U Bulungana u Niga tere Iesu Kristo te kolotein e Jon 1 - U Bulunagana U Niga

U Rangana tara Nitöatöa

¹ Tara tantania e kamei u Ranga, u Ranga e kagono mei e Sunahan na u Raranga teka nonei e Sunahan.

² Nonei e ka gono mei e Sunahan tara tantania.

³ E Sunahan e habutu silanaia a mamanaka turu Ranga. E möa ta töa taka tega butu peisa. A mamanaka e butu sila lasia turu Ranga.

⁴ A nitöatöa e kaia i tanen, na nitöatöa teka u ualesala turu katuun hoboto.

⁵ Nonei u ualesala teka e halesalena u kuhil, na u kuhil ema antunan kopo kap naien.

⁶ E Sunahan e hala nema a töa a katuun a solonen e Jon.

⁷ E Jon e la silema tegomi hatei meraien u katuun u ualesala teka, ba u katuun hoboto te tatei hamane ren.

⁸ Nonei u ualesala teka ema Jon nei, kaba nonei e la silema tegomi hatei meraien u katuun nonei u ualesala.

⁹ Nonei hamatskö koru u ualesala teka te halesala rena u katuun hoboto e lauama i puta.

¹⁰ Nonei e lauama tara han i puta te habuteien, kaba u katunura i puta ima mareien.

¹¹ Nonei e la uama turu katuun i tanen kaba nori ima ngileien.

¹² Kaba turu katuun ti lu menaien i taren na ti hamana korueien, nonei e hala raien a nitsunono tegi pien uaien tere Sunahan.

¹³ Nori i posa lelir, kaba ima mar posa lel merai te hatuhana meri a pien te butunama tere tamanen na e tsinanen na i puta. E möa. Kaba a nituhana teka e la nama tere Sunahan.

¹⁴ U Ranga e butun katunuma memi kana i gusurara. Nonei a tsonun hihitaguhu na tsonuna tara nimana. Alam u tara hakapi a nitsunono i tanen, a mar nitsunono te kamena a töa koru a Pien Tson tere Sunahan, e Tamanen i Kolö.

¹⁵ E Jon e ku hatei naien turu katuun me poeiena, “Nonei a katuun teka tu rangein lia tu pei menai lia, ‘A töa a katuun e kukute nama romana i murir nonei a katuun te pan bala koru nanou lia, taraha nonei e ka mam noahas naiou lia tara Tantania.’”

¹⁶ Na tara nihitaguhu pan i tanen nonei e haniga ranou ra na e hala has ranei ra a nisasaala pan tema tatei kapa nei.

¹⁷ E Sunahan e hala silanama a Lo tere Mosis, kaba u pannen u nihitaguhu na nimana tere Sunahan i habutu sila nama tere Iesu Kristo.

¹⁸ E möa ta töa ta katuun tega tara noabi e Sunahan. Kaba a töa koru a Pien Tson i tanen, nonei has e Sunahan te sukusuku koruna i torina e Tamanen, nonei te haröto raira e Sunahan.

U raranga tere Jon a Tsonun Baptais

¹⁹ Turu töa u lan a pal kapan turu Jiu i Jerusalem i hala mera mei u pris na u Livai tere Jon. Ba nori e rangate ren me poeier, “Alö esi? Alö e Mesaia tega la uama i puta?”

²⁰ Be Jon e holisina me ranga hamatskö mera nen me poeiena, “Alia ema Mesaia gi.”

²¹ “Bara, galö besi koru? Alö e Ilaitsa a propet?” Ba nonei e poeiena, “E möa.” Ba nori e poeier, “Alö toum nonei a propet te hahalose mulam?” Ba nonei e poe lelena, “E möa.”

²² “Galö besi? Alam e ngilem tu raranga go lapouts mei lam turu katuun te tula rari moulam. Alö e ngöeri esi?”

²³ Ba nonei e poeiena, “Alia e heregi a runguna a katuun te ku hapanna tara makum a palaka bate poeiena, ‘Kato hamatsköeiam a maroro, a Tsunono e la nama,’ temar ranga uu e Aisaia a propet.”

²⁴ Ba u Parasi ti hala rema

²⁵ e rangate ren me poeier, “Tema Mesaia mia lö na tema Ilaitsa mia lö na tema Propet hasmia lö, gaha te baptais sil rami lö u katuun?”

²⁶ Be Jon e ranga palis ranen me poeiena, “Alia e baptais negu u ramun tuun. Kaba a töa katuun tema atei sile milimiou e kana i gusumilimiou.

²⁷ E manana a toukui i tanen e kute has nama tara toukui te kuieiegu lia, kaba lia ema gogoso hantue gi tego purese menai lia a kikitsina u sendol i tanen.”

²⁸ A ka teka e butuia tara han i Betani i hapalana a ramun i Jodan, te baptais raia e Jon u katuun.

A Tunan Sipsip tere Sunahan

²⁹ Turu tana u lan be Jon e tarena e Iesu e la uama i tanen, be Jon e poeiena turu katuun, “Taraiam, nonei teka a Tunan Sipsip tere Sunahan. Nonei tena luba nanou a man markato a man omi turu katuun i puta.

³⁰ Nonei a katuun teka tu rangein lia bate poeiegu, ‘A töa katuun e kute nama romana i tar, nonei te pan bala nanou lia, taraha nonei te tuhana mam naiou lia.’

³¹ Alia uma atei sil hasei esi nonei koru e Mesaia. Kaba lia emi baptais mei u ramun tego halakasa mei lia e Iesu turu katunura i Israel.”

³² E Jon e baptaisi e Iesu, ba i murinen ba nonei e poeiena, “Alia u tari u Namnamei u Göagono tere Sunahan e koul here mei a kulu i Kolö memi tö na i tanen.

³³ Alia uma atei silei esi koru nonei e Mesaia. Kaba e Sunahan, te hala namou lia tegomi baptais merai lia u katuun u ramun, nonei e poei i tar, ‘Alö ena tare mou u Namnamei tere Sunahan e koul nama romana batemi tö na tara töa katuun. Nonei a katuun teka tena baptais nanou u Namnamei u Göagono.’”

³⁴ Be Jon e poeiena, “Alia u tari a ka teka e butuia tere Iesu Kristo, na lia e hatei hamana ragi limiou, nonei a Pien Tson tere Sunahan.”

U katunun tsitsilo tutuun tere Iesu

³⁵ Turu tana u lan be Jon e tuol gono pon meraiena a huol a katunun tsitsilo i tanen.

³⁶ Ba pöata te tareien e Iesu e tataalama ba nonei e poeiena, “Taraiam nonei a Tunan Sipsip tere Sunahan i tioum.”

³⁷ Ba huol a katunun tsitsilo tere Jon e hengoeier u ranga teka me kukutier e Iesu.

³⁸ Pöata te habirits ia e Iesu me tarena ti kukute uamen ba nonei e poeiena i taren, “Alimiou e sake miou aha?” Ba nori e poeier i tanen, “O Rabai, ime tena soho moa lö?” (Rabai e poeiena, tson hihatuts.)

³⁹ Ba nonei e poeiena i taren, “Mi taraiam.” Ba nori e la gono meren mena ka gono meren nonei turu lan teka. A ka e 4 kilok hamanasa tara lahi.

⁴⁰ A töa tara huol a katuun teka ti hengi u raranga tere Jon, e Endru e toulana e Saimon Pita.

⁴¹ Be Endru e la hamatsköna tere toulanen e Saimon me poeiena i tanen, “Alam e sabie muma e Mesaia.” (E Mesaia e ngö haseri e Kristo.)

⁴² Ba nonei na piou nena e Saimon tere Iesu. Be Iesu e tare nen me poeiena, “Alö e Saimon, a pien tson tere Jon. Alö e ngöe roi e Sipas” (te poe hasena, “e Pita,” na te poe hasena, “a Hatu”).

E Iesu e ngö rena ere Pilip mere Nataniel

⁴³ Turu tana u lan e Iesu e hakatsin tega lauen tara han i Galili. Nonei ena sabi e Pilip me poeiena i tanen, “Kukute mumou lia.”

⁴⁴ E Pilip a toun Betsaida, a taun tere Endru mere Pita.

⁴⁵ Be Pilip e na sabe leleiena e Nataniel me hateie nen, “Alam e sabie muma e Mesaia, a katuun te koloto bin e Mosis nu propet i manasa! Nonei e Iesu a toun Nasaret, a pien tere Josep.”

⁴⁶ Be Nataniel e poeiena, “E möa ta ka ta niga tega tatei butuia i Nasaret.” Be Pilip e poeiena, “Lama balö temi tara peisam.”

⁴⁷ Pöata te tara raien e Iesu ba nonei e ranga nena e Nataniel me poeiena, “A toun Israel hamana te la nama teka. Nonei ema tatei gamogamo nei.”

⁴⁸ Be Nataniel e rangatena e Iesu, “Ime temar atei sil mena milö alia?” Be Iesu e ranga palise nen, “U hakhakats tuun i tar te tare lalou lö i mouna u ruein fik i mamina tena ngöe lala lö e Pilip.”

⁴⁹ Be Nataniel e poeiena, “O Rabai, alö a Pien tere Sunahan! Alö a katuun te hopö kap bin e Sunahan tego Kingia i Israel!”

⁵⁰ Be Iesu e rangate nen, “Alö e hamana mem te poe mena gulei lia, alia e tare gulo lö i mouna u ruein fik? Alö ena tare mou romana a man mirakol te pan bala nena a ka teka.

⁵¹ U mana koru alia e hatei ragou limiou, alimiou e tare mou romana u Kolö e kalata nou ba u angelo tere Sunahan te sei ria romana i tar bate koul pouts has rima romana i tar, Alia tu butun Katunuma.”