Matiu 27 - U Bulunagana U Niga

E Iesu i lu menai tere Pailat

¹ Ba tara bongbong koru ba u pris pan na pal kapan hoboto has turu Jiu e hagum hoboto siler tegi koru pakö menaien e Iesu.

² Ba nori e kitse rien a tsien me la menarien tere Pailat a gamman.

E Judas e mate hakapa

³ E Judas nonei a katuun te hala menai e Iesu turu katuun ti paköeien, nonei e tara marei ti hopö kap hamanasa menaien e Iesu tega mate uen. Ba nonei e palisena u hakhakats i tanen me lu pouts mena nei u topisa u maloto a moni silva turu pris pan na tara pal kapan turu Jiu.

⁴ Ba nonei e poeiena, “Alia u kato a markato a omi koru ti hala menai lia a katuun tema kato homiei ta töa taka, ba nonei tena mate nou!” Ba nori e poeier, “Ema ka uanei i tamulam. A ka i tamölö pepeisa.”

⁵ Be Judas e lapo ba nena a moni tara Luman Lotu Pan me lana, ba nonei ena hakutena.

⁶ Ba u pris pan e luer a moni me poeier, “A moni teka a hihol te kato hamate meri a katuun. A Lo i tarara e hapiou nena a mar moni teka egima hakeia tara kolo tara Luman Lotu Pan.”

⁷ Ba nori e hagumur me kitser u ranga, ba nori ena holeri a moni teka a makumun tsiktsiki ti kukuiei a tabeli, tegi kaho raia u katunura tara a man han i lehana.

⁸ Nonei te ngö sila beri a makum teka, “U Tsiktsikina turu Rahatsing” tara man pöata i romana.

^9-10 Na u raranga tere propet Jeremaia na i manasa e butu hamana talana, “Nori i lui u topisa u maloto a moni silva, a hihol ti haka bei u Jiu a katuun teka, ba nori ena hole rien a makum te kukuie ria a tabeli, temar ranga mei lia a Tsunono.”

E Iesu e kaia turu kout tere Pailat a gamman

¹¹ Be Iesu e tuolna i matana e Pailat a gamman be Pailat e rangate nen, “Alö a King turu Jiu?” Be Iesu e ranga palisinen, “Alö peisa has te ranga namen.”

¹² Kaba nonei ema ranga palisei u ranga ti kout meien u pris pan na pal kapan.

¹³ Be Pailat e poeiena i tanen, “Alö be hengo hasem u mamana u raranga te kout meri lö u katuun teka?”

¹⁴ Kaba e Iesu ema ranga palis töa ii, be gamman e asingoto koruna.

E Pailat e rangein e Iesu ga mate

¹⁵ Turu mamanu hiningal tara pöata tara kannouna turu Paska, e Pailat e roron hapuresen a man töa man karabus, na u katuun peisa has ti ron poei a solora u katuun ti hapureser.

¹⁶ Na tara pöata teka a töa katuun a omi koru e kaia tara karabus ti atei sil u katuun, a solonen e Barabas.

¹⁷ Ba tara pöata ti gonogonoia u katuun, be Pailat e rangata ranen, “Alimiou e ngilemiou esi tegi hapureseia tara karabus, e Barabas tsi e Iesu te ngöeri e Kristo?”

¹⁸ Nonei e atei sil a saha ka tina hala sileien e Iesu i tanen, taraha nori i hiomi.

¹⁹ Tara pöata te gum noaia e Pailat turu kout, ba tahol i tanen e hale neien u raranga me poeiena, “Alö goma katoei ta ka tara katuun teka. Alia e tare gulen turu sinasoho i tar i bong, balia e toku korugu. Taraha nonei e möa ta töa taka ta omi i tanen.”

²⁰ Ba u pris pan na pal kapan turu Jiu e hatagala korueier u hakats turu katuun me kitser u ranga tegi rangata menai e Pailat bate hapuresener e Barabas tara karabus bate hala menari e Iesu tara tou mate.

²¹ Be gamman e rangata lel ranen, “Esi tara huol a katuun teka te ngile milimiou tegi hapuresi?” Ba nori i poeier, “E Barabas!”

²² Be Pailat e rangata ranen me poeiena, “Ga saha ka te katoe gou lia tere Iesu te ngöeri e Kristo?” Ba nori hoboto e poeier, “Nila namia tara kuruse!”

²³ Be Pailat e poeiena, “E ha koruna? A saha ka omi te katoeien?” Ba nori e ku sei bala tuun len meier, “Nila namia tara kuruse!”

²⁴ E Pailat e atei sili nonei ema antunan kato len nai taka, na u katuun i tanian hiagetageta hamanasa. Ba nonei e luena u ramun me galusena a limanen i matar u katuun hoboto, me poeiena, “Alia u möa ta ka ta omi tego ha atung hamate sil mei lia a katuun teka! A ka peisa i tamilimiou.”

²⁵ Ba u katuun hoboto e hatanganar me poeier, “A nihahuna tara tou mate i tanen e tatei la uana i tamulam na tara galapien i tamulam!”

²⁶ Be Pailat e purese bera neien e Barabas tara karabus. Ba nonei e halahus nena e Iesu me hala mena neien i taren tegina nila menaien tara kuruse.

U soldia i hahakosia tere Iesu

²⁷ Bu soldia tere Pailat e lu menari e Iesu tara luma tere gamman, ba u soldia hoboto emi gono hahise ren.

²⁸ Ba nori e hiser u hasobö i tanen me haseie rien u hasobö u rörö u ngahangaha te tara herei u hasobö tara king.

²⁹ Ba nori e hil haperperere ier a kolits a hihitoka me hasoge ren i bakuna e Iesu, ba nori e hapile rien a tsi ruei tara pal matou i tanen. Ba nori e hatukun ria i matanen me hahakosir me poeier, “Solosei iam a King turu Jiu!”

³⁰ Ba nori e kahuse ren, me luer a tsi ruei i tanen me obi narien i bakunen.

³¹ Pöata ti hahakos hakapaien tere Iesu, ba nori e his ba narien u hasobö u rörö ba nori e hasogo poutse rien u hasobö i tanen, me lakasa meren tegina nila menaien tara kuruse.

E Iesu i nila naia tara kuruse

³² Tara pöata ti laien, ba nori e sabeier a töa tsonuna i Sairini, a solonen e Saimon. Ba nori e hatöe rien a kuruse tere Iesu.

³³ Ba nori e la uer tara makum te ngöeri i Golgota, te poeiena “A Makum turu Lakö.”

³⁴ Tara makum teka ti katsin haueien e Iesu u uain ti sohaleien u meresin u mal koru. Ba nonei e ua torohane nen, me raman ua nanen.

³⁵ Ba nori e nila narien tara kuruse, me satu siler a man hasobö i tanen.

³⁶ Ba nori e gumur me pepeito kap naren.

³⁷ Ba nori e hopö naria u raranga ti kout meien e Iesu i bakuna a kuruse te poeiena: Nonei e Iesu teka, a King turu Jiu.

³⁸ Ba nori e nila has naria a huol a katuun a kopkop tara man kuruse i rehina e Iesu, a töa tara pal matou na tai tara pal keruka.

^39-40 Bu katuun ti hula laia i matanen e ranga hangisei ria tere Iesu me tsibtsibil ner a bakuren me poeier, “Alö a katuun te tatei rureiem a Luman Lotu Pan bate kui poutse men turu topisa u lan, taguhi a peisa mölö! Tego Pien Tson uu lö tere Sunahan, bara, koul talama tara kuruse!”

^41-42 Ba u pris pan na u tson ateira tara Lo na pal kapan e markato has uar iesana ti ranga hangisei uen bate poeier, “Nonei e taguhu hanigeir a palair u katuun, gehana ba nonei tema antunan taguhu poutsenei a peisanen? Nonei a Kingina i Israel, Ga nonei ega koul ba tala nema a kuruse bara te hamane ren!

⁴³ Nonei e hamanana tere Sunahan ba nonei te poeiena nonei a Pien tson tere Sunahan. Bora, ge Sunahan ega ngil taleien bate taguhe nen!”

⁴⁴ Bu katuun u kopkop ti nila gono meien e mar ranga hangisei has uar ti ranga uu a palaier u katuun.

E Iesu e mate hakapa

⁴⁵ Ba tara gusuna söasa bu kuhil e kopo kap nena a han hoboto, me antunan töana tara topisa a aua.

⁴⁶ Ba tara 3 kilok be Iesu e ku hapanina me poeiena, “Eli, Eli, lama sabaktani?” E poeiena, “O Sunahan i tar, Sunahan i tar, alö e laba sile mulei lia aha?”

⁴⁷ Ba palair u katuun ti tuol ia i susuku e hengor me poeier, “A katuun teka e ngöeiena e Elaitsa!”

⁴⁸ Ba töa i taren e pita boroborona, mena hapötöe nei u spants u uain u melil, me hakei nen i runguna a tsi ruei, me hasoa nanen tere Iesu tego ua menaien.

⁴⁹ Ba palai e poeier, “Haka banaiam, bara te tarera tega la uama e Elaitsa batemi taguhe nen!”

⁵⁰ Be Iesu e ku hapan lenina, ba nonei e hala banena u namnamei i tanen be matena.

⁵¹ Ba u labalaba pan te kuteia i Luman Lotu Pan e takiis katana iasa me la nitöana i puta. Bu tsiktsiki e tagasina, bu hatu e tapose kaakatana.

⁵² Bu kioun mate e takalata hobotor, ba para a katuun tere Sunahan ti mate e taker me töatöa poutsur.

⁵³ Ba i murina te takei poutsia e Iesu tara tou mate i tanen, ba nori e labaner u kiou me la uar i Jerusalem, bena butu ria turu katuun u parpara.

⁵⁴ Ba tsunono turu soldia na u soldia i tanen ti pepeito kapiin e Iesu e tarer a mamanaka te butu, na nun has, ba nori e matout korur me poeier, “U mana koru lahas nonei a Pien Tson hamana tere Sunahan!”

⁵⁵ U touhaliou u parpara ti kukutie ma e Iesu i Galili na ti taguhe men i tuol ma i lehana bate taratara kap has rima.

⁵⁶ Na i gusuren e Maria Matalina na e Maria e tsinana ere Jemis mere Josep, ne tsinana a galapien tson tere Sebedi ere Jemis mere Jon.

E Iesu i hongeia tara kiou

⁵⁷ Tara pöata te lahi ia a ka, ba töa katuun te kamei a moni a parpara koru e la nama, a solonen e Josep. Nonei a katununa i Arimatia, na nonei has a töa katunun tsitsilo tere Iesu.

⁵⁸ Ba nonei e la uana tere Pailat mena rangate neien u tuenrei tere Iesu. Be Pailat e haniga nena tega lu menai e Josep u tuenrei tere Iesu.

⁵⁹ Be Josep e lue nen, me pitse neien u labalaba u hiaka u tsimus na u gogoso nitöa.

⁶⁰ Mena hakeie nen tara kiou hamatskö i tanen te hakaho naien turu lapo. Ba nonei e hategele tupe nei a matana kiou a töa hatu pan me lana.

⁶¹ E Maria Matalina na taina Maria i gum ia i hapalana a kiou, bate tara uar tara kiou.

U soldia i taratara kapiin a kiou

⁶² Ba turu hamahö, turu Lan u Göagono, ba u pris pan nu Parasi e lar mena gono ria tere Pailat.

⁶³ Ba nori e poeier, “O Tsunono, alam e hakats kap nem u raranga te kati e Iesu a katuun a gamogamo tara pöata te töatöa noa ien ba nonei e poeiena, ‘I murina u topisa u lan ba lia te takei pouts gou.’

⁶⁴ Bora alö go halan tu raranga tegi taratara kap haniga menai a kioun mate e antunana turu hatopisana u lan, taraha u katunun tsitsilo i tanen ena mots larima bate kope ren batena poeier turu katuun, ‘Nonei e takei poutsia tara tou mate.’ Ba u gamo i taren tena karase nou u gamo mam.”

⁶⁵ Be Pailat e poeiena i taren, “Lu raiam u soldia batena taratara kap haniga nitöa ner a kiou.”

⁶⁶ Ba nori e lar, mena harokoto kap ner a hatun pilpili na tara kiou, ba nori e haka rer a palair u soldia tegi taratara kapiin a kiou.