Jemis 2 - U Bulunagana U Niga

Ngil hoboto reiam u katuun

¹ A matsi hahatoulana, alimiou goma poeiemi a tson moni e nigana na katuun papala e omina. E möa. U mar hakats teka ema niga nei turu katuun te hamana uaier tere Iesu Kristo a Tsunono Pan i tarara.

² Tara, te tasunama a tson moni tara luman lotu te kamena u hasobö u niga na manka man kankanaha, na te tasu has nama a katuun papala te ka mena u hasobö u omi.

³ Balö te tara mareiem a katuun te ka mena u hasobö u niga bate poeiem i tanen, mi gum ia teka tara makum turu tsunono. Balö te poeiem tara katuun papala, alö go na tuol ia tara makum ili turu katuun papala, tsi alö go gum ia i puta teka i rehina mour.

⁴ Te markato uamu lalö teka, ba lö te poeiem a töa katuun e niga bala nena a tana katuun. A mouna u hakats i tamölö e omina.

⁵ Hengoiam, a matsomi i tar. E Sunahan e hopö kapir u katuun papala tara han i puta, u katuun te hamana haniga uaier tere Sunahan. Be Sunahan te poeiena u mar katuun teka te ngile nen, e lue riou a Nipepeito tere Sunahan.

⁶ Kaba alimiou e sigala ramiou u katuun papala. U tson moni nori te pitaputa rariou limiou bate kout rariou limiou.

⁷ Nori u katuun te ranga homi ner a solo a niga tere Iesu Kristo te pala uami limiou.

⁸ Te kukutie moa limiou a lo pan tere Sunahan ti kolotein, alimiou e kato hanigamou. Taraha, a lo pan tere Sunahan e poeiena, alö go mar ngil koru mei a tana katuun temar ngil koru has mena milö a peisamölö.

⁹ Kaba te tara tune mia limiou a katuun ielesala bate poeiemiou, a töa te nigana na tai e omina, alimiou e katoemiou a markato a omi, bate pekoemiou a lo tere Sunahan.

¹⁰ Taraha, a katuun te kukute hanigeiena a man lo hoboto tere Sunahan bate pekoena a töa puku, nonei e kato uana tara katuun te pekoena a man lo hoboto.

¹¹ E Sunahan e poei, alö goma tsikolo ii, na nonei e pei hasi, alö goma hipöli ii. Te ma tsikolo mia lö kaba lö e puliem a tana katuun, alö e peko noahasem a lo tere Sunahan.

¹² E Sunahan e ona mera nei limiou romana a man lo te purese ba nena a katuun tara markato a omi. Te marka uanen teka ba limiou te ranga hanigamiou bate kato haniga hasimiou.

¹³ E Sunahan ema antunan taatagi nanoi a katuun tema taatagi nanei a tana katuun. Kaba te taatagi namia limiou a tana katuun i romana, be Sunahan te taatagi has ranou limiou romana tara pöata te butuna u kout i tanen.

A nihamana na markato

¹⁴ A matsi hahatoulana, u palair u katuun e poeier, “Alia e hamana hanigagu,” kaba nori ema kato hanigari. A mar nihamana teka e la papala tununa. Na mar nihamana teka e taguhu has ranou u katuun?

¹⁵ Hena, a töa katuun ega möa tu hasobö na kannou i tanen ema antuna has nei.

¹⁶ Ba lö te poeiem i tanen, “La tala mela a niniganiga. Alö go na meimei ba lö tena nou hantuem.” Kaba lö ema hale mien tu hasobö tsi ta tsi kannou. Ga markato teka ema niga tala nei.

¹⁷ A markato turu nihamana e katouana teka: tema hatara nanei u nihamana i tamölö ta toukui ta mana, u nihamana i tamölö e matena.

¹⁸ A töa katuun e tatei poeiena, “A palai e hamana hanigar na palai e kamer a markato a niga.” Kaba, te hamana mia lö batema kamemi ta markato ta niga, ga ime temar atei sil megoi lia u nihamana i tamölö? Kaba, alö e tatei tara sila namia te hamana haniga uagu lia, tara markato i tar.

¹⁹ Alimiou e mar hamana uamiou teka: e Sunahan a töa puku. Bara! Kaba a nihamana teka ema antunanei. Taraha, u liliahanei u omi e hamana has uaier iesana, ba nori te toltololo mer a nimatout.

²⁰ Alimiou u katuun u tutu tema atei silemi a ka teka: a katuun te poeiena nonei e hamana hanigana kaba nonei ema kato haniga nei, nonei e mastein hamanana.

²¹ Hena, e Sunahan e hatara raira te kato hamatskö uu e tuburara e Abraham i matana e Sunahan tara pöata te hakeia e Abraham a pien tson i tanen e Aisak tara makumun haats.

²² E Abraham u nihamana i tanen e kui gono mei a markato a niga i tanen. Na markato a niga i tanen te hatarein u nihamana i tanen.

²³ Na u raranga tere Sunahan i manasa e butu hamana tala, taraha e poeiena, “E Abraham e hamani e Sunahan, be Sunahan e ngöe neien a katuun a matskö i matanen.” Na nori i ngö haseien a hahikapien tere Sunahan.

²⁴ Ba limiou te tatei atei sil talemiou a ka teka: a katuun te kato hanigana e nigana i matana e Sunahan. Kaba te hamana puku nen, ema antunanei.

²⁵ Na e markato has uana iesana tara pöata tere Rehap a tahol tema Jiu ii e hapolasa ba hasiin a markato te lulu tson uaien i manasa. Nonei e lasir a pal tson te hala rema e Josua mena hamous ranen me hala kopis pouts ranen tara tana maroro. Be Sunahan e ngöe neien a tahol a matskö i matanen te markato haniga uaien teka.

²⁶ Alimiou e atei silemiou a tuenrei na katuun e matena te ka halhal ba mena neien u namnamei i tanen. Na e kato has uana iesana tara nihamana na markato. A katuun te poeiena nonei e hamana hanigana kaba nonei ema kato haniga nei, u nihamana i tanen e la papala tununa.