Kolosi 4 - U Bulunagana U Niga

¹ U katuun pan, alimiou go kato haniga mia turu katunun kui i tamilimiou. Taraha, alimiou e atei sil hase miou alimiou e ka memiou a katuun pan i tamilimiou i Kolö.

U hihatuts

² Alimiou go pile hakarapoto naiam a markato turu singo i tamilimiou bu hakhakats i tamilimiou tema tatei tianei, ba limiou te haniga uamiou tere Sunahan.

³ Na limiou go singo sil has ramoulam be Sunahan te kalatena a maroro tego habulungana menai lam u raranga i tanen bate hatei nem u bulungana tere Kristo, te mous i manasa. Taraha, nonei a ka te karabus sile gulia.

⁴ Alimiou go singo sile moulia be Sunahan te taguhe nou lia ba lia temar ranga uagu temar ngil uanen.

⁵ Hatara naiam a markato a niga na matskö te ka gono mera milimiou u katuun tema hamanari. Hahanei sil nitöa neiam a man pöata a man niga ba limiou te hatei ramien e Iesu.

⁶ Turu mamana u raranga i tamilimiou, alimiou go ranga hatami iam bate ranga namiou u raranga u niga koru, ba limiou te atein ranga palis haniga mia turu katuun hoboto.

U rangan haniga

⁷ E Tikikus e toularara ena hatei ranoui limiou aha te katoe gulia. Nonei a katuun hamana te kui gono mera noulam tara Tsunono.

⁸ Nonei koru a ka te hala sil megien lia i tamilimiou ba nonei te hatei ranoui limiou ime te marka uamu lam, bate kato hasasaala ranou limiou.

⁹ Na lia e hala gono megoien e Onesimus e toularara a niga koru te pala has uana i tamilimiou, nonei e la gono menou e Tikikus. Nori ena hatei raroui limiou a mamanaka te butuna teka.

¹⁰ E Aristakus, te karabus gono menou lia, e hala has ranoui limiou u hanhaniga, na e Mak has a hatoulana tere Banabas. Alimiou u lu hakapeiam u raranga te poeiena, tega la men romana i tamilimiou ba limiou te hanige men.

¹¹ Na e Iesu te ngöeri e Jastus e hala has nena u hanhaniga i tanen i tamilimiou. Nori puku a topisa a Jiu te hamana uar tere Kristo te kui gono meriou lia teka tara Nipepeito tere Sunahan. Na nori i taguhe ioulia me kato hagigaher a torir.

¹² Epapras e hala has mena nei u hanhaniga i tanen i tamilimiou. Nonei e pala has uana i tamilimiou na nonei a katunun kui has tere Iesu Kristo. Nonei e singo hatagalan töa sil ranou limiou, ba limiou te katoe miou a ka te ngilena e Sunahan.

¹³ Na lia has e hatei ragou limiou e Epapras e kui hatagala koru bera noulimiou, na turu katuun hasir i Laodisia na i Hirapolis.

¹⁴ Na e Luk a dokta te ngil korue mulam na e Dimas e hala has ner u hanhaniga i taren.

¹⁵ Hala has naiam u hanhaniga i tamulam tara man hahatoulana na man hahahinana i tamulam i Laodisia. Na hala has neiam u hanhaniga tere Nimpa nu katuun u kristen te roron hagum ria i luma i tanen.

¹⁶ I murina te harit namia limiou u pas teka, ba limiou tena rit has bera mien u katuun u kristenira i Laodisia. Ba limiou te harit has namou u pas te la nama romana i Laodisia.

¹⁷ Ba limiou tena hatei miou e Akipus, alö go kato hamana korui a toukui te halei lö a Tsunono.

¹⁸ Alia e Pol te kolotegi a tsi rangan haniga teka a limar hamatskö. Ma solopalemi lia, alia e ka noa has gia tara karabus. A nihitaguhu tere Sunahan e tatei ka gono mera noulimiou. Nonei talasi. Alia e Pol