Matiu 28 - U Bulunagana U Niga

E Iesu e takei pouts ia tara tou mate i tanen

¹ I murina te kapaia u Lan u Göagono, tara bongbong koru turu Sanrei, be Maria Matalina na taina Maria e lar tegina tara menaien a kioun mate.

² Ba nun a tagala e songots gasina, taraha a angelo tara Tsunono e lama i Kolö me hategele ba nena a hatu, me gumna ielunen.

³ A matanen e alesala herei u kanaha, na u hasobö i tanen e hiaka herei u köasi.

⁴ Ba u soldia e matout korur ba nori e toltololor me hererari u katuun u mate.

⁵ Ba angelo e poeiena tara touhaliou, “Alimiou goma tatei matoutmi. Alia e atei silegu alimiou e sake miou e Iesu ti nila naia tara kuruse.

⁶ Nonei ema ka neia teka. Nonei e takei pouts lala tara tou mate i tanen, temar ranga noahas uaien. La muma batemi taremiou a makum te opöien.

⁷ Bora alimiou go la boroboro mula batena hatei ramiou u katunun tsitsilo i tanen, ‘Nonei e takei pouts hakapaia tara tou mate, na nonei e la mam ranou limiou i Galili. Tena tare moien limiou.’ Hakats naiam a ka te ranga mera gulei lia limiou.”

⁸ Ba nori e la boroboro ba tuun ner a kiou, nori i matout kaba i ka noahas mei a nisasaala pan, me piata tunur tina hatei meraien u katunun tsitsilo i tanen.

⁹ Be Iesu e sabe ranen i maroro me hatsi bongbong ranen. Ba nori e la uarima i tanen, memi pile ria i mounen me hatsunone ren.

¹⁰ Be Iesu e poeiena i taren, “Ma matoutmi. La iam batena ranga meramiou a man hahatoulana i tar bate la uar i Galili, nori ena tare roa lia ili.”

U hahatei turu soldia

¹¹ Tara pöata ti la poutsia a touhaliou, ba a palair u soldia e la pouts uar tara taun mena hahatei rari u pris pan a manka hoboto te butu.

^12-13 Ba u pris pan e gono meraier u pal kapan me kitseier u ranga. Ba nori e hala rari u soldia a moni pan koru me poeier, “Alimiou egona mar ranga merami u katuun teka, ‘U katunun tsitsilo tere Iesu e la rima i bong memi koper u tuenrei i tanen tara pöata te soho mula lam.’

¹⁴ Na te hengo nanoa a gamman a ka teka, alam e tatei hale mien tu raranga tu niga, ba limiou te möa mou ta niomi.”

¹⁵ Ba u soldia e lueier a moni me katoer a ka ti ranga meraien tegi katoeien. Na nonei u raranga teka ti hatei rai u Jiu hoboto nonei tara pöata bate la nama na e hatei noahas naren i romana.

E Iesu e butuia turu katunun tsitsilo i tanen

¹⁶ Ba u töa u maloto na töa tara katunun tsitsilo e la uar turu pokus i Galili te hatei raien e Iesu tegi la uaien.

¹⁷ Ba nori e tareier e Iesu me hatsunone ren, kaba palai i tareien me hula hakatsir.

¹⁸ Be Iesu e la hasukusuku uama i taren me poeiena, “E Sunahan e halei lia a nitsunono hobotona i Kolö na i puta.

¹⁹ Bora, alimiou go la uaiam tara man hun katuun hoboto tara mamana han bate kato ramien u katunun tsitsilo i tar. Ba limiou te baptais ramen tara solona e Tamar na tara solor, a Pien Tson i tanen, na tara solo turu Namnamei u Göagono i tanen.

²⁰ Ba limiou te hatuts ramien tegi kukute menaien a mamanaka tu ranga merai lia limiou. Bate hakats namiou: alia e ka gono nitöa mera gou limiou e antunanoa tara kapakapana a pöata.”