Hibru 9 - U Bulunagana U Niga

U lotuna i puta na u lotuna i Kolö

¹ U hia hanhaniga te kato mami e Sunahan e ka mei a man lo turu lotu, na e ka has mei a luman lotu ti kui u katuun.

² Nori i hatakei a luman lotu labalaba te ka mei a huol a makum. A makum tutuun i pal biou i ngöei a Makum a Göagono te kaia a makumun gum turu lam na u tebol na beret ti hala menai tere Sunahan.

³ Na e ka has mei u huol u labalaba te kute has, na i murina u hahuoluna u labalaba e ka mei a tana makum ti ngöei a Makum a Göagono Koru.

⁴ Iahana makum teka e kaia a tsi makumun haats ti kuie ii a goul na ti haatseia u insens, na te ka hasia a bokis turu hia hanhaniga ti kits me kopo kap hoboto nari a goul. Iahana a bokis e kaia a tabeli goul te ka mei a kannouna i manasa ti ngöei u Mana, na u tukana tere Eron te alanga pouts, na huol a hatu ti koloto naia u hia hanhaniga ti kitsi.

⁵ Na iasa tara bokis e kaia a huol a ka ti ngöei a tserubim ti haharuein u ualesala tere Sunahan, na pakapakaren e tapalata bate hohena a makum te luba nai e Sunahan man markato a man omi, me ngöe rien a makum tara nihitaguhu. Kaba alam ema ngilin ranga bala nami a manka teka.

⁶ Na pöata te matskö hakapaia a manka hoboto teka, ba u pris e tasu birbirits tuun ria iahana makum tutuun i pal biou tina kato menaien a toukui i taren.

⁷ Na tsunono pan turu pris puku lasi a töa te tasuia iahana a Makum a Göagono Koru, nonei e ron tasu a töa puku a pöata tara man tötöa man hiningal. Nonei e roron lui u rahatsing bate töan tasu menen ba tena hala sile neien a peisanen na u katuun has ti kato homi kaba ima atei sile ii ti kato homi uaien.

⁸ U Namnamei u Göagono e hatalesala ra neira a maroro tegi la uu ra tara makum a göagono ema butu halesala noa ii. E markato uana teka, a makum tutuun e haharuei nena a markato na tara Lo na i manasa te antunana i romana. Na Makum a Göagono Koru e haharuei nena a makum te kana e Sunahan ema kalata noa nei tara pöata te ka noa ria u katuun tara luman lotu ti katoe ii u labalaba tuun.

⁹ Tara makum tutuun teka u pris i roron hala menai a man kaan haats ti halhala pukuni tere Sunahan, kaba nori ima antunan kato hagogose ii a torir u katuun ti la uu turu lotu.

¹⁰ Nori i ka las mei a markatona tara kannou na tou ua na mamana mar nigalus. Nori i ranga lasiin a man kana turu tuenrei e antunana tego hamatskö menai e Sunahan a mamanaka a tsimus.

¹¹ Kaba e Kristo e butu hakapa, na nonei a pris a tsunono pan tara mamanaka a nigana i romana. Nonei e tasu hakapaia tara luman lotu panina i Kolö. U katuun tima kuieien na ema luman lotu uanei tara han i puta.

¹² E Kristo e tasuia iahana makum hamatskö te kana e Sunahan a töa puku a pöata, bate antunana tara mamana pöata hoboto. Nonei ema tasu mei u rahatsingina meme tsi a tunan bulmakau. E möa. Nonei e tasu mei u rahatsing peisa i tanen bate sakahis pouts nitöa mera nei ra tere Sunahan.

¹³ Tara markato turu Jiu, u rahatsingina meme na bulmakau a tson na u kumahoana tara tunan bulmakau e tsibil naria turu katuun tegi gamon kato hagogoso meraien ba nori te tatei lotur.

¹⁴ Kaba u rahatsing tere Kristo e tagala koruna. Tara nitagala turu Namnamei te ka nitöana, e Kristo e hala menai a peisanen tere Sunahan na nonei e möa ta töa taka ta omi tega kaia i tanen. U rahatsing i tanen e galus ban u hakhakats u omi, te ka uana tara tou mate, bara te tatei kui beiera e Sunahan te ka nitöana.

¹⁵ E Kristo te habutu u rangan kits u tsimus tere Sunahan na u katuun, ba u katuun te ngöri e Sunahan te tatei lueier a manka a man niga te ranga hamanein e Sunahan bate ka nitöar. Taraha, e Kristo te mate, na tou mate i tanen te sakahis ba rai u katuun a man markato a man omi ti katoeien tara pöata turu rangan kits mam.

^16-17 Tara pöata te hopö kap nena a katuun u raranga i tanen te poeiena esi tena lue nou a manka i tanen i murina tego mate uaien, u ranga teka ema tagala nei tara pöata te töatöa noa nen. Kaba i murina a tou mate i tanen, u raranga e butu hatagala koru nou.

¹⁸ Te marka has uaien i manasa, taraha u rangan kits ti kato mami e tagala las mei u rahatsingina ka ti kato hamateien.

¹⁹ E Mosis e hatei mam rai u katuun a man raranga hoboto te kana tara Lo. Ba nonei te töan lueiena u rahatsing tara tunan bulmakau na meme, me sohala gono meneien u ramun, me hakeie nen turu hulu u rörö tara sipsip na tara kalan ruei ti ngöei u hisop, me tsibil nanen turu bukuna tara Lo na turu katuun hoboto.

²⁰ Ba nonei e poeiena, “Nonei u rahatsing teka te kato hatagalena u raranga te kits gono merai limiou e Sunahan.”

²¹ E Mosis e markato noahas uu iesana me tsibil nena u rahatsing tara luman lotu labalaba, me tsibil has nanen tara manka hoboto turu lotu.

²² Tara markato tara Lo, a mamanaka a parpara e kato hagogoseri u rahatsing. Na e Sunahan e luba las menei a man markato a man omi u rahatsing tara ka te ngats hamateier.

E Kristo e halan a peisanen tego luba menaien a man markato a man omi

²³ A mamana a man kana turu lotu teka te kato hagogoseier bate haharuei tuun nena a manka a man mana na i Kolö. Kaba a manka ni Kolö egi kato hagogose ii u rahatsing tere Kristo te niga balana.

²⁴ Taraha, e Kristo ema tasu ii tara luman lotu ti kui u katuun bate haharuei tuun nena a luman lotu hamana. E möa. Nonei e tasuia i Kolö, ba nonei e kana i matana e Sunahan me ranga bera noura.

²⁵ A pris a tsunono pan turu Jiu e tasuna tara Makum a Göagono Koru turu mamana u hiningal bate la mena u rahatsing turu enimol. Kaba e Kristo ema tasu haparai bate roron hala nena a peisanen. E möa.

²⁶ Tega markato uaien teka, ba nonei te tatei sagoho hapare iena u kamits, i manasa te habuteia e Sunahan a mamanaka bate antunana i romana. Kaba e möa. E Kristo e butuma tara töa puku a pöata, te sukusukun kapana a man pöata hoboto, tego hala menai a peisanen tara tou mate bate luba nena a man markato a man omi. Na nonei ema antunan kato lel nanei a ka teka.

²⁷ U katuun hoboto e ka meier a man tötöa man pöata tena mate merouen, ba i murinen be Sunahan tena ona ranouen.

²⁸ Na e markato has uana iesana, e Kristo e halan a peisanen tara töa puku a pöata tega luba menaien a man markato a man omi turu katuun u para. Na nonei emi butu hahuol nou romana. Nonei ema la hahuol sile namei romana tegomi luba lel menaien a man markato a man omi. E möa. Nonei e la sile nama romana tegomi taguhu meraien u katuun te hahalose ren.