U Bulungana u Niga tere Iesu Kristo te kolotein e Luk 5 - U Bulunagana U Niga

E Iesu e ngör u katunun tsitsilo tutuun

¹ Tara töa pöata e Iesu e tuol ia i mounsingmou tara Ramun a Perperere i Genesaret. Nonei noa has a pöata ti hiasösongo sileia u katuun tegi hengo menaien u raranga tere Sunahan.

² Nonei e tari a huol a tolaala ti hasung ia i kotolana. A man tsonun hagala i laba raien mena galuser a man abe.

³ Be Iesu e osana tara tolaala tere Saimon, me tahule nen ega gamon tupa ba nai a tolaala a mounsingmou. Be Iesu e gumna iahana tolaala me hatuts rena u katuun.

⁴ Pöata te ranga hakapaien, be Iesu e poeiena tere Saimon, “Tula menai a tolaala tara makum a ruku, ba limiou te harukue miou u abe bate soohe mou ta iena.”

⁵ Be Saimon e ranga palisina, “O Tsunono, alam e hagala halan mula, kaba lam ema soohe mulei ta ka. Kaba turu ranga i tamölö ba lia te hakoule gou u abe.”

⁶ Ba nori e hakouler u abe me sooher a iena a parpara koru, ba abe e katsin takalana.

⁷ Ba nori e ku raier a palai i taren tara tana tolaala egi lama batemi taguhu raren. Ba nori e la rima memi ongo hasaputeri a huol a tolaala u iena me katsin rukur.

⁸ Be Saimon Pita e tarena a manka teka, ba nonei e hatukunna i mouna e Iesu me poeiena, “Alö ego laba naiou lia, o Tsunono! Alia a katuun a omi!”

⁹ Nonei emar ranga uu teka taranaha, nori i asingoto koruni u iena u parpara koru ti sooheien.

¹⁰ Ti markato has uu ere Jemis mere Jon, a galapien tere Sebedi ti kukui gono mei e Saimon. Be Iesu e poeiena tere Saimon, “Ma matout ii. Alö a katuun a sosooho iena. Kaba tara man pöata te la nama, alö e na lu mera mumei u katuun i tar!”

¹¹ Ba nori e hasung menari a man tolaala i taren i kotolana, me laba ner a mamanaka me kukutier e Iesu.

E Iesu e kato haniga poutsi a töa katuun a toba

¹² E Iesu e kaia tara töa taun te ka hasia a töa katuun a peisanen hoboto e ka mei a toba. Ba nonei e tarena e Iesu me hatukununa i matanen me singouana i tanen, “O Tsunono, te ngil mia lö, alö e tatei kato haniga poutse moulia.”

¹³ Be Iesu e hasoa nena a limanen me sebele nen me poeiena, “Alia e ngiligu. Alö ego niga pouts!” Ba nonei puku has tara pöata teka ba toba e tia ba nena a katuun.

¹⁴ Be Iesu e ranga menen, “Ma hahate ii ta katuun a ka teka, kaba lö go la hamatskö uu tara pris ba nonei tena tarena a peisamölö te niga pouts uanen. Ba lö te hale moien a kaan haats te haröto nena a toba e kapa hamana, temar ranga uu e Mosis i manasa. Ba u katuun te tatei atei sile riou a toba i tamölö e kapa koru.”

¹⁵ Kaba u bulungana te hatein a manka te katoe e Iesu e tasata uu i lehana. Ba u katuun u parpara e la sile rima tegimi hengo uaien na tego kato haniga pouts meraien man siki i taren.

¹⁶ Kaba tara man palaina man pöata nonei e la pepeisa uu tara makum a ski batena singona tere Sunahan.

E Iesu e kato haniga poutsi a katuun a matekata

¹⁷ Turu töa u lan e Iesu e hihatutsia turu katuun. U Parasi nu tson hihatuts tara Lo tere Mosis i gum has. Nori i lama turu han hoboto i Galili na i Judia na i la hasma i Jerusalem. Na nitagala tere Sunahan e kaia tere Iesu tego kato haniga pouts meraien u katuun ti ka mei a siki.

¹⁸ Ba pal tson e söate rimei a töa katuun a matekata a pöapöa. Nori i torohanan söata menaien iahana luma bate hake rien i matana e Iesu.

¹⁹ Kaba a makum e saputu koru tara katuun, na e möa ta makum tegi sila meien. Ba nori e sei meren ieluna a luma me luba ner a töa makum tara pungana. Ba nori e hakoul gono meri a katuun a pöapöa i gusuna ti gonoia u katuun me hakerien i matana e Iesu.

²⁰ E Iesu e atei sil ti hamana uaien i tanen me poeiena tara katuun a matekata, “A tsomi, alia e luba hakap nagula a markato a omi i tamölö.”

²¹ Ba u tson hihatuts tara Lo na u Parasi e tanian hiarangrangatar me poeier, “Te ha uanen ba nonei temar ranga uana teka? Nonei e katsin guleiena a nitsunono tere Sunahan! E möa ta töa tego tatei luban a markato a omi, e Sunahan puku lasi a töa!”

²² E Iesu e atei sil u hakats i taren me poeiena, “Aha te hula hakats memi limiou?

²³ Aha te gigahana na ha te tiamana? Alia ego pei, ‘Alia e luba negu a markato a omi i tamölö,’ tsi alia ego pei, ‘Alö ego takei ba lö te lam’?

²⁴ Alia e haröto ragi limiou, alia tu butun Katunuma e ka megu a nitagala i puta tego luba has menai lia a markato a omi tara katuun.” Be Iesu e ranga mena a katuun a matekata me poeiena, “Alia e ranga megou lö, takei, ba lö te söatem a holholasa i tamölö bate laam i han!”

²⁵ Ba nonei tara pöata puku has teka ba nonei e takei seina i matar u katuun hoboto me söatena a holholasa te opöien me soloseiena e Sunahan me lana i han.

²⁶ Ba u katuun hoboto e asingoto korur me matout hakapar. Ba nori e soloseier e Sunahan me poeier, “Ara e tare lila a manka man kapan koru i romana!”

E Iesu e ngöi e Livai

²⁷ I murina a ka teka, e Iesu e tari a töa katuun te lului a takis a solonen e Livai e gumia tara luman takis bate kuina. Be Iesu e poeiena i tanen, “Kukute moulia.”

²⁸ Be Livai e takeina me la ba nena a mamanaka me kukutena e Iesu.

²⁹ Be Livai e katoena a kannou pan tere Iesu i luma i tanen. U katuun u parpara ti lului a takis na palair u katuun i nou gono meraien. A pal kapan turu Jiu i ngö raien u katuun u omi.

³⁰ Ba palair u Parasi na u tson hihatuts tara Lo e tara raren me ranga sil rer u katunun tsitsilo tere Iesu, “Taraha tsiponi ba limiou te nou gono mera miou u katuun te lulueier a takis na palair u katuun u omi?”

³¹ Be Iesu e ranga mera nen, “U katuun te möar ta siki ema tatei la uari tere dokta. E möa. U katuun lasi te ka mer a siki te lar.

³² Alia u ma la sile mei tegomi ngö merai u katuun u matskö. E möa. Alia u la silema tegomi ngö merai u katuun u omi bate habirits hamatsköer a toriren.”

A markato te agono menari a kannou

³³ Ba u katuun e poeier tere Iesu, “U katunun tsitsilo tere Jon e roron agono ner a kannou bate singo uaier tere Sunahan. Na turu Parasi e markato has uaier iesana. Ga taraha tsiponi bu katunun tsitsilo i tamölö te namala agonori?”

³⁴ Be Iesu e poeiena i taren, “Tara pöata te hiakökoto gono meria a halis, a tsonun hitöl te kana na pala tara tson ema tatei agonori. E möa.

³⁵ Kaba a pöata e la nama romana ba tsonun hitöl te luba nariou. Ba pala i tanen te agono riou nonei tara pöata.”

E Iesu e haharuein u hihatutsuna i manasa na u hihatuts u tsimus

³⁶ Na e Iesu e ranga has meraien u haharuei teka: “E möa ta katuun tega kiis ban ta makumun labalaba ta tsimus bate tupe neien a tabutu turu labalaba u toutounei. Te markato uanen teka, ba u labalaba u tsimus ti kiisi tema tatei taratara haniga gono menei u labalaba u toutounei.

³⁷ Na e möa ta katuun tega tatei kis naia u uain u tsimus tara pikpiköna meme te toutouneina. Tega markato uen teka, ba nitagala turu uain u tsimus te gololona bate pan susuluna, bate kato butena a kaan osul a toutounei tema antunan talas nei. Ba uain te tatsu uana i puta, ba pikpiköna meme te omi hasina.

³⁸ U uain u tsimus tegi kis naia turu pikpikö u tsimus.

³⁹ Na e möa ta katuun tega ngil a uain a tsimus i murina te ua hakape nen a uain a toutounei. Taraha? Nonei e poeiena, ‘A uain a toutounei te niga balana.’”