U Bulungana u Niga tere Iesu Kristo te kolotein e Luk 3 - U Bulunagana U Niga

U hihatuts tere Jon a Tsonun Baptais

¹ Turu hamaloto na u tolima u hiningal te gamman pania e Taibirius i Rom, nonei has a pöata te tanian hihatutsia e Jon. Be Pontias Pailat te gamman na i Judia, na e Herot i Galili, be toulanen e Pilip te tara kap nena a provins i Ituria na i Trekonaitis. Be Laisenias te tara kap nena i Abilin.

² Bere Anas mere Kaiapas te tsunono pan raier u pris. Nonei tara pöata teka u raranga tere Sunahan e la uama tere Jon, a pien tson tere Sakaria, te kaien tara makum a palaka.

³ Be Jon e lauana tara mamana han i rehina Ramun i Jodan me mar hihatuts uana teka, “Palis ba naiam a man markato a man omi bate habaptais miou, be Sunahan te luba nanou a man markato a man omi bate tara pouts ranou limiou.”

⁴ Nonei temar koloto uu e Aisaia a propet, turu buku i tanen i manasa. Ba nonei e pei hasena: “A töa katuun ena ku hapan noua romana tara makum a palaka bate poeiena, ‘Hamatsköeiam a man markato i tamilimiou. A Tsunono e ngilin sila nama romana tara maroro a matskö.

⁵ A man gohi hoboto e tatei hue riou, na man pokus hoboto e tatei hala pute riou. Na kalana a kököela e hamatsköe riou, na maroro a tuktukul e kato hamamarohane riou.

⁶ Ba u katuun hoboto te tare riou a nihitaguhu tere Sunahan!’” Temar koloto uu e Aisaia e kapana teka.

⁷ U katuun u parpara i la uama tere Jon tegimi habaptais uaien i tanen. Ba nonei e poeiena, “Alimiou u kökötsi u katuun u gamogamo! Alimiou ema antunan bus ba namoi a raharaha tere Sunahan te butu nou!

⁸ Alimiou go palis ba naiam a markato a omi, bate kato hamana koru uamou te kato uana a katuun te palis ba nena a markato a omi. Alimiou goma mar hakats uami teka: ‘Alam e nigam. Taraha? E Abraham e tubumulam.’ Alia e hatei ragou limiou, e Sunahan e antunan katoe noi u marats teka a hun katuun tere Abraham! E Sunahan ema haniga papale nei a katuun te pala uana tere Abraham. E möa. E hanigeiena a katuun te kukutiena u raranga tere Sunahan.

⁹ A nikö e opö hamanasana tara polosona u ruei. Na e Sunahan e katsin ngats lupu hoboto hamanasa rena a man ruei tema mala hua haniga ri, bate lapo raria turu tula. E markato uana teka, e Sunahan e hahune nou a katuun tema kato haniga nei.”

¹⁰ Ba u katuun e rangateier e Jon, “Aha te katoe mou lam?”

¹¹ Ba nonei e ranga palisina me poeiena, “A katuun te ka mena u huol u hasobö ega halan u töa tara katuun te möana. Na katuun te ka mena a kannou ega molamola has naien.”

¹² U katuun ti lulu a takis i la silema tegimi habaptais uaien, ba nori e rangate ren, “Tson hihatuts, aha tego kati lam?”

¹³ Ba nonei e poeiena i taren, “Lu laseiam a takis te ranga uana a gamman.”

¹⁴ Ba palair u soldia e rangata hase ren, “Ga lam, aha tego kati lam?” Ba nonei e poeiena i taren, “Ma gulemi a moni tara katuun. Na limiou egoma kout gamogamo has nami a katuun. Sasaala meiam a hihol i tamilimiou.”

¹⁵ U katuun i hakatsin e Mesaia e sukusukun lama, ba nori e hakats hapara ner e Jon me poeier nonei toum e Mesaia.

¹⁶ Be Jon e poeiena i taren hoboto, “Alia e baptais ragi limiou u ramun tuun, kaba a töa katuun te pan bala nanou lia ena la nama romana. Alia ema antunan hakoul has nagoi u sendol i tanen. Nonei te baptais ranoui limiou romana u Namnamei u Göagono na u tula.

¹⁷ Nonei e katsin lu kata rena u katuun u niga na u katuun u omi, temar hapiraka menari a pem na ngal. Nonei e haka ranoua u katuun u niga tara han a niga, ba nonei te tsuga mera noui u katuun u omi turu tula tema antunan hoso nari.”

¹⁸ Na turu mamana u mar ranga has e Jon e hatuts raien u Bulungana u Niga.

¹⁹ Be Jon e ranga silena e Herot a gamman. Taraha? E Herot e töli e Herodias, a tahol tere toulanen pouts. E Herot e kato hakapi a para a markato a omi.

²⁰ Ba nonei e kato hasena a tana markato a omi koru te haka menaien e Jon tara karabus.

E Iesu i baptaisi

^21-22 I murina ti habaptaisia u katuun hoboto, be Iesu e habaptais hasina. Tara pöata te singoien, ba u Kolö e takalatana, ba u Namnamei u Göagono e hakulue nama a peisanen me koul uanama i tanen. Ba u töa u raranga e butu nama i Kolö me poeiena, “Alö a Pien Tson koru i tar. Alia e ngil korue goulö.”

A solor u tubuna e Iesu

²³ Pöata te hatanieia e Iesu a toukui i tanen, nonei e ka toum mei u topisa u maloto u hiningal. E Iesu i ngöe ii a pien tson tere Josep. Na e Josep a pien tson tere Heli.

²⁴ Na e Heli a pien tson tere Matat. E Matat a pien tson tere Livai. Na e Livai a pien tson tere Melki. E Melki a pien tson tere Janai. Na e Janai a pien tson tere Josep.

²⁵ E Josep a pien tson tere Matatias. Na e Matatias a pien tson tere Emos. E Emos a pien tson tere Nahum. Na e Nahum a pien tson tere Esli. E Esli a pien tson tere Nagai.

²⁶ Na e Nagai a pien tson tere Mat. E Mat a pien tson tere Matatias. Na e Matatias a pien tson tere Semein. E Semein a pien tson tere Josek. Na e Josek a pien tson tere Joda.

²⁷ E Joda a pien tson tere Joanan. Na e Joanan a pien tson tere Resa. E Resa a pien tson tere Serubabel. Na e Serubabel a pien tson tere Sialtiel. E Sialtiel a pien tson tere Neri.

²⁸ Na e Neri a pien tson tere Melki. E Melki a pien tson tere Adi. Na e Adi a pien tson tere Kosam. E Kosam a pien tson tere Elmadam. Na e Elmadam a pien tson tere Er.

²⁹ E Er a pien tson tere Josua. Na e Josua a pien tson tere Elieser. E Elieser a pien tson tere Jorim. Na e Jorim a pien tson tere Matat. E Matat a pien tson tere Levi.

³⁰ Na e Levi a pien tson tere Simion. E Simion a pien tson tere Juda. Na e Juda a pien tson tere Josep. Josep a pien tson tere Jonam. Na e Jonam a pien tson tere Eliakim.

³¹ E Eliakim a pien tson tere Melia. Na e Melia a pien tson tere Mena. E Mena a pien tson tere Matata. Na e Matata a pien tson tere Netan. E Netan a pien tson tere Devit.

³² Na e Devit a pien tson tere Jesi. E Jesi a pien tson tere Obet. Na e Obet a pien tson tere Boas. E Boas a pien tson tere Salmon Na e Salmon a pien tson tere Nason.

³³ E Nason a pien tson tere Aminadap. Na e Aminadap a pien tson tere Atmin. E Atmin a pien tson tere Arni. Na e Arni a pien tson tere Hesron. E Hesron a pien tson tere Peres. Na e Peres a pien tson tere Juda.

³⁴ E Juda a pien tson tere Jekop. Na e Jekop a pien tson tere Aisak. E Aisak a pien tson tere Abraham. Na e Abraham a pien tson tere Tera. E Tera a pien tson tere Nahor.

³⁵ Na e Nahor a pien tson tere Serug. E Serug a pien tson tere Riu. Na e Riu a pien tson tere Pelek. E Pelek a pien tson tere Eber. Na e Eber a pien tson tere Sela.

³⁶ E Sela a pien tson tere Kainan. Na e Kainan a pien tson tere Arpaksat. E Arpaksat a pien tson tere Sem. Na e Sem a pien tson tere Noa. E Noa a pien tson tere Lamek.

³⁷ Na e Lamek a pien tson tere Metusela. E Metusela a pien tson tere Inok. Na e Inok a pien tson tere Jaret. E Jaret a pien tson tere Mahalalel. Na e Mahalalel a pien tson tere Kenan.

³⁸ E Kenan a pien tson tere Enos. Na e Enos a pien tson tere Set. E Set a pien tson tere Adam. Na e Adam a pien tson tere Sunahan.