Hibru 8 - U Bulunagana U Niga

E Iesu a pris a tsunono pan i tarara

¹ A ka koru a kapan te ranga nemulam e markato uana teka: e Kristo nonei a pris a tsunono pan i tarara. Nonei e gumna tara pal matou tere Tamanen i Kolö.

² Nonei e kuieiena a toukuin Pris i tanen tara makum a göagono koru tara luman lotu te kui e Sunahan.

³ A mamana pris pan hoboto e kamer a toukui tegi hala menaien a man kaan halhala puku na u haats tere Sunahan. Na a pris a tsunono pan i tarara ega ka has mei ta ka tega hala naien.

⁴ Sanena nonei tega kaia i puta, nonei egoma antunan pris ii, taraha u pris i ka hakapa tegi halan a manka te matsköna tara Lo turu Jiu.

⁵ Kaba a toukui i taren e haharuei tuun nena a luman lotu hamana i Kolö. Taraha, pöata te katsin hatakeia e Mosis a luman lotu labalaba, be Sunahan e ranga menen, “Alö go tara kap hanigein tego kui hapopo naia lö a mamanaka tara markato tu haröte ii lia lö turu pokus i Sinai.”

⁶ Kaba a toukui te lui e Iesu e pan bala nena a toukui ti kamei u prisira i manasa, taraha nonei te ranga bera noura tere Sunahan, na nonei te hatagalena u hia hanhaniga u tsimus i tarara gono mei e Sunahan, na u hanhaniga teka e niga bala nena u hia hanhaniga na i manasa, taraha u hia hanhaniga teka e la gono menama a manka man niga na man mana.

⁷ Sanena u hia hanhaniga tutuun te nigan töa be Sunahan tema antunan kato lelenei tu hia hanhaniga tu tsimus.

⁸ Kaba e Sunahan noahas te sabe tima niga uai u katuun i tanen, ba nonei e poeiena: “A pöata e la nama romana balia te kitse gou u hanhaniga u tsimus gono mer u katuun hobotora i Israel na i Juda.

⁹ U hia hanhaniga teka ema markato uanoi turu hanhaniga ti kato gono merai lia u tuburen tara pöata tu pile ramen lia i limaren me luba ragu meien a han i Itsip. Kaba nori ima kukutie ii u raranga turu hanhaniga i tar balia a Tsunono ema haniga ra gien.”

¹⁰ Ba Tsunono e mar ranga mera neien teka, “Nonei u hia hanhaniga u tsimus te kato gono megoi lia u katunura i Israel. Alia e hakei goua a lo i tar turu hakhakats i taren na i tori ren, ba nori te hakats kap nitöa narouen bate kukutie ren. Ba lia te tsunono ragouen ba nori te hun katuun uariou i tar.

¹¹ U katuun u tetenei na u katuun u kapan has ema antunan hatuts lel raroui u toularen bate poeier, ‘Atei sileiam a Tsunono,’ taraha, nori hoboto ena atei sile riou lia, u katuun u tetenei na u katuun u kapan has.

¹² Ba lia te taatagi ragouen bate luba nagou a man markato a man omi i taren. Ba lia tema antunan hakats sil lel na goi a man markato a man omi ti katoeien.”

¹³ Pöata te ranga naia e Sunahan u hia hanhaniga u tsimus tega katoeien romana, ba nonei e ranga nena u hia hanhaniga te kato mameien e toutounei hakapa. Na ka te toutouneina ema ka lel menei ta nitagala, na ema pina noi ba nonei te taia nou.