U Bulungana u Niga tere Iesu Kristo te kolotein e Luk 13 - U Bulunagana U Niga

Hapalis banaiam a man markato a man omi

¹ Nonei tara pöata teka, a palair u katuun ti ka, i hahatei e Iesu e Pailat e ha atung hamatir u katunura i Galili tara pöata ti haats uaien tere Sunahan.

² Be Iesu e ranga palis ranen, “Nori u katunura i Galili i omi koru balein a tei Galili hoboto ti mar mate uaien teka?

³ E möa koru lasi. Ga lia e hatei ragi limiou, tema palis ba namoui limiou a man markato a man omi i tamilimiou, ba limiou hoboto te mate has mou!

⁴ Na limiou go hakats has naiam te rus ia a luma a pia i Siloam me kono hamatiena a maloto na töal a katuun. Nori ti omi koru balein a palair u katuun hoboto ti kaia i Jerusalem?

⁵ E möa has. Na lia e hatei ragou limiou, tema palis ba namoui limiou a man markato a man omi i tamilimiou, ba limiou hoboto te mate has mou!”

U ruein fik te möa ta hua

⁶ Be Iesu e ranga mera neien u haharuei teka. “A katuun e ka mei u ruein fik te pusukuia tara kuin grep i tanen. Nonei e na sake ta hua me lagi sakesakena.

⁷ Ba nonei e poeiena tara katuun te tara kapiin a kui i tanen, ‘Tara, turu topisa u hiningal alia u lala uama teka timi sake menai ta hua turu ruein fik teka, kaba lia u ma mala sabe ii ta hua. Bara, ngats ban! Nonei e namots hakapa pinopinoena a kannou turu tsiktsiki.’

⁸ Ba katunun kui e ranga palisenen me poeiena, ‘A tsi tsunono, haka ban ega ka patubi u töa u hiningal. Ba lia te kaho hahise gen romana bate hakeiegu u tei.

⁹ Te hua tala nen romana turu hiningal te la nama, e niga nou. Kaba te möa nen, e ngats ba nariou.’”

E Iesu e kato haniga poutsi a töa tahol turu Lan u Göagono

¹⁰ Turu töa u Lan u Göagono e Iesu e hihatutsia tara töa luman lotu turu Jiu.

¹¹ E ka mei a töa tahol e ka, te ka mei a liliahanei a omi te katoeien me ka mena a siki turu maloto nu töal u hiningal. Nonei e turu nitöa, ema antunan tuol hamatskö ii.

¹² Tara pöata te tareia e Iesu nonei a tahol teka, ba nonei e ngöe nen me ranga menen, “A tsi tahol, a siki i tamölö e kapa!”

¹³ Ba nonei e hatakopena a limanen i tanen ba tahol e tuol sei hamatskö soköna me hatsunonena e Sunahan!

¹⁴ Ba tson pepeito tara luman lotu e raharahena e Iesu te kato haniga pouts menaien a tahol turu Lan u Göagono. Ba nonei e poeiena turu katuun, “Ara e ka mera u tönomo u lan tegi kui meira. Alimiou e tatei la muma nonei tara man lan teka ba siki temi kato haniga poutseier, kaba turu Lan u Göagono e möa!”

¹⁵ Ba e Iesu e mar ranga palis mena neien teka, “Alimiou u katuun u gamogamo! Ga limiou e ron la uamiou tara luman bulmakau turu Lan u Göagono bate purese miou a man bulmakau tsi a man rongki i tamilimiou batena haua ramun ramen, boka?

¹⁶ Na tahol teka, a töa hatutubunei tere Abraham, e Satan e pile kapiin a tahol teka turu maloto nu töal u hiningal, ema tatei purese ba has nari a tou kits i tanen turu Lan u Göagono?”

¹⁷ U ranga palis i tanen e hamatsingoler u pakö hoboto i tanen. Ba u katuun hoboto e sasaala mer a mamanaka a niga te katoeien.

U haharueina turu ngalin mastet

¹⁸ Be Iesu e rangatana, “Ime te markato uana a Nipepeito tere Sunahan? Aha te tatei haharuei nanen?

¹⁹ Nonei e here nei a ngalin mastet te luena a katuun bate lebe nen tara kui i tanen. Ba nonei te panina, ba u apena temi tö ria tara man kala.”

U haharueina turu is

²⁰ Be Iesu e rangata lenina, “Ta ha lel tego haharuei gono mei lia a Nipepeito tere Sunahan?

²¹ Nonei e here nei u is. A tahol e luena u is bate sohale neien a töa taram palaua, ba i murinen ba palaua teka te la seina.”

A tamana a teki

²² E Iesu e la silaia tara man taun na man han, me hihatuts na turu katuun te la uaien i Jerusalem.

²³ Ba töa katuun e rangate nen, “O Tsunono, e Sunahan e taguhe nou a topisa puku a katuun?”

²⁴ Be Iesu e ranga palise nen me poeiena turu katuun ti ka gono meien, “Alimiou go torohana hatagalaiam bate sila moua tara tamana a tekteki. Taraha? Alia e ranga mera goulimiou, a katuun a parpara e torohanan tasur romana kaba ema antuna roui.

²⁵ A katuun terena luma e takeina romana bate hapiliena a tamana. Ba limiou tena tuol mia romana ielesala bate ku miou bate poei miou, ‘O Tsunono, kalata berai lam a tamana!’ Kaba nonei e ranga palis ranou limiou romana bate poeiena, ‘Alia ema atei silegi ime te la muma limiou!’

²⁶ Ba limiou temar ranga palis uamiou romana, ‘Alam u nou na ua gono meiou lö, na lö u hihatuts hasia tara taun i tamulam!’

²⁷ Kaba nonei e pei lelena romana, ‘Alia ema atei silegi ime te la muma limiou. Laba namou lia, alimiou u katuun hobotora tara markato a omi!’

²⁸ Alimiou e tare mou romana e Abraham ne Aisak na e Jekop na u propet hoboto te ka ria romana tara Nipepeito tere Sunahan, kaba limiou e lapo ba raria romana ielesala. Ba limiou te tabe hohomi koru miou romana bate kutu hangilngilike miou a liho milimiou.

²⁹ U katuun e la romana rima i pal Iis, Ues, Not, na i Saut, batemi gum ria tara kannou tara Nipepeito tere Sunahan.

³⁰ Hengoiam, u katuun papala ra i romana nori tena pan riou tara pöata, ba pala te panir i romana tena katuun papala riou!”

E Iesu e taatagir u katunura i Jerusalem

³¹ Nonei has tara pöata ba palair u Parasi e la rima me poeier tere Iesu, “Alö go la ban a han teka bate la uaiem tara tana han. Taraha? E Herot e ngilin atung hamate na noulö!”

³² Be Iesu e ranga palis ranen, “La mula batena ranga memiou Herot nonei a katuun a gamogamo, ‘Alia e tsuga ragou u liliahanei u omi na e kato haniga pouts ragou u katuun i romana na i mahö, ba u hatopisana u lan ba lia tena tuku goua tara han te la uagu lia.’

³³ Alia go la noa hasia tara maroro i romana na i mahö na ielisa, batena butu goua i Jerusalem. Taraha? E ma niga nei tegi atung hamate menai a propet tara tana han, egina atung noahasia i Jerusalem.

³⁴ “A tei Jerusalem, a tei Jerusalem! Alimiou e roron atung hamate ramiou u propet na e titi hatu ramiou u katunun raranga te hala mera mei e Sunahan i tamilimiou. A pöata a para tu ngilin gono mera mei lia limiou i tar bate hatongo kap ragou limiou, temar gono mera nei a keriou u tuna i kopina pakapakanen. Kaba limiou u rama iam!

³⁵ Ba han i tamilimiou te kaka pukuna romana. Alia e ranga mera goulimiou, alimiou ema tatei tara lele moi lia e antunana te pei moa limiou, ‘A katuun te la nama tara solona a Tsunono ega sasaala!’”