U Bulungana u Niga tere Iesu Kristo te kolotein e Luk 23 - U Bulunagana U Niga

E Iesu i kout naia tere Pailat a gamman

¹ Ba u katuun hoboto e taker me la menari e Iesu i matana e Pailat.

² Ba nori e tanian kout ner e Iesu me poeier, “Alam u tari a katuun teka e kato hatuturi u katuun i tamulam turu hihatuts i tanen. Nonei e ranga hapiouni tego hala menai lam a takis tere Sisa. Na nonei e roron ngöe nei a peisanen e Mesaia, a king.”

³ Be Pailat e rangate nen, “Alö a King turu Jiu?” Be Iesu e ranga palisina, “Alö peisa has te rangam.”

⁴ Be Pailat e poeiena turu pris pan na turu katuun u parpara ti gono, “Alia ema sabiegi ta ka ta omi tegi hahuna sile ii a katuun teka.”

⁵ Ba nori e ranga hatagala korur me poeier, “Nonei e roron hatutsir u katuun turu han hoboto i Judia me kato hataktakei ranen. Nonei e taniama i Galili batemi hanöan töa na teka.”

E Iesu i kout naia tere Herot a king

⁶ Pöata te hengoeia e Pailat a ka teka me rangatana, “A katuun teka a toun Galili?”

⁷ Ba nori e hatanganar, be Pailat e töan hala mena nei e Iesu tere Herot te ka hasia i Jerusalem nonei tara pöata. Taraha? E Herot e tara kapiin a provins i Galili.

⁸ Na nonei e sasaala koru te tara menaien e Iesu. Nonei e hengo nen na e solon ngil hasi tego tara menaien. Nonei e ngilin tari tega kato menai e Iesu tu mirakol.

⁹ Be Herot e rangate nei e Iesu a man harangata a man parpara, kaba e Iesu ema palise ii tu töa tu harangata i tanen.

¹⁰ Ba u pris pan na u tson hihatuts tara Lo e la hasusuku ruma me kout hatagala koru naier e Iesu.

¹¹ Be Herot na u soldia i tanen e hahakos ner e Iesu me maman ranga naren. Ba nori e hasei rien u hasobön king me hala pouts mena rien tere Pailat.

¹² E Pailat na e Herot i hiapalpal mam, kaba nonei turu lan teka nori i hiakaka haniga pouts.

E Pailat e rangein e Iesu ga mate

^13-14 Be Pailat e ngö gögono rena u pris pan na u tsunono nu katuun me poeiena i taren, “Alimiou mi piou namia a katuun teka i tar bate pei miou nonei e kato hatutu u hakats turu katuun. Kaba lia e katoe gula u kout i tanen i matamilimiou, na lia ema sabie gulei ta ka ta omi i tanen te kout memien limiou.

¹⁵ Na e Herot has ema sabie namei ta ka ta omi i tanen. Taraha? Nonei e hala pouts mena meien i tamulam. Hengoiam, a katuun teka ema katoe ii ta ka ta omi tega mate sileien.

¹⁶ Bara, alia e halahus nagoen bate hapurese gen.” (

¹⁷ Turu mamana u hiningal tara pöata tara Kannouna turu Paska, e Pailat e roron hapurese beraien a töa tson te kaia tara karabus.)

¹⁸ Kaba u katuun i ku hoboto me poeier, “Atung hamateiam a katuun teka, bate hapurese mena mumei e Barabas i tamulam!”

¹⁹ (E Barabas i haka mei tara karabus te hatakei menaien a hiatatung tara gamman iahana taun i Jerusalem, na nonei e atung hamate hasi a katuun.)

²⁰ E Pailat e ngilin hapuresi e Iesu, ba nonei e ranga lel merena u katuun.

²¹ Kaba nori i ku hapan noa lasi, “Nila namia tara kuruse! Nila namia tara kuruse!”

²² Ba e Pailat e ranga hatopisana i taren, “A saha ka a omi te katoeien? Alia ema sabie gulei ta ka ta omi tega katoeien ba nonei te mate sile nen! Alia e halahus negoen bate hapurese gouen.”

²³ Kaba nori i ku hapan koru noa has tegi nila menai e Iesu tara kuruse. Ba u ranga i taren e palisena u hakats tere Pailat.

²⁴ Be Pailat e töa kukutiena u ngil i taren me kitsena u ranga tega mate uu e Iesu.

²⁵ Ba nonei e hapureseiena a katuun ti ngileien, a katuun teka i haka mei tara karabus te habutu menaien a hiatatung na te hihipuli uaien. Be Pailat e hala mena nei e Iesu i taren egina kato menaien ti ngil uaien.

E Iesu i nila naia tara kuruse

²⁶ Pöata ti la meien e Iesu, ba nori e sabier a töa katuun a solonen e Saimon, a toun Sairini. Nonei e hagou tukuia i Jerusalem. Ba nori e pile naren me hasöate rien a kuruse tere Iesu, ba nonei e kukutena i murina e Iesu.

²⁷ Ba u katuun u parpara e kukutier e Iesu. A palair u touhaliou ti kaia i gusuren i taatagi koru me taber.

²⁸ Be Iesu e habirits uana i taren me poeiena, “Touhaliou ri Jerusalem, ma tabe sile milia. Tabe sileiam a peisa milimiou na galapien i tamilimiou.

²⁹ Taraha? A pöata e la nama te pei ria romana, ‘A touhaliou u kuba ti mamala pose ii ta pien na touhaliou tima hasuse ii ta pien, nori egi sasaala!’

³⁰ Nonei tara pöata u katuun e poeier romana tara pokus pan, ‘Kono kap ramoulam,’ na tara pokus a tetenei, ‘Hu kap ramoulam bate hamous ramoulam!’

³¹ Te markato mena rien lia teka, alia te heregi u ruei u pelpeli, gime te markato uaren romana turu katuun te hereri u ruei u lango?”

³² A huol a katuun a omi i lu has merai tegina kato hamate gono meraien e Iesu.

³³ Tara pöata ti tukuien tara makum ti ngöe ii U Lakö, ba nori e nila naria e Iesu tara kuruse, na huol katuun a omi i nila has raia tara huol a kuruse i rehinen, a töa tara pal matou na tai tara pal keruka.

³⁴ Be Iesu e singo uana tere Sunahan me poeiena, “O Tamar, alö go luban a markato a omi i taren. Nori ema atei sileri a ka te katoe ren.” Ba u soldia e satu siler u hasobö i tanen, me molamola naren.

³⁵ U katuun ti tuol ia i susuku i tara uu i tanen, kaba pal kapan turu Jiu i hahakos naien me poeier, “Nonei e taguhir a palai. Bara, tego Mesaia uen te hopö kapiin e Sunahan, ga nonei ega taguhu talei a peisanen!”

^36-37 Na u soldia has i hahakos naien. Ba nori e la hasusuku uaruma i tanen me torohanan haue rien u uain u melil me poeier, “Tego King uu lö turu Jiu, bara, taguhu talei a peisamölö!”

³⁸ A man ranga ti nila naia i bakuna kuruse i tanen, Nonei a King turu Jiu teka.

³⁹ A töa katuun a omi te kuteia i rehinen e ranga homia tere Iesu me poeiena, “Alö e Mesaia? Bara, taguhu talei a peisamölö na lam has!”

⁴⁰ Kaba taina katuun a omi te kuteia i hapala e raharaha me poeiena, “Alö ema matoutemi e Sunahan? A nihahuna i tarara e matsköna.

⁴¹ Taraha? E palisena a markato a omi ti kati ra. Kaba a katuun teka ema katoe ii ta ka ta omi.”

⁴² Ba nonei e poeiena, “O Iesu, hakats kap namoulia tara pöata tena butun King moa lö!”

⁴³ Be Iesu e poeiena i tanen, “Alia e ranga hamana megou lö, i romana tuun has, alö ena ka gono memoua lia i Kolö.”

A tou mate tere Iesu

^44-45 Tara 12 kilok tara söasa, ba pitala e piri hanöana bu kuhil e kopo kap hoboto nena a han me antunana tara 3 kilok. Ba u labalaba pan te kuteia tara Luman Lotu Pan e takiis katana me katoena a huol a makum.

⁴⁶ Be Iesu e ku hapan koruna, “O Tamagulia! Alia e hake gia u namnamei i tar i limamölö!” Nonei e mar ranga las uu teka bate matena.

⁴⁷ Ba katuun pan turu soldia e tarena a manka teka, ba nonei e soloseiena e Sunahan me poeiena, “U mana koru, nonei a katuun a niga!”

⁴⁸ U katuun u para ti gono sil a manka teka i tara kapiin a manka te butu, ba nori e taatagi korur me mukumuku hoboter a lumlumaren me la pouts uaier i han.

⁴⁹ A man hahikapien tere Iesu na man touhaliou ti kukutie men i Galili i tuol halehana me tarer a mamanaka teka.

E Iesu i kahoein

^50-51 A töa katuun a solonen e Josep a toun Arimatia, a töa taun turu Jiu. Nonei a katuun a niga, na nonei e hahalosi tega butu uama a Nipepeito tere Sunahan. Nonei a pala turu Kout Pan turu Jiu, kaba nonei ema hanige ii a ka ti hatangana nen na ti katoeien tere Iesu.

⁵² Ba nonei e la silena tena singo menaien u tuenrei tere Iesu tere Pailat.

⁵³ Be Pailat e hanigana, be Josep ena lu hakoulena u tuenrei tere Iesu, ba nonei e pitse neien u labalaba u hiaka, me hahonge nen tara kiou ti katoeia turu lapo, a kiou teka e möa noa ta mate tegi hakeia iahanen.

⁵⁴ Nonei u lanin heroko tara mamanaka, a pal lahi bong hamanasa, na u Lan u Göagono turu Jiu e tania mena te tsiruku uana a pitala.

⁵⁵ Ba touhaliou ti la gono mema e Iesu i Galili e la gono meier e Josep mena tarer a kiou na ime timar hopö menai a tuenreina e Iesu iogana.

⁵⁶ Ba nori e la pouts uaier i han mena hamatsköer a manka man soka haniga tara tuenreina e Iesu. Ba nori e husa meier u Lan u Göagono, temar ranga uu a Lo turu Jiu.