Matiu 19 - U Bulunagana U Niga

U hihatutsina te hiaramrama uar u muntahol

¹ Pöata te ranga hakapa naia e Iesu a manka teka, ba nonei e laba nena i Galili me la pouts uana tara han i Judia i hapalana Ramun i Jodan.

² Ba u katuun u parpara koru e kukutie ren, ba nonei e kato haniga pouts ranen ti kaien.

³ Ba palair u Parasi e la uarima i tanen memi torohane ren me poeier, “A Lo i tarara e haniganena tega laba menai a tson a tahol i tanen?”

^4-5 Be Iesu e ranga palis ranen me poeiena, “Alimiou u rit haniga haseiam u raranga te kana turu Buku u Göagono te poeiena, ‘tara tantania e Sunahan e kato raien a tson na tahol, Nonei te laba silanena a tson e tamanen na e tsinanen batena ka gono mena a tahol i tanen ba nori a huol te katoeier u töa puku u tuenrei.’

⁶ Nori ema huol len talari, kaba u töa puku u tuenrei. Na sahaka te kits takono hakapi e Sunahan, e möa ta töa ta katuun tega antunan purese kalakala pouts leleien.”

⁷ Ba u Parasi e poeier i tanen, “Ga tara ha tsiponi be Mosis te hala nena a lo te poeiena a tson e tatei kolotena u pepa tega tsuga menaien a tahol i tanen?”

⁸ Be Iesu e poeiena i taren, “Mosis e hala mei u raranga teka i tamilimiou, taraha alimiou u katuun u hihipus, kaba tara tantania e möa taka tega markato uu teka.

⁹ Na lia e ranga mera goulimiou, a tson te laba nena a tahol i tanen, ba tahol tema kaka gono menei ta tabina ta tson, ba tson i tanen tena töl lelena a tabina tahol, nonei e katoena a markatona tara tsikolo.”

¹⁰ Ba u katunun tsitsilo e poeier i tanen, “Tega markato tala uaien teka ba tson na tahol, tema antunan hitölri.”

¹¹ Be Iesu e ranga palisina me poeiena, “U raranga teka ema tatei la uanei turu katuun u parpara, kaba e Sunahan e hala hasiin a nitagala turu palair u katuun tegima hitöl uaien.

¹² Palair a pal tson tema antunan hitölri, nori i mar posa merai teka. Na palai ema hitöl meri ti hapö uaien. Na palai ema hitöl meri, taraha nori e ngilin kato ner a toukuina tara Nipepeito tere Sunahan. Kaba tson te antunan kukutiena u raranga teka, e tatei kukutie nen.”

E Iesu mera galapien u tetenei

¹³ U katuun i la mera mei a galapien u tetenei tere Iesu, tegomi hatakopo menaien a limanen i taren bate singo uana tere Sunahan. Ba u katunun tsitsilo i tanen e ranga haraharaha ria i taren.

¹⁴ Be Iesu e poeiena, “Haka baraiam a galapien gi la uama i tar, ma hapiou rami, taraha a Nipepeito tere Sunahan e ka uana turu mar katuun teka.”

¹⁵ Ba nonei e hatakopena a limanen i taren me lana.

A tson moni a hitots

¹⁶ Ba töa katuun e la uanama tere Iesu me poeiena, “Tson Hihatuts, a saha ka a niga tego kati lia balia te luegou a nitöatöa te ka nitöana?”

¹⁷ Be Iesu e poeiena i tanen, “Taraha balö te rangate milia saha ka te nigana? E Sunahan puku a töa te nigana. Te ngilin lue mialö a nitöatöa te ka nitöana, ba lö te kukutiem a man raranga tere Sunahan.”

¹⁸ Ba nonei a katuun e rangatenen, “A man saha man raranga?” Be Iesu e ranga palisenen me poeiena, “Alö goma atung hamatei a tana katuun. Na lö goma kope ii a ka tara tana katuun. Alö goma gamogamoi. Na lö goma tsikolo ii.

¹⁹ Alö go hapani e tamamölö na e tsinamölö. Na lö go ngili a tana katuun temar ngil hasmena milö a peisamölö.”

²⁰ Ba tson a hitots e poeiena i tanen, “Alia e kukutiegu a man raranga hoboto teka. Ka ha lel tego kati lia?”

²¹ Be Iesu e poeiena i tanen, “Te ngilin butu haniga koru mia lö i matana a Tsunono, balö tena hahol ba nem a mamanaka i tamölö balö te hala rami u katuun ti möa ta ka ta moni, balö te kame mou a mamanaka a nigana i Kolö. Balö te kukutie moulia.”

²² Ba pöata te hengoeia a tson a hitots a ka teka, ba nonei e taatagi koruna me lana, taraha nonei e kamei a moni na mamanaka.

²³ Be Iesu e poeiena turu katunun tsitsilo i tanen, “Alia e ranga hamana koru mera goulimiou, a katuun te kamena a moni a parpara ema antunan tahongo boroboro neia tara Nipepeito tere Sunahan.

²⁴ Na lia e hatei lel ragou limiou, ema antuna koru lasnei tega la uu a katuun te kamena a moni a parpara koru tara Nipepeito tere Sunahan, temar kato has uana a kemol te katsin sipina tara tsi tabutu tara salum.”

²⁵ Ba pöata ti hengoeia u katunun tsitsilo i tanen a ka teka, ba nori i asingoto korur me poeier, “Gesi te antunan ka haniga nou?”

²⁶ Be Iesu e tara uana i taren me ranga palis ranen, “Turu katuun tuun ema antunari, kaba tere Sunahan a mamanaka e hahankana.”

²⁷ Be Pita e poeiena tere Iesu, “Alam u laba nema a mamanaka me kukutie mumoulö. Ga lam e lue mou aha?”

²⁸ Be Iesu e poeiena i taren, “Alia e ranga hamana koru meragou limiou, tara han a tsimus i murimuri, tena gum goa Lia tu butun Katunuma turu Gumgum u Göagono i tar, ba limiou u katuun te lala gono memou lia tena gum has moa turu maloto na u huol u gumgum u göagono turu king, bate taratarakap ramou u maloto na huol tara pal katunura i Israel.

²⁹ Na u katuun hoboto te hakats nariou lia bate labaner u luma i taren na u toularen nu hahinaren na u tamaren nu tsinaren, na galapien i taren na u tsiktsiki, nori ena lueriou a parpara koru lel a ka, bate lu hase riou a nitöatöa te ka nitöana.

³⁰ Kaba u katuun u parpara koru ti mammam ena murimuri riou, ba u katuun ti murimurima tena mam riou.”