Jemis 3 - U Bulunagana U Niga

Kahete hanigein u ranga

¹ A matsi hahatoulana, möa tu riri sileiam tegona hihatuts menami limiou a markato a nigana tere Sunahan. Taraha, e Sunahan ena tara hatagala koru noa romana tara pala te hatuts raier u katuun, tegi hihatuts homi uaien.

² Te antunan hakui nena a töa katuun a rungnen batema ranga nanei ta ka ta omi, a katuun teka te antunan hakui haniga hasena a peisanen hoboto.

³ Ara e tatei hakera a leten laslas i runguna a hos bate hakuiera a tuenreinen hoboto temar ngil uarara.

⁴ Na tolaala has. A tolaala pan e la mena a lomolomo a tagala, kaba a tson tou e tou mena neien ime te ngil uanen tara pöata te kui noahase nen a hosen tou a tetenei.

⁵ Na miana a katuun e kato has uana iesana. U mia, nonei a makum a tetenei turu tuenrei hoboto, kaba nonei e tatei ranga sesei nena a manka man kapan. U tula u tetenei e tatei haatsena a latu pan.

⁶ Na u mia i tarara e kato has uana turu tula. Nonei a töa puku a makum turu tuenrei, kaba u mia i tarara e antunan kato homi pouts has ranoura, na ra e tatei kato homi pouts hasera a peisarara. Ara e antunan kato homiera a nikaka hoboto i tarara te ranga homi uana u mia i tarara. U mia e kato uana tara han a omi i hel te haranga rena u katuun u omi ba nori te ranga homi nitöar, e here nei u tula pan te roron habutena u tana u tula u parpara.

⁷ A katuun e antunan haleneiena a manka a man tötöa hobotora i puta, na nonei e halena hakapa hasir a mankana i latu, na u apena, na manka te sil na turu tsiktsiki, na u iena.

⁸ Kaba e möa ta katuun tego antunan kato halena a mianen bate ranga haniga nitöana. U mia e ranga papala tununa. Nonei e kato herenei a kökötsi a matuna te hihikotona.

⁹ A mia rara e ranga hanigana na e ranga homi hasina. Ara e ranga haniga nera e Tamarara a Tsunono, na ra e ranga homi has nera a katuun, e Sunahan te kato here naia a katuun a peisanen.

¹⁰ U ranga u niga na u ranga u omi e butuna turu töa u mia. A matsi hahatoulana, a ka teka ema niga nei.

¹¹ U ramun u angata na u ramun u mal e tatei butu nama tara töa kiou? E möa. Na u tasi ema tatei habutu hase nei u ramun u angata.

¹² Na huana u kutu e antunan pusukuna turu ruein kakau? E möa tala. Na huanu kakau ema butu has neia turu uele. Na te markato has uana u mia.

U hakats u nigana iasa

¹³ Te kana a katuun te hakats hanigana i gusumilimiou, nonei ega kato haniga has. Nonei e tatei kato hateteneiena a peisanen bate haröto nena a markato a niga i tanen te butu nama turu hakats u niga.

¹⁴ Kaba te tori homi koru na mialimiou a taina katuun ba limiou te hakats nemiou a peisa milimiou peisa, alimiou e gamo ramiou u katuun bate poeiemiou, “Alia a katuun a niga na lia e hakats hanigagu.”

¹⁵ U mar hakats teka ema butu nameia iasa. E möa. E butuna i puta. Ema markato uanei te hakats uana u namnamei u niga. E kato uana te hakats uana e Satan.

¹⁶ Pöata te hiomi ria u katuun bate hakats ner a peisaren peisa, a nitutu na mamana mar niomi e butuna i gusuren.

¹⁷ Kaba a torina a katuun te kamena u hakats u nigana iasa e gogosona bate roron nolo pouts has rena a palai te hiaraharahar. Nonei a katuun a kakamoto na e hahengona tara tana katuun. Nonei e taatagi koru silena a katuun na e ka mena a markato a niga. Nonei e atei silena ime tega markato uaien, na nonei ema gamoe nei a tana katuun.

¹⁸ A katuun te roron nolo pouts rena a palai te hiaraharahar e kato uana tara katuun te lebeiena a kannou bate lue nou a hua i tanen i murimuri. Taraha, nonei a katuun teka e nolo pouts rena u katuun bate nigana i matana e Sunahan, na nonei e taguhu rena a palai ba nori te kato has uar iesana.