U Bulungana u Niga tere Iesu Kristo te kolotein e Jon 10 - U Bulunagana U Niga

A tsonun taratara kap a niga turu sipsip

¹ Be Iesu e poeiena, “U mana koru alia e hatei hamana ragou limiou, a katuun te raman tasuna tara tamana tara ololon sipsip bate aroho tuun na tara tana makum, nonei a katuun a kopkop.

² Kaba a katunun pepeito kap turu sipsip e roron tasu silana tara tamana.

³ Na katunun pepeito kap tara tamana e kalata nanei a katuun teka a tamana. U sipsip hoboto e atei siler temar ling uana a runguna a katunun pepeito kap i taren, na nonei e atei sil hoboto rena a man sipsip i tanen ne ngö has raneien a man tötöa a man solo i taren ba nori te kukutie ren bate lakasar.

⁴ Pöata te halakasa hakapa hoboto relalen a man sipsip i tanen ba nonei te mammam ranen ba u sipsip i tanen te kukute ren taraha nori e atei siler a mar ling tara rungunen.

⁵ U sipsip i tanen ema tatei kukutieri a tana katuun, nori e bus ba naroien, taraha nori ema hengo mareieri u mar ranga tara tana katuun.”

⁶ E Iesu e kato u haharuei teka turu katuun, kaba nori ima atei sile ii aha te ranga naien.

E Iesu e here nei a katunun pepeito kap a niga turu sipsip

⁷ Be Iesu e pei lelena i taren, “U mana koru alia e hatei hamana koru ragou limiou, u katuun e hererari u sipsip na lia e heregi a tamana tara ololon sipsip.

⁸ U katuun ti mam na moulia, nori u kopkop na u gamogamo kaba u sipsip ima hengo raien.

⁹ Alia a tamana turu sipsip. A katuun te sila noua tara tamana teka ena niga nou, taraha alia e tara kap nagouen. Nonei e tatei tasu nama romana bate lakasa poutsuna batena höata lana.

¹⁰ A kopkop e la sil tuun lase nama tegomi kop uu bate atung hamate rena u sipsip. Alia u la silema tegimi lu menai u katuun a nitöatöa, a nitöatöa a niga nitöa.

¹¹ “Alia e heregi a katunun pepeito kap a niga turu sipsip te tatei mate sil rena u sipsip i tanen.

¹² A katunun kui tuun e bus ba rena u sipsip tara pöata te la nama a muki a hie, taraha nonei ema tue ranei u sipsip na nonei ema katunun pepeito kap hamana has uanei turu sipsip. Ba muki a hie tena kotokoto rena u sipsip bate rura ranen.

¹³ Nonei e busmena, taraha nonei a katunun kui tuun batema hakats sil tala ranei u sipsip. Na e markato has uana turu katuun u gamogamo tema pepeito kap haniga rari u katuun i tar.

^14-15 “Alia e heregi a katunun pepeito kap a niga turu sipsip te atei sil rena u sipsip i tanen na u sipsip i tanen e atei sil hase ren. Alia e atei sil regu u katuun te hamana uar i tar ba nori te atei sil hase riou lia. Na e markato has uana iesana tere Tamar. Nonei e atei sile noulia na lia e atei sil hase gen. Na lia e mate sil ragou u katuun i tar.

¹⁶ A palair u katuun has i tar e ka ria ielesala tara ololon sipsip i tar. Alia ena peigi has ragumen romana ba nori te hengoe riou u raranga i tar. Bate ka menou a töa puku a heis sipsip na töa puku a katunun pepeito kap i taren.

¹⁷ E Tamar e ngil korue noulia, taraha alia e haniga negu tego mate uu lia ba lia te töatöa pouts gou.

¹⁸ E möa ta katuun ga antunan atung hamate naiou lia turu ngil i tanen. Alia peisa te hala nagou a peisar tara tou mate. Alia e ka megu a nitagala tego haniga uu lia ba u katuun te atung hamatie riou lia, na lia e ka has megu a nitagala tego töatöa pouts uu lia. Nonei a ka te ranga mei lia e Tamar tego katoi lia.”

¹⁹ U Jiu i hengoein u raranga teka ba nori e lu kate ria a peisaren a huol a pala.

²⁰ U katuun u parpara i pei, “U liliahanei e ka mer a katuun teka na nonei e momolöna. Aha te hengo sile mien limiou?”

²¹ Kaba palai i pei, “E möa. A katuun te ka mena a liliahanei ema tatei ranga uanei teka. A liliahanei e antunan kato hakalata hasena a matakiou? E möa!”

U Jiu i tori tsugani e Iesu

^22-23 Tara pöata teka a kannou pan tara Luman Lotu Pan egi kato poneia i Jerusalem. A pöatan hamuri poni be Iesu e tataala lana i rehina Luman Lotu Pan turu kake ti ngöei u kaken oho tere Solomon.

²⁴ Ba u Jiu e gono hahise ren me poeier i tanen, “Alam e mate las memou te hahaloso uamou lam. Hatei hamatskö ramou lam, alö e Mesaia te hala nema e Sunahan tsi e möa?”

²⁵ Be Iesu e poeiena i taren, “Alia u hatei raiou limiou, kaba alimiou ema hamane milia. A man mirakol na man hiharöto te katoe gulia tara solo tere Tamar te hatei nena te mana uana u raranga i tar.

²⁶ Kaba alimiou ema hamane milia, taraha a limiou ema sipsip uami i tar.

²⁷ U katuun i tar e hengo mareier a mar ranga i tar. Alia e atei sil ragen, na nori e kukute hase riou lia.

²⁸ Alia e hala ragouen a nitöatöa te ka nitöana ba nori tema tatei tia roi romana. E möa ta töa ta katuun tega antunan gul ba rai lia u katuun i tar.

²⁹ E Tamar e hala rai lia u katuun teka na nonei e pan bala nena a mamanaka hoboton töa ne möa ta katuun ga antunan lu baraien i limana e Tamar.

³⁰ E Tamar na lia a töa puku a katuun.”

³¹ Ba u Jiu e lu poneier a man hatu tegi ti menaien e Iesu.

³² Kaba e Iesu e pei i taren, “Alia u haröto rai limiou a mamana toukui a niga tere Tamar. Ga saha mar toukui te katsin titi hatu memi limiou alia?”

³³ Ba u Jiu e palise ren me poeier, “Alam ema ti hatu memoi lö tu kato mei lö a toukui a niga. E möa. Alam e raharaha mem te ranga homi mena milö e Sunahan. Taraha, alö a katuun tuun, kaba alö e kato here nami a peisamölö e Sunahan.”

³⁴ Be Iesu e palis ranen me poeiena, “I koloto hakapa naia turu Buku u Göagono i tamilimiou te pei mei e Sunahan, ‘Alimiou e heremi u sunahan.’

³⁵ Na u ranga turu Buku u Göagono ema antunan kapa nei. Na e Sunahan e pei nori u katuun ti halarai u raranga tere Sunahan i herei u sunahan.

³⁶ Alimiou e antunan ranga hasimiou bate peimiou, a katuun te kato hagöagoni e Tamar me tula mena meien i puta e ranga homi nena e Sunahan te pei mena neien, ‘Alia a Pien tere Sunahan.’ Ge hana ba limiou te mar ranga uamiou teka?

³⁷ Tema katoe gi lia a man toukui tere Tamar, möa tala tu hamane moulia.

³⁸ Kaba te katoegien lia, noahasina tema hamane milimiou alia, hamana mia tara toukui i tar ba limiou te atei sile mou e Tamar e kana i tar na lia e ka has gia i tanen.”

³⁹ Ba nori e katsin pile kap lel pon naren, kaba nori ma pile sabe naien.

⁴⁰ Ba nonei e la pouts uana i hapalana a Ramun i Jodan mena kana tara han te baptais mam ia e Jon.

⁴¹ A katuun a para i lauama i tanen me hiararangar me poeier, “E Jon ema haröto nai tu mirakol, kaba a mamanaka te hatei naien tere Iesu e manana.”

⁴² Ba u katuun u parpara teka e hamana uar tere Iesu.