U Bulungana u Niga tere Iesu Kristo te kolotein e Luk 15 - U Bulunagana U Niga

U haharuei tara sipsip te taia

¹ U katunun lulu takis u parpara na palair u katuun u omi i lama memi hahengo ria tere Iesu.

² Ba u Parasi na u tson hihatuts tara Lo e ranga haraharaha ner e Iesu me poeier, “A katuun teka e kapiena rena u katuun u omi na e nou gono has mera nen!”

^3-4 Be Iesu e hatei ra neien u haharuei teka, “Tego ka meia ta töa i tamilimiou a 100 tara sipsip ba töa i taren te taiana, gaha tega katoeien? Nonei ga la bar a 99 sipsip tara makum te ka rien batena sakiena a sipsip te taia, e antunana tego sabe pouts menaien.

⁵ Pöata tena sabe poutse nen a sipsip te taia, ba nonei te sasaala koruna bate hopöe nen i halahalanen.

⁶ Ba nonei te söata pouts mena neien i han batena ngö gögono rena u hahikapien i tanen na u katuun te sukusukur bate poeiena i taren, ‘Sasaala gono memoulia. Taraha? Alia u sabe poutsi a sipsip i tar te taia!’”

⁷ Be Iesu e poeiena, “Na lia e ranga mera goulimiou, e markato has uana iesana, i Kolö e sasaala koru has meriou a töa katuun a omi te palis ba nena a man markato a man omi i tanen. Na nisasaala teka e pan bala nanou a markato te sasaala mena rouien a 99 tara katuun a niga.”

U haharuei tara moni te taia

⁸ Be Iesu e poeiena, “Ga sanena ta töa ta tahol ga ka mei a maloto a silva moni ba töa te tiana, ga nonei e katoe nou aha? Nonei ega hakulupi u lam, bate sasaloena a luma i tanen, bate tara haniga koruna tara mamana makum, e antunana tego sabe pouts menaien a moni.

⁹ Pöata te sabe poutse nouen a moni, ba nonei te ngö gögono rena u hahikapien i tanen na u katuun te sukusukur bate poeiena, ‘Sasaala gono memoulia. Taraha? Alia e sabe poutse gula a moni tu hatie lia.’”

¹⁰ Be Iesu e poeiena, “Na lia e ranga mera goulimiou, e markato has uana iesana, u angelo tere Sunahan e sasaala koru has meriou a töa katuun a omi te palis banena a man markato a man omi i tanen.”

U haharuei tara pien tson te taia

¹¹ Be Iesu e poeiena, “A töa katuun e ka mei a huol a pien tson i tanen.

¹² Ba hahuoluna a pien e ranga mena e tamanen me poeiena, ‘O Tamar, alö go hale mei lia a manka tu hopö kap bei lö alia ba lia te pile peisa nagen.’ Be tamanen e lu kaakata talena a manka i tanen me hala raneien a huol a pien tson i tanen.

¹³ Ema mala pina koru ii ba hahuolina a pien te hahol nena a mamanaka hoboto i tanen me luena a moni me la uana tara han i lehana. Ba nonei ena hakapa pinopinoena a moni i tanen tara man markato a man omi te katoeien.

¹⁴ Nonei e hihol ba hakapein a man moni hoboto i tanen, ba pan nen a bes e butu hobotona tara han te ka ien, nonei ema ka lel tala mei ta ka.

¹⁵ Ba nonei ena kuina tara töa katununa tara han teka. Ba katuun teka e hala mena neien tara makum te kaia a heis poum i tanen, ba nonei ena taratara kap rena u poum.

¹⁶ Nonei e bes koru na kannou tena hanou raien u poum e tara hanigan töa. Kaba e möa ta katuun tega haleien ta ka.

¹⁷ “Ba pöata te talesala sil poutseia u hakats i tanen a manka te katoeien, ba nonei e poeiena, ‘U katunun kui tere tamar e ka mer a kannou a para, kaba lia e ka gia teka bate mate koru megu a bes!

¹⁸ Alia e takei gou bate la pouts uagou tere tamar ba lia tena pei gou, O Tamar, alia u kato homi ia i matana e Sunahan na i tamölö.

¹⁹ Ema antuna len tale nei alia egi ngö lelei a pien i tamölö. Alö go kato here namei lia a katunun kui i tamölö.’

²⁰ Ba nonei e takeina me la uana tere tamanen. “Nonei e ka noaia i lehana be tamanen e tara sabie nen me taatagi koru nanen. Ba nonei e piata uana i tanen mena lukute nen me taatagi koru nanen.

²¹ Ba pien tson e poeiena i tanen, ‘O Tamar, alia u kato homi ia i matana e Sunahan na i tamölö. Ema antuna tale nei alia gi ngö lelei a pien i tamölö.’

²² Kaba e tamanen e pei turu katunun kui i tanen, ‘Lue muma u hasobö u niga batemi hasoge mien. Hasesei iam! Ba limiou te hasogo hase miou a ring a goul i kabelenen na u sendol i mounen!

²³ Na lue muma a tunan bulmakau a pan haniga koru batemi nase men, ba ra te katoera a kannou pan bate sasaalara.

²⁴ Taraha? A pien tson i tar e here ii a katuun te mate, kaba e töatöa poutsuna. Nonei e tia me butu pouts nama.’ Ba nori e tanian nou talar me sasaalar.

²⁵ “Turu lan teka a pien tson a hamua e ka noa ma i kui. Ba nonei e gala uanama i han me hengoena u katuun i köma bate sani ria i luma.

²⁶ Ba nonei e ngöena a töa katunun kui me poeiena, ‘Aha te sasaala mer u katuun?’

²⁷ Ba katunun kui e poeiena i tanen, ‘E toulamölö e tuku pouts lala na e tamamölö e kato hamate hakape lala a tunan bulmakau a bokoko. Taraha? Nonei e lu poutse lala a pien tson i tanen na nonei e niga noa hasina.’

²⁸ Kaba pien a hamua e raharaha koru me raman tasuna. Be tamanen e lakasa nama me ranga hatamina i tanen.

²⁹ Ba nonei e ranga palisena e tamanen me poeiena, ‘Alia u kui hatagala koruia i tamölö turu mamanu hiningal, na lia u mamala hipus nai u ranga i tamölö. Kaba lö u mamala hale ii lia ta töa ta tunan meme tego nou gono mei lia a man hikapien i tar.

³⁰ Kaba a pien tson i tamölö teka e ba pinopino naia a moni i tamölö turu touhaliou ri maroro! Kaba pöata te la pouts uana men i han, ba lö te kato hamate bemien a tunan bulmakau a bokoko!’

³¹ Be tamanen e poeiena i tanen, ‘A tsi pien i tar, alö e ka gono nitöa memou lia, na mamanaka hoboto i tar emu manka has lö.

³² Aragi sasaala bate masa korura. Taraha? E toulamölö e here ii a katuun te mate, kaba e töatöa poutsuna! Nonei e tia kaba e la poutsuma!’”