Matiu 24 - U Bulunagana U Niga

E Iesu e hatein tega omi uu romana a Luman Lotu Pan

¹ Pöata te laba naia e Iesu a Luman Lotu Pan me katsin lana, ba u katunun tsitsilo i tanen e la uarima i tanen memi hatare rien a man luma pan.

² Be Iesu e poeiena i taren “Alimiou e tara hasemiou a mamanaka hoboto teka. Na lia e ranga hamana koru mera goulimiou, e möa lel nou ta töa ta hatu tega ka lel ia romana tara man makum te karien. A mamana hatu hoboto e tarura riou bate rusur i puta.”

A pöata a omi koru

³ Pöata te gum ia e Iesu turu Pokus tara Ruein Olip ba u katunun tsitsilo i tanen emi ka momous pepeisa gono meren me rangate ren, “Hatei ramei lam i hangisa te butuna romana a ka teka, na u hiharöto te hatara nanou a pöata tego la pouts uama lö, na te kapana romana a han.”

⁴ Be Iesu e ranga palis ranen, “Haneiam, möa tu hengoeiam ta katuun tegomi gamo raiou limiou.

⁵ Taraha, u katuun u parpara e la rima romana bate ngöeri a peisaren a solor bate poeier, ‘Alia e Mesaia’ ba nori te gamo rer romana u katuun u parpara.

⁶ Alimiou e hengoemiou romana te ling uana romana a man hiatatung i susuku na u bulungana tara man pulana i lehana. Kaba limiou goma matout mi. A manka teka e butu hasina romana, kaba a nikapakapa na man lan e ka noana.

⁷ A töa han e hiatatung mena romana a tana han, na palair u hun katuun e hiapulpular romana. Na e kamenou a bes pan na nun pan has tara han a parpara.

⁸ A manka teka e kamits here nei romana te posa menari a pien tutuun.

⁹ “U katuun e hala rariou limiou romana tegi kato hakamits merai limiou, ba limiou te kato hamate rariou. Na mamana hun katuun e omi sile roi lia, alimiou.

¹⁰ U katuun u parpara koru e hapolaser romana u nihamana i taren. Nori e hala mera roi a palai turu katuun te pakö raren batena hia o omi pouts hasir romana.

¹¹ U katuun tema propet ri e butur romana bate gamour, bate ngöeri a peisaren u propet tere Sunahan, bate gamo rer u katuun u parpara.

¹² A man markato a man omi teka e para koruna romana ba u ngilngil turu katuun u parpara te kapa susul nou.

¹³ Kaba u katuun te pile kap ner romana a markato tere Sunahan tara pöata a omi teka batema hapolaserien, e Sunahan e lu pouts mera noien i tanen.

¹⁴ Ba u Bulungana u Niga teka tara Nipepeito tere Sunahan te hihatuts laneria romana tara mamana han i puta, ba man hun katuun hoboto te hengoe ren romana, ba i murinen ba kapakapana a pöata te töan butu nou.”

A ka a omi koru e butunou

¹⁵ Be Iesu e poeiena, “Alimiou e tare miou romana a ka a omi koru te rangein e Daniel a propetina i manasa, te tuol ien tara makum a göagono.” (A katuun te ritena u raranga teka ega atei.)

¹⁶ “Ba pala te karia i Judia te bus uar romana turu pokus.

¹⁷ Na katuun te kana romana i pungana ema tatei koul nei romana, tegana lu menaien a manka i tanen iahana luma.

¹⁸ Na katuun te kana romana tara kui i tanen ema tatei la pouts nei romana tegana lu menaien a man hasobö i tanen.

¹⁹ A nitaatagi pan koru e kana romana tara touhaliou te kamer romana u pika nonei tara pöata, na tara touhaliou te hihasusur romana!

²⁰ Alimiou go singo uaiam tere Sunahan ba pöatan bus teka tema tatei butu neia tara pöatan hamuri na turu Lan u Göagono.

²¹ Taraha, a niomi te butuna romana nonei tara pöata e pan saluhe koru nena romana a man niomi hoboto, te butu i manasa tara pöata te katoeia e Sunahan a mamanaka bate noana i romana na tara pöata hoboto i murimuri.

²² Sanena e Sunahan tema hamakmakumei a pöata teka, ega möa koru ta katuun tega tatei ka haniga romana. Kaba e Sunahan e hamakmakum menai romana a pöata teka tego taguhu meraien u katuun te hopö kap raien.

²³ “Kaba te poeiena ta katuun i tamilimiou, ‘Röto iam, e Mesaia teka,’ tsi ‘Nonei ili,’ möa tu hamaneiam.

²⁴ Taraha, u Mesaia gamogamo na u propet gamogamo e butur romana, ba nori te katoer romana u hiharöto u kapan na man mirakol. Tegi antuna uen, ba nori te gamo rer romana u katuun te hopökapir e Sunahan.

²⁵ Hengoiam! Alia e hatei mammam ragilimiou a ka teka i mamina a pöata tena butu nen romana.

²⁶ “Bora e markato uana teka, te hatei raia limiou u katuun, ‘E Mesaia e kana tara makum a palaka,’ möa tu la uaiam nonei tara makum. Tsi tegi poeien, ‘Nonei e mousuna iahana luma,’ möa tu hamana raiam.

²⁷ Taraha, Alia tu butun Katunuma e la here gumei romana u kanaha te kanahana tara mamana makum turu kolö.

²⁸ U katuun e atei siler a makum te kana u tuenrei u mate, taraha nonei a makum te gonogono ria u apena te nounouer a ka a koreme. Na e kato has uana iesana, u katuun e atei sil hase riou ime te butu goa lia romana.”

E Iesu e la pouts nama romana

²⁹ “I murina pouts noahas a pöata tara niomi, a pitala e kuhilina romana, na tsihou ema piri has nei romana, na u pitopito e rus rima romana i kolö. Ba mamanaka a tagala na i kolö te tagasir romana.

³⁰ “Ba u hiharöto i tar tu butun Katunuma te butuna romana i kolö. Ba mamana katununa i puta te matoutur romana bate taber, ba nori te tarer romana Alia tu butun Katunuma e la meguma romana u köasi i kolö na nitagala na u ualesala u kapan.

³¹ Ba lia te pihegu a tuhil bate ling hapanina, ba u angelo i tar te la uar turu han hoboto i puta, ba nori te gono rarima u katuun te hopö kapir e Sunahan.”

U hihatuts turu ruei te suluna

³² Be Iesu e ranga lenina me poeiena, “Alimiou go lue mia ta niatei tego haharuei mena milimiou u ruei te ngöeri u fik. Tara pöata te mararana a kalana u ruei bate rurusuna, alimiou e atei sil hakape mula a pöata tara pitala e susukuna.

³³ Te kato has uamou limiou, tara pöata te tare moa limiou romana a mamanaka hoboto teka, ba limiou te atei sile mou nonei e susukuna i matan tamana hamatskön töa.

³⁴ Alia e hatei hamana koru ragou limiou, a mamanaka hoboto teka e butuna romana i mam te mate ria a palair u katuun te töatöar tara pöata teka.

³⁵ U kolö nu puta e taia riou, kaba u raranga i tar ema antunan taia koru nei romana.”

E möa ta töa tega atei sileiou nonei u lan na aua

³⁶ Be Iesu e poeiena, “Kaba e möa ta töa tega atei sileiou u lan tsi a aua te butu nama romana a manka teka. U angelo ri Kolö has ema atei roi, na lia has tu butun Katunuma ema atei has goi. E Tamar puku lasi te ateina.

³⁷ A pöata te la pouts guma romana lia tu butun Katunuma e markato has uanama romana tara pöata tere Noa i manasa.

³⁸ Tara man lan i mamina u uolo pan, u katuun i nou na i ua, na pal tson na touhaliou i hitöl e antunan töaia turu lan te tasuia e Noa tara tolaala.

³⁹ Na nori ima atei sil noa hasei aha tega butu. Antunaia te butuma u uolo pan me söata ba hakapa ranen. E markato has uanou iesana tara pöata te la pouts guma lia romana, Alia tu butun Katunuma.

⁴⁰ Nonei tara pöata a huol a tson e kui ria romana tara kui. Ba töa te lueier romana, ba tai te kakana.

⁴¹ Na a huol a tahol e katoeier romana a palaua. Ba töa te lueier romana, ba tai te kakana. Te markato uanoien teka, ba limiou te haneimiou.

⁴² “Taraha, alimiou ema atei silemi u sahu lan te la nama romana a Tsunono i tamilimiou.

⁴³ Kaba limiou go atei iam: sanena a katuun terena luma ega atei sil i hangisa tega lama a kopkop tara bong, ba nonei te kalkalatana bate hatu kap nena a kopkop tega tasu uaien i luma.

⁴⁴ Te markato uanen teka alimiou go hanei hasiam. Taraha, Alia tu butun Katunuma e la pouts guma romana tara pöata, alimiou ema atei silemien romana.”

A katunun kui a niga na omi

⁴⁵ Be Iesu e pei lelena, “Esi nonei ta katunun kui ta atei te tatei kato hanigan töa nena a toukui tanen? A Tsunono te tatei hataratara kap nanei a katuun teka a palair u katunun kui i tanen tega hala meraien a kannou i taren tara pöata hamatskö.

⁴⁶ A katunun kui teka e tatei sasaalana tara pöata temi sabienen a katuun pan i tanen, tara toukui te kuinen.

⁴⁷ Na lia e ranga hamana koru mera goulimiou, a katuun pan i tanen e tatei hataratara kap nanoi a katunun kui teka a mamanaka hoboto te teie nen.

⁴⁸ Kaba tega omia a katunun kui teka, ba nonei te rangana i torinen bate poeiena, ‘A katuun pan i tar ema sesein la pouts namei romana.’

⁴⁹ Ba nonei te tanian atung rena romana a palair u katunun kui, ba nonei te nouna bate ua gono merena u katuun u uaua pala.

⁵⁰ Ba katuun pan tara katunun kui teka, te songots la nama romana tara pöata, a katunun kui i tanen ema atei silenei nonei e la nama tara pöata teka.

⁵¹ Ba katuun pan te hahune noen, ba nonei tena haka gono mera neien u katuun u gamogamo. Tara makum tena tabe hohomi rouen bate kutu hakarkarangaker a liho ren.”