U Bulungana u Niga tere Iesu Kristo te kolotein e Luk 17 - U Bulunagana U Niga

A markato a omi

¹ Be Iesu e poeiena turu katunun tsitsilo i tanen, “Mamanaka a omi e roron las rena u katuun bate kato homir, kaba a nomi pan e butu noua romana tara katuun te las mena a katuun tara tou hiamus!

² Kaba tega kato homieia ta katuun ta töa tara galapien teka te hamana uaier i tar ba pien te kato homina, e niga balana tegi kits menai ta hatu pan i totongolona a katuun teka batena harukue ria i loul!

³ Alimiou go tara kap haniga naiam a peisa milimiou. “Sanena tega kato homia a hahatoulana i tamölö, alö go ranga hapiou meien. Na tega palis ba naien a markato a omi i torinen, ba lö te hapolasa ba nem a markato a omi i tanen.

⁴ Te kato homi nen i tamölö tara tohit a pöata turu töa u lan, ba nonei te la uanama i tamölö tara tohit has a pöata bate poeiena, ‘Alia e palis ba negu a markato a omi i tar,’ ba lö te hapolasa hasem a markato a omi te katoeien.”

A markato turu nihamana

⁵ Bu Aposol e poeier tara Tsunono, “Alö go kato hapane iema u nihamana i tamulam.”

⁶ Ba Tsunono e ranga palisina me poeiena, “A ngalin mastet e tetenei koruna, kaba e habutena a kaan leba te pan soköna. U nihamana e markato has uana iesana. Noahasina te tetenei koruna u nihamana i tamilimiou, alimiou e tatei ranga noa has mia turu ruei teka bate poeiemiou, ‘Alö go takalapama batena taleba pouts moua i tasi,’ ba nonei te kukute hase nou u ranga i tamilimiou!”

A markato tara tsonun kui

⁷ Be Iesu e ranga lenina me poeiena, “Sanena ta töa i tamilimiou ega ka mei ta tsonun kui bate tara kap nena a kui tsi u sipsip, ba tara pöata tega la uamen i han, ga lö e tatei mar ranga has uaiem teka, ‘Mi nou sokö tala’?

⁸ E möa koru! Alö e tatei poeiem i tanen, ‘Alö go nas bema a kannou i tar, bate hapousem u labalaban nas balö te söate muma a kannou i tar bate mi hahalosom, balia te nou bugu. Ba lö te töan nou moto mou.’

⁹ A tsunono e haniga hase nou a tsonun kui tega kukute tuun menaien u ranga i tanen? E möa.

¹⁰ Na e markato has uana iesana i tamilimiou. Pöata te hakape mia limiou a manka ti ranga merai limiou tego katoeiam limiou, alimiou goma ngilemi tegi hapan merai limiou. Taraha? Alimiou u kato talaseiam a toukui ti hopö kap merai limiou.”

E Iesu e kato haniga poutsir a maloto a katuun a toba

¹¹ Pöata te la uu e Iesu i Jerusalem, nonei e silaia tara maroro i gusuna man provins i Samaria na i Galili.

^12-13 Nonei e tukuia tara töa han, ba maloto a katuun a toba e sabie ren. Nori i tuol ia i lehana me kur, “O Iesu! Tsunono! Alö go taatagi ramou lam!”

¹⁴ Be Iesu e tara ranen me poeiena i taren, “La mula, ba limiou tena hatara namiou a peisa milimiou turu pris.” Ba pöata ti la noaien i maroro, ba peisaren e gogosona!

¹⁵ Kaba a töa i taren e tara sabi te gogoso uaien me habirits poutsina me ranga hapanina te hatsunono menaien e Sunahan.

¹⁶ Ba nonei e tuhopö nena i mouna e Iesu me haniga uana i tanen. A katuun teka a toun Samaria.

¹⁷ Be Iesu e rangatana, “Alia e kato haniga pouts regula a maloto a katuun. Ga ime te ka ria a tosie?

¹⁸ E möa ta taina ta katuun tega kopisima batemi soloseiena e Sunahan, a töa puku lasi teka a katununa tara tana han?”

¹⁹ Be Iesu e poeiena i tanen, “Takei, balö te lam. A nihamana i tamölö te kato haniga poutse lalou lö.”

A Nipepeito tere Sunahan e butu nama romana

²⁰ A palair u Parasi i rangati e Iesu a pöata tega butuma romana a Nipepeito tere Sunahan. Be Iesu e ranga palis ranen me poeiena, “A Nipepeito tere Sunahan ema tatei mar butu uana mei romana tegi tara menaien.

²¹ E möa ta töa tega poeiou romana, ‘Tara, a Nipepeito tere Sunahan teka’ tsi, ‘Nonei ili!’ E möa. A nipepeito tere Sunahan e kana i torimilimiou.”

²² Be Iesu e poeiena turu katunun tsitsilo, “E ka menou a pöata i murimuri te ngilin tara koru namoia limiou alia turu töa u lan, alia tu butun Katunuma, kaba alimiou ema tare moi lia.

²³ U katuun e poeier romana i tamilimiou, ‘Taraiam, nonei te kanama ili’ tsi, ‘Nonei teka!’ Kaba limiou goma tatei kukute ramien.

²⁴ Pöata te kulupuna u köasi, u kanaha e roron alesala uana tara mamana makum i kolö. Na e markato has uana romana iesana tara pöata te butu pouts guma lia romana, Alia tu butun Katunuma.

²⁵ Kaba alia ego sagoho mam bi a kamits a para. Ba u katunura i romana te tori tsuga nariou lia.

²⁶ A pöata te la pouts guma lia romana e markato has uana romana te kato uu a pöata tere Noa i manasa.

²⁷ Tara man lan i mam turu uolo pan, u katuun i nou me uar me hitölur, me noana turu lan te tasuia e Noa tara tolaala. Ba u uolo pan e la nama me atung hamate hobotontöa rena u katuun.

²⁸ Na e markato has uana romana te markato uu a pöata tere Lot. U katuun i nou me uar, me hiholur me haholur, me lebar a man kui me hatakeier u luma.

²⁹ Kaba turu lan te laba naia e Lot a taun i Sodom, bu tula u ahiil e rus here namei a langits i kolö me kato hamate rena u katuun hoboto.

³⁰ Na e markato has uana romana teka tara pöata te butu pouts guma romana lia, Alia tu butun Katunuma.

³¹ “I murina nonei turu lan teka, ta katuun tega kaia i oluna a luma e goma koul ii bate tasuna batena luena a manka i tanen. Na katuun has te kana romana tara kui i tanen ema tatei kopis uana mei romana i luma i tanen.

³² Hakats kopis naiam a ka a omi te butuia tara tahol tere Lot.

³³ A katuun te peits nena a nitöatöa i tanen ena hatie nen romana. Kaba a katuun te hataia sile nei a nitöatöa i tanen te ngil mena neien lia, nonei ena sabie nen romana.

³⁴ Alia e ranga mera goulimiou, nonei tara pöata i murimuri a huol a katuun te soho gono ria romana tara töa inana tara bong. A töa e luba ner romana ba tai te kakana.

³⁵ A huol a tahol e kono hoboter romana a kannou. A töa e luba ner romana ba tai te kakana.

³⁶ A huol a tson e kui ria romana i kui. A töa e luba ner romana ba tai te kakana.”

³⁷ Ba u katunun tsitsilo e rangate ren, “O Tsunono, ime tena butu noua a manka teka?” Be Iesu e ranga palisina, “A makum te kana u tuenrei u mate, nonei a makum te gonogono ria u apena te nounouer a ka a koreme.”