Kolosi 2 - U Bulunagana U Niga

¹ Na lia e ngilin hatei ragi limiou, alia u kui hatagala sil koru rilimiou na u katuun hasira i Laodisia te hamanar, na u katuun has tima tara noaia i matar.

² Alia e kato silegu alimiou go sasaalaiam bate hiakaka haniga hoboto miou bate hatagala hase miou u hiangilngil i tamilimiou. Na limiou go atei sil haniga haseiam a manka te hamane milimiou na ka te hamousi e Sunahan i manasa, nonei e Kristo.

³ A mamanaka a niga na niatei na nigumgum a niga e ka hanigan töana i tanen.

⁴ Alia e mar ranga mera gilimiou teka, taraha a tana katuun e namots ranga mera nei limiou u gamo.

⁵ E manana, u tuenrei i tar e ka halehana ba ranou limiou, kaba u hakhakats i tar e ka gonon töa mera noulimiou. Na lia e sasaala megu te atei sil mena gilia te tuol hakarapoto uami limiou bate hamana hatagala mia tere Kristo.

Ka here mi tegi mar ka uu katuun tere Kristo.

⁶ Bara, ti lu hakapa tala mena milimiou e Iesu Kristo a Tsunono i tamilimiou, tataala nitöa talamia turu ualesala i tanen.

⁷ Ba limiou te tuol hakarapoto miou bate hatagala susule muma a mouna u hakats na markato i tamilimiou. Alimiou go atei sil korueiam a markato i tanen bate hamana hatagala mia i tanen, ti mar hatuts merai limiou. Ba limiou te haniga nitöa uamiou i tanen.

⁸ Kaba haneiam, ta katuun ena gamo ranei limiou tu ranga pinopino. Hanei sil raiam u katuun te hihatuts ner a niatei turu tuburen bate poeier e lama tere Sunahan. Nori e hihatuts ner a mankana i puta, u spirit na lo na i manasa, kaba ema ranga uanei tere Kristo.

^9-10 A mamanaka tere Sunahan e kana i tanen, a nikapan na mamana nitagala na niniganiga i tanen e kana turu tuenrei tere Kristo. Nonei a tsunono pan koru te pan saluhe ba rena u tsunono hoboto.

¹¹ Pöata ti hamana mia limiou tere Kristo, nonei e hapurese ba ria limiou turu ngilngil u omi i tuenrei milimiou. Nonei ema katoe ii a ka teka tara markato turu Jiu te hapö mena rien a hatöatongo tere Sunahan tara pal tson. E möa. Nonei e katoeien tara nitagala tere Sunahan.

¹² Pöata ti lueia limiou a baptais, e here ii alimiou i kaho gono merai e Kristo. Na pöata tu hamanaia limiou tara nitagala tere Sunahan, te hatakei poutseia e Kristo tara tou mate i tanen, e here nei e Sunahan e hatakei pouts gono merai limiou e Iesu Kristo.

¹³ I manasa alimiou u ka halhal ba naiam a nitöatöa tere Sunahan, taraha alimiou u katuun u omi na limiou u ka mia ielesala tara Lo tere Sunahan. Kaba i romana e Sunahan e hala gono me ranei limiou na e Kristo a nitöatöa a mana. Nonei e luban a mamana markato a omi hoboto i tarara.

¹⁴ E Sunahan e luban u raranga tara markato a omi ti katoira te saka raira a Lo. E here nei e Sunahan e tapala naia u raranga teka tara kuruse te mateia e Iesu. Me luba hakapaba nitöa nanen.

¹⁵ E Sunahan e luban a nitagala turu liliahanei u omi ra i kolö. Nonei e hamatsingolo raien i matar u katuun tara nitagala tere Kristo te tagala saluhena.

¹⁶ E markato uana teka ba u katuun tema tatei katoeri ta lo tego rangein a saha ka te tatei noue milimiou na te tatei ue milimiou, na egima tatei ona has rai limiou tara man lan a man göagono iahana u hiningal na iahana tsihou na iahana u wik.

¹⁷ A manka hoboto teka e hereri u haharuei papala tuun tara manka tegi butu hamurimuri. Kaba a ka hamana koru ti haharuei sileien, nonei e Kristo.

¹⁸ A palair u katuun e poeier nori e pan ria i matana e Sunahan bate poeier, nori i sinasohi a manka teka tegi haka puta menaira a peisarara bate hatsunono raier u angelo. Alimiou goma hengo ramien te pei mena rien alimiou e kato homimiou. Nori e kato hapan pinopinoer a peisaren te hakats mena rien a markatona i puta.

¹⁹ Nori e ka halhal baner e Kristo. Nonei u baku te hakuiena u tuenrei, te haharuei nena a hun katuun i tanen. Aragi ka hoboto talasi bate hiatagtaguhu nera tegi hamana hatagala uu ra tara pöata te haka pute ria ra a peisarara tere Kristo. Aragi mar niga susul uu te ngil uana e Sunahan.

Alimiou u mate gono meiam e Kristo bate töatöa gono has memen

²⁰ Alimiou u mate gono meiam e Kristo, ga e hana ba limiou te kukute noahasemiou a man markatona i puta?

²¹ “Möa tu pilein, möa tu noueiam, möa tu sebeli.”

²² A manka teka ema ka nitöa noi. E möa. Nori e ba hakapa rariou. Na man lo na man hihatuts teka, u katuun tuun ti hakeien.

²³ A markato teka e tara here nei e kamena a niatei a niga, taraha nonei e kato hatagala sil rena u katuun tegi lotu hatagala uaien bate haka puteier a peisaren bate kato hakamitser a peisaren. Kaba a markato teka ema taguhe nei a katuun tega hapouts menaien u ngil u omi i peisanen.