun u niga na u katuun u omi. Nonei e haka ranoa u katuun u niga tara han a niga, ba nonei te tsuga mera noi u katuun u omi turu tula tema antunan hoso nari.”

E Jon e baptaisi e Iesu

¹³ Na tara pöata teka e Iesu e la ba nema i Galili me la uana tara ramun i Jodan tegomi habaptais uen tere Jon.

¹⁴ Kaba e Jon e torohanan katoeien ego palis u hakats i tanen me poeiena, “Alia ego habaptaisia i tamölö, kaba lö e la noa has uamuma i tar? Alö e pan bala koru namou lia.”

¹⁵ Be Iesu e ranga palisenen me poeiena, “E noahasina alö go markato uu temar ranga uagu lia. Tara markato teka bara te kato hantunera a mamanaka a matskö te ngilena e Sunahan.” Be Jon e töa kukutiena temar ranga uu e Iesu.

¹⁶ Pöata lahas te baptais hakapeien e Iesu me takei sei nama i ramun, ba u kolö e takalatana, ba nonei e tarena u Namnamei tere Sunahan e koul heremei a apena te ngöeri a kulu, memi töna tere Iesu.

¹⁷ Ba u töa u raranga e butu nama i Kolö me poeiena, “Nonei a Pien Tson koru i tar. Alia e ngil korue gen, na lia e sasaala koru has megen.”