Jemis 4 - U Bulunagana U Niga

U katuun e ngiler a markatona i puta

¹ Aha te habutena a hiaraharaha na hiatatung i gusumilimiou, na ime te la rumen? A markato teka e butuna turu ngil u omi te hiatagtagala ria i torimilimiou.

² Alimiou e matesilemiou a manka tema ka memi limiou bate rarahe miou a katuun. Alimiou e ngil koruemiou a manka tara tana katuun, ba limiou te hia e ele miou bate hiatatung memiou a tana katuun. Alimiou ema ka memi taka, taraha limiou ema singo sile mien tere Sunahan.

³ Na pöata te singo sile mia limiou taka, ba limiou tema lu hase mien. Taraha, limiou e singo gono memiou u tori u omi. Alimiou e ngil lasemiou a ka te tatei hakapena u ngil i peisa milimiou pouts.

⁴ Alimiou e hapolasa ba namiou e Sunahan bate heremi a tahol a hitöl te kato homina. A katuun te ngilena a markatona i puta e kato homi hasena e Sunahan. Na lia e hatei ragi limiou, u ngilngil na markatona i puta e paköena e Sunahan.

⁵ U raranga tere Sunahan ema ranga papala nei te pei mena neien, “U namnamei te hakeia e Sunahan iaharara e ka mena u ngil u tagala, u ngil te kamena a hiomi pan koru.”

⁶ Kaba u nihitaguhu tere Sunahan e tagala bala nena u ngil i tarara. U raranga tere Sunahan e pei hasena, “E Sunahan e tokitoki nena a katuun te hangisena ba nonei te taguhena a katuun te hateteneiena a peisanen.”

⁷ Ba limiou te haka putemiou a peisa milimiou tere Sunahan. Alimiou go tuol kakap neiam e Satan ba nonei te bus ba ranou limiou.

⁸ La hasukusuku uaiam tere Sunahan, ba nonei te la hasukusuku has uanama i tamilimiou. Kato hagogoso poutseiam a peisa milimiou, alimiou tu kato homi iam. Kato haniga poutseiam a torimilimiou, alimiou te hula hakatsmiou.

⁹ Kato here nami a peisa milimiou a katuun te hahurina, ba limiou te tabemiou. Gol hanöaiam, ba limiou te ngala tuun miou. Sasaala hanöaiam, ba limiou te mataloho tuun miou.

¹⁰ Alimiou go kato hateteneiam a peisa milimiou i matana e Sunahan, ba nonei te haka sei ranou limiou.

Alimiou goma tus rami a man hahatoulana

¹¹ A matsi hahatoulana, alimiou goma hiararanga homi mi. A katuun te ranga homi nena e toulanen e ranga homi has nena a Lo tere Sunahan. Na katuun te oneiena e toulanen bate pita pute nen e pita puta hasena a Lo. Kaba limiou go kukute hanigeiam a Lo. Nonei a toukui i tamilimiou. Alimiou goma peiemi a Lo e omina tsi e nigana.

¹² E Sunahan a töa puku te haleiema a Lo na te tatei ona hamatskö rena u katuun. Nonei e antunan luba rena u katuun tara nomi na nonei e antunan kato hamate has rena u katuun. E markato uana teka, alimiou goma onemi esi te nigana na e si te omina.

Alimiou goma ranga seseimi

¹³ Hengoiam, alimiou te peiemiou, “I romana tsi i mahö a ra e lauara tara töa taun bara tena ka roua i tanen turu töa u hiningal. Ba ra te katoe rou a toukuin moni bate lue rou a moni pan.”

¹⁴ Kaba limiou ema atei silemi aha te butu nou i mahö, na limiou ema atei sil hasemi a saha mar nikaka te ka memou limiou. Alimiou e here mi u ruhu te gamon butuna bate tia poutsuna.

¹⁵ Alimiou go pei lasiam, “Te go ngil uu e Sunahan bara te tatei ka lel riou bate katoera a ka teka tsi a ke li.”

¹⁶ Kaba alimiou ema markato uami teka. E möa. Alimiou e ranga sesei namiou a manka a man kapan tena katoemi limiou romana. U mar ranga teka e omina.

¹⁷ E markato uana teka, a katuun te atei silena a markato a matskö batema katoe neien, a katuun teka e kato homina.