U Bulungana u Niga tere Iesu Kristo te kolotein e Luk 2 - U Bulunagana U Niga

E Iesu i posei

¹ Tara pöata teka e Sisa Ogastas te gamman Pania i Rom. Nonei e hala nela u raranga tegi hakoloto menai u katuun hoboto a soloren turu buku tara gamman.

² Nonei a pöata tutuun ti katoeien u nihakoloto teka, a pöata te gamman hasia e Kuirinias tara provins i Siria.

³ Bu katuun e la uaier ti posa raia u tuburen tegina hakoloto uaien.

⁴ E Josep e laba has nela i Nasaret, a taun i Galili, ba nonei e kete ualala tara taun tere Devit a solonen i Betlehem tara provins i Judia. Taraha? E Josep a hatutubunei tere Devit.

⁵ Nonei e la gono has mei e Maria, a tahol ti hopö kap beien tega töleien, tegina hakoloto menaien a soloren turu buku. Na u pika tere Maria e pan hakapa.

⁶ A pöata ti ka noaien i Betlehem, ba pöatan posa i tanen e butuna.

⁷ Ba nonei e poseiena a pien tson a hamua i tanen me pitse neien u labalaba me hopöe nen tara bokisin nonou turu bulmakau. Taraha? E möa ta makum i taren tara luman soho.

U angelo nu katunun taratarakap turu sipsip

⁸ Tara han teka a palair u katuun ti pepeito kapir a man heis sipsip i taren tara bong, i kaia ielesala tara taun i Betlehem.

⁹ Ba töa angelo tara Tsunono e butuna i taren, ba u ualesala pan tara Tsunono e alesala uana i taren ba nori e matout korur.

¹⁰ Ba angelo e poeiena i taren, “Alimiou goma matout mi. Alia e la meguma u bulungana u niga tara nisasaala i tamilimiou na turu katuun hoboto.

¹¹ A Tson Hitaguhu i tamilimiou e pose lila i bong teka tara taun tere Devit. Nonei a katuun tega la uama i puta te ngöe roui e Kristo. Nonei a Tsunono!

¹² Alimiou ena mar marei mena moien teka, a tsi kukuriki te pitse lilei u labalaba, e opöna tara bokisin nonou turu bulmakau.”

^13-14 Ba u angelo u para koru ri Kolö e singotei butu gono mer a angelo teka. Ba nori e soloseier e Sunahan me poeier, “Solosei iam e Sunahan i Kolö iasa koru! Na tara han i puta, u katuun te haniga rena e Sunahan e tatei ka ria tara masalohana!”

¹⁵ Pöata ti la pouts uu angelo i Kolö, ba u katunun pepeito kap turu sipsip e hiararangar me poeier, “Aragi la boroboro uu i Betlehem bara tena tarera a ka te butu lala, te hatei rela leira a Tsunono!”

¹⁶ Ba nori e la boroboror mena sabe rer ere Maria mere Josep, ba nori e tara haser nonei a tsi kukuriki te opöia tara bokisin nonou turu bulmakau.

¹⁷ Nori i tara hakapeien me töan ranga hatei laner a ka temi hatei raien a angelo.

¹⁸ Ba u katuun hoboto ti hengo u bulungana turu katunun pepeito kap turu sipsip e asingoto korur.

¹⁹ Kaba e Maria e hakats kap nitöani a manka hoboto teka me hakats hatiama nanen.

²⁰ Ba u katunun pepeito kap turu sipsip e la poutsur me solosei meri e Sunahan a manka hoboto ti hengoeien na ti tareien. A manka teka e mar butu hamana has uu temar ranga uu a angelo.

²¹ Na turu hatohitina u lan i murina ti poseien, ba nori e pö ren me ngöe rien e Iesu, a solo te hatei mamin a angelo be Maria tema pika noanei.

E Iesu i haröto naia tara Luman Lotu Pan

^22-24 Te butuma pöata tegi kato hagogoso meraien temar ranga uu a Lo tere Mosis, be Josep mere Maria e lu menari a pien i Jerusalem. Nori i la tina hatsunono menai u haats temar ranga uu buku tara Tsunono, “Alö ego haats a huol a kulu tsi a huol a kitou a hitots.” Na nori i la sil hasi te gina hala menai e Iesu tara Tsunono. Taraha? U raranga ti koloto naia turu buku tara Tsunono e poeiena, “A mamana hamua tson egi hala menai tara Tsunono.”

²⁵ Bara, a töa katuun e kaia i Jerusalem a solonen e Simion. Nonei a katuun a niga na e roron hatsunoni e Sunahan, na nonei e hahalosi tego taguhu merai e Sunahan u katunura i Israel. Na u Namnamei u Göagono e roron kaia i tanen.

²⁶ U Namnamei u Göagono e ranga hakapa meien nonei e tara noua tara Tsunono e Mesaia i mamina tego mate uaien.

²⁷ Ba u Namnamei u Göagono e peigi mena nei e Simion tara Luman Lotu Pan. Ba u mun tahol e la mena rimei e Iesu a tsi kukuriki tara Luman Lotu Pan tegi kato menai a markato i tanen temar ranga uu a Lo tere Mosis.

^28-29 Be Simion e söatena a pien me haniga uana tere Sunahan me poeiena: “O Tsunono, alia a katunun kui i tamölö e ka tala megou a masalohana tara pöata tena mate goua lia. A ka tu ranga hamanein lö e butu hakapa.

³⁰ Taraha? A matagulia e tara hakapi a katuun tu hala nema lö tegomi lu pouts raiou lam.

³¹ Alö u hopö kap silemeien tega butu uaien i matar u katuun hoboto.

³² Nonei e here noi romana u ualesala, bate haröto nena a maroro i tamölö turu katuun tema Jiu ri, na nonei e hala seie nou a solona a pala i tamölö a tei Israel.”

³³ Bere Josep mere Maria e asingoto koruner temar hatei menai e Simion e Iesu.

^34-35 Be Simion e kalala ranen me poeiena tere Maria, “Pöata te pan hakapa noa a pien teka, nonei e kato harus ranou, ne hala sei ranou u katuun u parpara ri Israel. Ba nonei te here noi a hatöatongo te ranga hasuala nariou u katuun. Na a man hakats i torir u katuun u parpara e haröto nariou romana. Na a nitaatagi pan te here noi u saka e butu has noua i tamölö!” Temar ranga uu e Simion.

³⁶ A töa propet a tahol e ka has, a solonen e Ana. Nonei a pien tahol tere Panuel, tara pala tere Aser. Nonei a tahol a toböana te hitöl puku mei a tson i tanen turu tohit u hiningal ba tson e matena.

³⁷ Na amoaba teka e ka mei u töal u maloto na u tohats u hiningal. Nonei ema tatei la banai a Luman Lotu Pan. Tara lan na tara bong nonei e roron hatsunoni e Sunahan te singo uaien i tanen bate roron agono has nena a kannou.

³⁸ Na nonei noahas tara pöata teka nonei e la uu tara tsi kukuriki e Iesu mena hala nena u hanhaniga tere Sunahan, me ranga nena e Iesu turu katuun hoboto i Jerusalem ti hahalosi a pöata tega taguhu merai e Sunahan u katunura i Israel.

Nori i la pouts uu i Nasaret

³⁹ Pöata ti kato hakapeia ere Josep mere Maria a mamanaka te rangein a Lo tara Tsunono, ba nori e la pouts mer e Iesu tara taun i taren i Nasaret.

⁴⁰ Ba nonei a pien e pan susul gono menama a nitagala. Nonei e ka mei u hakats u niga koru, na nikalala tere Sunahan e ka hasia i tanen.

A Pien Tson e Iesu e kaia tara Luman Lotu Pan

⁴¹ Turu mamana u hiningal e tamana e Iesu na e tsinanen i roron la uu i Jerusalem tara Kannouna turu Paska turu Jiu.

⁴² Na tara pöata te ka meia e Iesu u maloto na u huol u hiningal, nori i la uu nonei tara kannou teka.

⁴³ Te kapaia a man lan tara kannou, ba nori e la poutsur i han. Kaba u muntahol ima atei sile ii te kaka pouts uama e Iesu i Jerusalem.

⁴⁴ Nori i pei lasi nonei e ka gono mer a palai ti la gono meramen. U töa u lan u ohots ti la hakapa ba nori e tanian sake ren tara man hun katuun na tara man hahikapien i taren.

⁴⁵ Kaba nori ima sabeien, ba nori e kopis pouts nitöa uaier i Jerusalem tina sake menaien.

⁴⁶ Turu hatopisana u lan nori ina sabeien i Luman Lotu Pan, te gum gono meraien u tson hihatuts turu lotu, bate hehengona i taren bate rangata has raneien a man harangata.

⁴⁷ U katuun hoboto ti hengoia i tanen i asingoto koruni a niatei na man ranga palis i tanen.

⁴⁸ E tamanen na e tsinanen i asingoto koru hasiin ti tara menaien e Iesu. Be tsinanen e poeiena i tanen, “A pien i tar, taraha tsiponi balö te markato uaiem teka i tamulam? Alia ne tamamölö u lagi sakesake mölö me toku korum!”

⁴⁹ Be Iesu e ranga palis ranen, “Aha te sake sile mumei limiou alia? Alimiou ema atei silemi tego ka uu lia tara luma tere Tamar?”

⁵⁰ Kaba u muntahol ima atei sile ii a mouna a ka te ranga naien i taren.

⁵¹ Be Iesu e la gono pouts mera nen i Nasaret me kukute hanigeiena u raranga i taren. E tsinanen e haka nitöa neia a manka teka i torinen.

⁵² E Iesu e pan susul, ba niatei i tanen e butu hanigantöa has nama. Be Sunahan na u katuun hoboto e haniga korue ren.