U Bulungana u Niga tere Iesu Kristo te kolotein e Luk 8 - U Bulunagana U Niga

A touhaliou ti lala gono mei e Iesu

^1-2 Tara tana pöata be Iesu e hula lauana tara man taun na man han, me hatei la nena u Bulungana u Niga tara Nipepeito tere Sunahan. A maloto na huol a katunun tsitsilo i la gono meien, na palair a touhaliou has ti tsuga barai a man liliahanei a man omi na man siki has. Nori a man touhaliou teka: e Maria Matalina, ti tsuga banai a tohit a liliahanei a omi.

³ Na e Joana, a tahol tere Kusa a töa tson pepeito tere Herot. Na e Susana, na palair a touhaliou has u parpara ti taguhi e Iesu na u katunun tsitsilo i tanen bate hala rarien a manka ti ngileien.

U haharuei tara katuun te tsihasein a man ngal

^4-5 U katuun i la noa hasima tara mamana taun, na tara pöata ti gonoia u katuun tere Iesu, ba nonei e hatei raneien u haharuei teka: “A töa katuun ena tsihasein a man ngalina kannou. Ba pöata te tsihasaien, a palai i pururukuia tara maroro ti tötö raien, ba u apena emi nou raren.

⁶ Na palai i pururukuia turu tsiktsiki te ka mei u lapo, ba pöata ti pusukuien ba nori e langor. Taraha? E möa tu ramun.

⁷ Na palair u ngal i pururukuia turu tsiktsiki te ka mei a kolits a hihitoka, ba u kolits e pusuku hapan gono mera nen me kato homi raier a man kaan leba teka.

⁸ Na palair u ngal i pururukuia turu tsiktsiki u niga. Ba nori e pusuku hapanir me hua korur.” Be Iesu e ranga hapanina me poeiena, “A katuun te ka mena u talinga te atein hengona ega hengo!”

Aha te haharuei sil e Iesu?

⁹ Ba u katunun tsitsilo tere Iesu e rangate rien a mouna u haharuei teka.

¹⁰ Be Iesu e ranga palisina, “E Sunahan e haröto ranei limiou a manka ti hamousi tara Nipepeito i tanen. Kaba palai e hengo tuner u haharuei. Taraha? Nori e tarar kaba ema tara mareieri, na nori e hahengor kaba ema ateiri.”

E Iesu e ranga hatararein u haharuei tara man ngal

¹¹ Be Iesu e poeiena, “A mouna u haharuei e markato uana teka: a ngal e here nei u raranga tere Sunahan.

¹² A man ngal ti pururukuia tara maroro e herenei a pala te hengoer u raranga tere Sunahan, kaba e Satan emi luba nena u raranga te kana i toriren. Taraha? Nonei e rama nena tegi hamana uaien be Sunahan te lu pouts ranen.

¹³ Na man ngal ti pururukuia turu tsiktsiki te ka mena u lapo e hatei nena a pala te hengoer u raranga bate sasaala koru meren. Kaba u raranga ema la koru uanei turu hakhakats i taren. Bate hamana meier a tsitabubun pöata, ba pöata te butuna u hiamus, ba nori te kurapa hobotor.

¹⁴ Na man ngal ti pururukuia tara makum te kamena a kolits a hihitoka e hatei nena a pala te hengor, kaba nori e ka mer u hakhakats pan tara nitöatöa na i puta, bate hakats koru ner a moni na man nisasaala na i puta. Na manka teka e pil kap nena u raranga tere Sunahan batema habute nei ta markato ta niga turu katuun teka.

¹⁵ Ba man ngal ti pururukuia turu tsiktsiki u niga e hatei nena a pala te hengoer u ranga bate hake rien turu hakhakats u niga i toriren, ba nori te pile kap hakarapoto naren. Ba u raranga te kato hanigeiena a markato turu katuun teka.”

U haharueina turu ualesala

¹⁶ Be Iesu e poeiena, “A katuun te hakulupena u lam ema kopo kap naneien a tabeli na ema hake neien i kopina a inana. E möa, e roron hake nen tara makumun gumgum turu lam iasa ba u katuun te tatei tarer u ualesala tara pöata te tasu rien.

¹⁷ Na e markato has uana iesana, a mamanaka hoboto te mousuna i romana e habuteriou. Na mamanaka tema atei sileri u katunura i romana, nori e atei sile roien i murimuri.

¹⁸ Alimiou ego tara kap haniga naiam temar hengo uami limiou. Taraha? A katuun te ka mena a niatei, e Sunahan e hala lele noien romana ta niatei. Kaba a katuun te raman ateina, e Sunahan e luba nanou a tsitabubun niatei te pei nen ega ka meien.”

E tsinana e Iesu na u toulanen

¹⁹ E tsinana e Iesu na u toulanen i la uama i tanen, kaba nori ima antunan la hasukusuku uai i tanen. Taraha? A katuun e gono.

²⁰ Ba töa katuun e poeiena tere Iesu, “E tsinamölö na u toulamölö e tuol ria ielesala, nori e ngilin tare rioulö.”

²¹ Be Iesu e poeiena i taren hoboto, “E tsinar na u toular nori u katuun te hengoer u raranga tere Sunahan bate kukutie ren.”

E Iesu e haselohi a lomolomo pan

²² Turu töa u lan e Iesu e osa gono mer u katunun tsitsilo i tanen tara töa tolaala tara Ramun i Galili, ba nonei e poeiena i taren, “Aragi aroho uu i hapalana a ramun.”

²³ Ba nori e la talar, be Iesu e sohona. Ba u ualupu pan e butuna tara ramun ba u ramun e posa hongo beiena a tolaala me katsin kato harukue nen.

²⁴ Ba nori e guleier e Iesu me poeier, “Tsunono, Tsunono! Ara e katsin ruku talara!” Ba nonei e takeina me abis hatagaleiena a lomolomo nu ramun te posa here mei u tasi pan. Ba lomolomo e la puta poutsuna ba seloho pan e butuna.

²⁵ Ba nonei e poeiena turu katunun tsitsilo i tanen, “I me te kana u nihamana i tamilimiou?” Ba nori e asingoto korur me matoutur, me hiarangrangatar, “A saha koru a mar katuun teka? Te hala nena u raranga tara lomolomo nu ramun te posa koruna ba ka te selohona!”

E Iesu e tsuga bani a liliahanei a omi tara katuun

²⁶ Ba nori e lar mena sung ria tara makum ti kaia a hun katuun ti ngörai u Gerasin. A han teka e kana i hapalana a Ramun i Galili.

²⁷ Be Iesu e koul na tara tolaala ba nonei e sunguna me tareiena a töa katuun tara han teka, u liliahanei u omi i kaia i tanen. Nonei ema pousei tu labalaba tara pöata lehana, na ema ka hasia ta töa ta luma. E ka lasia i kahokaho tara man kioun mate.

²⁸ Pöata te tareien e Iesu, ba nonei e ku hapanina me tuhatukun nena i matana e Iesu. Ba nonei e ku hohomi koruna me poeiena, “O Iesu a Pien Tson tere Sunahan Iasa Koru! Aha te ngil memi lö alia? Alia e singo hataatagi gia i tamölö, ma hahunei lia!”

²⁹ Nonei e markato uu teka, taraha, e Iesu e ranga hakapa mei a liliahanei a omi ega lakasa ban a katuun teka. (Tara pöata teka a parpara a liliahanei a omi e pile kapiin a katuun teka. U katuun i taratara kap nitöa naien me kitseri a limanen na mounen a tsien. Kaba nonei e roron kato kotskotsi a tsien, na liliahanei e roron hapiata menaien tara makum a ski.)

³⁰ Be Iesu e rangate nen, “Esi a solomölö?” Ba nonei e ranga palisina me poeiena, “A solor e Ami!” Taraha? Nonei e kamei a liliahanei a omi a para koru ti kaia i tanen.

³¹ Ba u liliahanei e singo hatagala koru uaier tere Iesu me poeier, “Alö go ma hala merai lam tara kiou te möa ta nönöanen!”

³² A töa heis poum pan i nouia i sukusuku i rehina u pokus. Ba u liliahanei e singo ria tere Iesu me poeier, “Alö go hala merai lam tara heis poum!” Be Iesu e hanigana.

³³ Ba nori e koul ba ner a katuun teka me na sei ria turu poum. Ba heis poum e hiapipiata gala hoboto sila ria turu uarahana. Ba nori e na rus ria i ramun me ruku hakapar.

³⁴ Ba u katunun taratara kap turu poum e tarer a ka teka me bus kukuter, me na polaseria u raranga tara taun na turu han.

³⁵ Ba u katuun e mi tarer a ka te butu. Ba nori e la uarima tere Iesu me tarer a katuun ti lakasa ban u liliahanei u omi. Nonei e gum ia i puta i rehina e Iesu bate haseiena u hasobö, ba u hakats i tanen e niga poutsuna. Ba nori e matoutur.

³⁶ Ba u katuun ti tara a ka teka e hatei rer a palai temar niga pouts uu a katuun a popolöana.

³⁷ Ba u katuun hoboto tara han turu Gerasin e tahuler e Iesu ega la pouts i han i tanen. Taraha? Nori i matout koru. Be Iesu e osa poutsina tara tolaala, tega la pouts uaien.

^38-39 Ba katuun ti lakasa ban u liliahanei u omi e poeiena tere Iesu, “Alia e go la gono meiou lö.” Kaba e Iesu e hala poutseien me poeiena, “Alö go la pouts i han i tamölö ba lö tena rarariem a ka te kato bela lei lö e Sunahan.” Ba katuun teka e la uana tara mamana makum iahana taun me habulungana la nena a ka te kato beien e Iesu.

A pien tahol tere Jairas, na tahol te sebeleia turu hasobö tere Iesu

⁴⁰ Pöata te tuku poutsia e Iesu i hapalana a ramun, bu katuun e sasaala mer te la pouts uamen. Taraha? Nori hoboto i hahaloseien.

⁴¹ Ba töa tson pepeito tara luman lotu, a solonen e Jairas, e tuhatukun nena i matana e Iesu me singo hataatagi silena tega la uu e Iesu i luma i tanen.

⁴² Taraha? Nonei e ka mei a töa koru a pien tahol te ka mei u maloto na u huol u hiningal i tanen e katsin mate. Be Iesu e lana ba u katuun e hiapaspasasa sile ren.

⁴³ Na töa tahol e kaia i gusuren te posa nitöan u rahatsing e antunaia turu maloto na u huol u hiningal. Nonei e hala hakapein u moni i tanen turu dokta, na e möa ta töa tega antunan kato haniga poutseien.

⁴⁴ Ba nonei a tahol teka e la hasukusuku uana i murina e Iesu me hasebelena i runguna u hasobö tere Iesu, ba u rahatsing i tanen e kapa soköna.

⁴⁵ Be Iesu e rangatana, “Esi te sebele lala i tar?” Ba u katuun hoboto e holisir, be Pita e poeiena, “Tsunono, u katuun e tuol hahise rioulö bate hiasösongor!”

⁴⁶ Kaba e Iesu e pei, “A töa katuun e hasebele lala i tar. Alia e hasagohe gula a tsi nitagala e lakasa lala i tar!”

⁴⁷ Ba tahol e atei sil hamanasena te mous ba menaien e Iesu, ba nonei e toltololo mena a nimatout. Ba nonei ena tuhatukun nena i matana e Iesu. Na i matar u katuun hoboto, nonei e hatei e Iesu a mouna a ka te hasebele sileien i tanen, na e hatei hasin ime temar niga boroboro pouts uaien.

⁴⁸ Be Iesu e poeiena i tanen, “A tsi tahol, a nihamana i tamölö e kato haniga poutse lalou lö. La tala, na torimölö e tatei tagolala poutsuna.”

⁴⁹ Pöata te ranga noaia e Iesu, ba töa katununa tara luma tere Jairas e la nama me mi hateie nen, “A pien tahol i tamölö e mate hakapa lala. Alö goma hakui lelei a Tson Hihatuts.”

⁵⁰ Pöata te hengoia e Iesu, ba nonei e poeiena tere Jairas, “Ma matouti. Hamana tuun lasi, ba nonei te niga pouts nou.”

⁵¹ Be Iesu e na tukuna tara luma ba nonei e hapiou rena u katuun tegi tasu gono menaien i luma, e Pita lasi mere Jemis ne Jon na e tamana pien ne tsinanen. Nori puku ti tasu gono mei e Iesu.

⁵² Na u katuun hoboto i tabe na i hahuri sil a pien teka. Be Iesu e poeiena i taren, “Alimiou goma tabe mi. A pien ema mate nei, e soho tununa.”

⁵³ Ba nori e gol hahamana naren. Taraha? Nori i atei sil te mate hakapa uu a pien.

⁵⁴ Kaba e Iesu e lui a limana a pien me ranga hapanina me poeiena, “A tsi pien, alö go takei!”

⁵⁵ Ba u namnamei tara pien e la pouts uanama i tanen, ba nonei e takei soköna. Be Iesu e ranga mera nen me poeiena, “Halemi ta ka ga noueien.”

⁵⁶ E tamana a pien ne tsinanen i asingoto koru. Kaba e Iesu e ranga hatagala meraien me poeiena, “Ma hahateiemi ta töa ta katuun a ka te butu lala teka.”