U Bulungana u Niga tere Iesu Kristo te kolotein e Jon 21 - U Bulunagana U Niga

E Iesu e butuia tara tohit a katunun tsitsilo

¹ I murina a manka teka e Iesu e butu lelia turu katunun tsitsilo i tanen tara Ramun i Galili te ngö haseri a Ramun i Taibirias. Nonei e mar butu u teka.

² Alam mere Saimon Pita, ne Tomas ti ngö hasei “e Didimus,” ne Natanielina i Kena i Galili, na lam a galapien tson tere Sebedi, na huol lel has a aposol i ka gonogono hoboto.

³ Be Saimon Pita e poeiena i tamulam, “Alia ena hagalagu.” Ba lam e poeiem i tanen, “Alam e la gono has memou lö.” Ba lam e sua talam mena hagala halanim, kaba lam uma soohe mei ta töa ta iena.

⁴ A pitala e katsin butuma, be Iesu emi tuolna i kotolana. Kaba alam uma mareien.

⁵ Ba nonei e poeiena i tamulam, “A galapien, alimiou e sooho hase muma ta iena?” Ba lam e poeiem, “E möa.”

⁶ Ba nonei e poeiena, “Lapo menami a abe tara pal matou, ba limiou te soohe mou ta iena.” Ba lam e lapo nem a abe mema antunan las hasei nami a abe tara tolaala, taraha a abe e saputu homi nitöani u iena me katsin takala tununa.

⁷ Ba lia e poeiegu tere Saimon Pita, “Nonei a Tsunono!” Ba pöata te hengoeia e Pita u ranga teka, ba nonei e hasei boroborena u hasobö i tanen me kurapa uana turu ramun me ape sunguna.

⁸ Kaba a palai i la gono mema a tolaala bate las tala naruma a abe a saputu tara iena, taraha nori ima lehana bana ii a kotolana, u tolima u maloto a ngaha puku.

⁹ Pöata tu sung hakapa ma lam, ba lam e tarem u tula te kamei a matsi iena ti höia i tanen, na beret has e ka.

¹⁰ Be Iesu e poeiena i tamulam, “La memuma ta iena te soohe muma limiou.”

¹¹ Be Pita e sei pouts uana tara tolaala me las hasungena a abe iena a saputu. A para koru a iena a kapan, e antunaia tara 153, kaba a abe ema takala ii.

¹² Be Iesu e poeiena i tamulam, “La muma mi nouiam.” Kaba alam uma rangatanai nonei esi, taraha alam u atei sil nonei a Tsunono.

¹³ Be Iesu e hanou ranei lam a beret na iena.

¹⁴ Nonei a hatopisana a pöata teka te butuia e Iesu turu katunun tsitsilo i tanen i murina te takei pouts ien tara tou mate.

E Iesu mere Pita

¹⁵ Pöata tu nou hakapaia lam, be Iesu e poeiena tere Saimon Pita, “O Saimon, a pien tere Jon, alö e ngil hase moulia? U ngil i tamölö e pan saluhe ba nena u ngil turu katuun teka?” Be Pita e poeiena i tanen, “Aa, o Tsunono. Alö e atei silem alia e ngil korue goulö.” Be Iesu e poeiena i tanen, “Ha nou ri u tunan sipsip i tar.”

¹⁶ Be Iesu e rangata hahuol lelena e Pita me poeiena, “O Saimon, a pien tere Jon, alö e ngil hase moulia?” Be Pita e poeiena i tanen, “O Tsunono, Alö e atei silem alia e ngil korue goulö.” Ba e Iesu e poeiena, “Tara kapir u sipsip i tar.”

¹⁷ Ba e Iesu e rangata hatopiseiena e Pita me poeiena, “O Saimon, a pien tere Jon, alö e ngil hase moulia?” Ba torina e Pita e tiama koru tala mei te rangata hatopisa uu e Iesu me poeiena, “Alö e ngile moulia?” Ba nonei e poeiena tere Iesu, “O Tsunono, alö e atei silem a mamanaka hoboto, na lö e atei sil hasem alia e ngil korue goulö.” Be Iesu e poeiena i tanen, “Hanouri u sipsip i tar.

¹⁸ U mana koru alia e ranga hamana megou lö, a pöata tu hitots noaia lö, alö u hula la mei u ngil peisa i tamölö. Kaba pöata te tsonpan mia romana lö, balö te hasoa nemou a limamölö ba palair u katuun te kitse riou lö bate na piou naria lö tara makum tema ngilin la uamilö.”

¹⁹ E Iesu e mar ranga uu teka bate haröto nena temar solosei mena nei romana e Pita e Sunahan tara pöata te atung hamate rien romana. Be Iesu e poeiena i tanen, “Kukute mou lia.”

E Iesu mere Jon

²⁰ Be Pita e habirits uana i muriren me tare noulia, tu kukute mera meien lia, alia tu ngil korui e Iesu. (Alia a katuun tu habuaia tere Iesu tara kannou me poeiegu, “O Tsunono, esi nonei te haröto nanou lö turu katuun te paköe riou lö?”)

²¹ Ba pöata te tareia e Pita alia, ba nonei e poeiena tere Iesu, “O Tsunono, aha te butuna romana tara katuun teka?”

²² Be Iesu e poeiena i tanen, “Te ngile gia lia nonei ega töatöa nitöa e antunana tara pöata te kopis pouts guma romana lia, a ka teka ema ka uanei i tamölö. Kukute mou lia!”

²³ Ba u raranga e tala uana turu katuun hoboto tere Iesu te pei menaien alia ema antunan mate gi romana. Kaba e Iesu ema pe ii alia e Jon ema mate gi romana. E möa. Nonei e pei lasi, “Te ngile goua lia nonei ega töatöa nitöa e antunana tara pöata tena kopis pouts guma romana lia, a ka teka ema ka uanei i tamölö.”

²⁴ Alia e Jon, a katunun tsitsilo tere Iesu te koloto negu a manka teka. Alia u tara peisein a matar balia te hatei nagen, na lam e atei silem te mana uana u raranga teka.

²⁵ Kaba e Iesu e kato hasi a man palaina a manka a man parpara. Na sanena a manka teka gi koloto hakapa hoboter, ba han i puta teka te moa nou ta makum tegi haka raia a man buku teka.