U Bulungana u Niga tere Iesu Kristo te kolotein e Luk 21 - U Bulunagana U Niga

A tsi moni te halan a amoaba

¹ E Iesu e tara me tarena u katunun moni bate honger a monin hitaguhu i taren tara bokisin moni turu lotu.

² Na nonei e tara has ba töa tahol a amoaba te möa koru ta ka te hongena a huol a toea.

³ Ba nonei e poeiena, “Alia e ranga mera goulimiou, a amoaba teka te möa koru ta ka e hala nelala a moni te para bala lala tara man moni te hala nelila u katuun.

⁴ Taraha? Nori e hala lila turu moni te kurapana tara moni i taren, kaba nonei e hala nelala a matsi moni hoboton töa i tanen.”

A Luman Lotu Pan e rure riou

^5-6 Ba palair u katunun tsitsilo e ranga siler a Luman Lotu Pan me poeier, “Taraiam tara man marats a man niga na manka man tara haniga ti hala menai u katuun tara luma tere Sunahan!” Ba e Iesu e poeiena, “Hakats naiam a manka te tare milimiou. A pöata te la nama e möa koru nou ta töa ta marats tego ka lelia romana tara makum i tanen. Nori hoboton töa e lapo ba raria romana i puta.”

A pöata a omi koru

⁷ Ba nori e rangate ren, “Tson Hihatuts, i hangisa te lapo baba naria romana u marats teka? Na u saha u hiharöto te haröto nena romana a pöata te butuna romana a ka teka?”

⁸ Be Iesu e poeiena, “Hanei iam, u katuun e namots gamo rariou limiou. Taraha? A katuun a parpara ena la rima romana bate ngöe roui a peisaren a solor batemi poeier, ‘Alia e Mesaia,’ na ‘A pöata hamanasa!’ Kaba ma kukute rami.

⁹ Alimiou e hengo namiou romana a man hiatatung na man pula, kaba ma matoutmi. A manka teka e butu mamuna romana, kaba ema pei nei a kapakapana pöata e susukuna.”

¹⁰ Ba nonei e ranga lel noa hasina me poeiena, “A töa han ena hiatatung gono mena romana a tana han, na palair a man hun katuun e hiapulpular romana.

¹¹ Na man nun pan koru e butu riou, na bes pan na mamana mar nomi pan e butu romana ria tara mamana han a parpara. A manka te hamatout rena u katuun e butuna romana, na man hiharöto hasina i kolö.

¹² Kaba i mamina te butu noua a manka teka, ba limiou te pile kap rariou bate kato hohomi pinopino rariou. Alimiou e kout raria romana iahana a man luman lotu turu Jiu bate haka raria tara karabus. Na limiou e lu merari romana i matar u king na turu gamman te hamana uami limiou i tar.

¹³ Na nonei has a pöata teka tegona ranga namia limiou u Bulungana u Niga.

¹⁴ Hahengoiam! Alimiou goma hakhakats hapara mam nami tu raranga tegona ranga palis naiam romana limiou.

¹⁵ Taraha? Alia e hala ragi limiou romana a man raranga nu hakhakats u niga koru, ba u pakö i tamilimiou tema antunan tulaputa nari romana u raranga tego hala rilia limiou.

¹⁶ A pal katuun pouts i tamilimiou, u tamamilimiou nu tsinamilimiou nu toulamilimiou nu hahikapien i tamilimiou e hala raroua romana limiou turu pakö. Na palai i tamilimiou e kato hamate raier romana.

¹⁷ U katuun hoboto e omi rariou limiou romana te katuun uami limiou i tar.

¹⁸ Kaba e möana romana tu töa tu hulu tega taia ia romana i baku milimiou.

¹⁹ Alimiou go tuol hakarapoto sile iam a Tsunono ba nonei te lu pouts ranou limiou romana.”

E Iesu e rangein te tia uana romana i Jerusalem

²⁰ E Iesu e ranga lel me poeiena, “Pöata te tara romana mia limiou u soldia u parpara e gono hahiser i Jerusalem, nonei te atei sila namoa limiou a pöata hamanasa tegi kato homi hakapa menai a taun teka.

²¹ Ba pala te ka ria romana i Judia te bus uaier romana tara pokus. Kaba eresi te ka ria romana i Jerusalem egi laba nen, ba e resi te ka ria romana tara man han ielesala egima tatei tasuia romana i Jerusalem.

²² Taraha? Nonei a man lanin hahuna teka te kato hamanena romana a manka hoboto ti ranga mamin turu Buku u Göagono.

²³ A nitaatagi pan koru e butuna romana tara touhaliou u pika, na tara touhaliou te hihasusur romana nonei tara pöata. A pöata a omi koru e butuna romana tara han teka, ne Sunahan e raharaha koru rena romana u katuun teka.

²⁴ A palai e ngats hamate rari romana u kilatan hiatatung, ba palai te kits raier romana bate la merari tara man taina man han turu tsiktsiki i puta teka. Ba u katuun tema Jiu ri tena pita hohomier romana a taun i Jerusalem bate pile kap naren e antunana tega kapa uu romana a pöata turu katuun halhal teka.”

E Iesu e la pouts nama romana

²⁵ Be Iesu e poeiena, “U hiharöto e butuna romana tara pitala na tsihou na turu pitopito. Na u han u parpara i puta e tutu mer romana a nitaatagi pan, na e matouter romana u hahalou pan.

²⁶ U katuun e maten topi mer romana a nimatout te hakats mena rouien a man nomi te butuna romana i puta. Taraha? A mamanaka na i kolö e gagasina romana.

²⁷ Ba nori te tarer romana alia tu butun Katunuma e la sila guma romana turu köasi i kolö na nitagala na u ualesala pan.

²⁸ Tara pöata te tanian butuna romana a manka teka, alimiou go ongoloiam bate sasaala miou. Taraha? A pöata tego lu pouts merai limiou e Sunahan e susuku hakapa!”

U hihatuts turu ruei te suluna

²⁹ Be Iesu e hatei raneien u haharuei teka, “Hakhakats naiam a man ruei te tatei sulur.

³⁰ Tara pöata te suluna u ngal, ba limiou te atei sile miou a pöatan nou turu ngal e susukuna.

³¹ Na e kato has uana iesana, pöata te tare mia romana limiou a manka teka, ba limiou te atei sil hase mou a Nipepeito tere Sunahan e susukun butu nama.

³² Alia e ranga hamana mera goulimiou, a mamanaka hoboto teka e butu romanana ba palair u katuun teka tema mate noari.

³³ U kolö na u puta ena taiar romana, kaba u raranga i tar ema antunan taia nei romana.”

U katunun tsitsilo egi tara kap haniga

³⁴ Be Iesu e poeiena, “Tara kap haniga naiam a peisa milimiou! Ema niga nei tego hakats las mena milimiou a tou nou na tou roro ba limiou te ua hatutu miou bate toku sile miou a manka na i puta. Alimiou e namots asingoto namiou tego songots butu uama nonei u Lan Pan tara Tsunono.

³⁵ Taraha? U Lan Pan teka e la here namei romana a tanga bate butuna tara man han na turu katuun hoboto te ka ria i puta.

³⁶ Tara kap hanigaiam bate singo nitöa uamiou tere Sunahan, ba limiou te ka memou a nitagala tego hakarasa ba menami limiou a man nomi teka te butu nouen, ba limiou te tatei tuol has mia romana i matar, alia tu butun Katunuma.”

³⁷ Mamanu lan e Iesu e hihatutsia tara Luman Lotu Pan. Ba tara man bong nonei e na sohoia turu pokus ti ngöei u Pokus tara Ruein Olip.

³⁸ Ba u katuun hoboto e roron la uaier tara Luman Lotu Pan tara bongbong koru tina hahengo uaien i tanen.