Hibru 7 - U Bulunagana U Niga

E Melkisedek a pris

¹ E Melkisedek a kingina i Salem, na nonei a pris has tere Sunahan iasa koru. Tara pöata te kopis ma e Abraham tara hiatatung te atung hamate merameien u king, be Melkisedek e hitupali gono menen be kalale nen.

² Be Abraham e lu kakatena a manka hoboto te lue men tara hiatatung tara maloto a makum me hala nena a töa makum tere Melkisedek. A solo, e Melkisedek e poeiena, A king tara markato a niga na matskö. Na e pei hasena, A king tara masalohana, taraha a solo e Salem e poeiena, masalohana.

³ E möa tu töa tu buku tega ranga hatein e Melkisedek e ka mei ta tamanen na ta tsinanen na ta tubunen, tsi tega ranga hatein nonei i posei, na tega ranga hatei hasiin nonei e mate. Nonei e here nei a Pien tson tere Sunahan. Nonei a pris na tara mamana pöata.

⁴ Ba limiou te tatei tara marei talemiou nonei a tson a kapan koru, taraha e tuburara noahas e Abraham te haleien a hamalotona makum tara manka hoboto te lue men tara hiatatung.

⁵ Alimiou e atei silemiou e Livai e hatubunaia tere Abraham. Na u pris te hatubuna ria tere Livai te kukutier u raranga tara Lo tere Mosis te poeiena nori egi roron lu a hamalotona makum tara manka turu katunura i Israel. U pris e roron lue ria a manka teka turu toularen, noahasina te hatubuna has uaren tere Abraham.

⁶ E Melkisedek ema pala uai tere Livai. Kaba nonei e lu noa hasi a hamalotona makum tere Abraham, nonei a katuun te lui u raranga hamana tere Sunahan, na e Melkisedek e kalala hasi e Abraham.

⁷ Ara e atei silera a katuun te panina te kalalena a katuun te teteneina.

⁸ Na hamalotona makum e roron hala menari turu pris te pala uar tere Livai, tena materiou. E Melkisedek e lu hasi a hamalotona a makum kaba nonei e töatöa nitöana, te ranga has uana u Buku u Göagono.

⁹ Ara e atei silera a pala te hatubuna ria tere Livai e lueier a hamalotona makum. Kaba pöata te hala naia e Abraham a hamalotona makum tere Melkisedek, e here hasei e Livai e hala sila nai a hamalotona makum tere Melkisedek tere Abraham.

¹⁰ E manana, e Livai e hatubunaia tere Abraham, na nonei ima posa noe ii tara pöata tere Melkisedek. Kaba ara e tatei poeiera e Livai e ka hakapaia i tuenreina e tubunen e Abraham tara pöata te hitupali gono meia e Melkisedek e Abraham.

¹¹ E Sunahan e halarai a tei Israel a Lo, na nonei e hopö kapir u pris ti pala uu tere Livai tegi tara kap menaien a Lo. Sanena a toukui turu pris ti pala uu tere Livai egi kato hanigan töari u katuun, e Sunahan sane ma tatei hopö kap nai a markato a tsimus turu pris te kukutiena a markato tere Melkisedek a pris, batema markato uanei tara markato tere Eron a pris te pala u tere Livai. Kaba e Sunahan e hopö kap hamanein a markato a tsimus turu pris.

¹² Na te palisna a markato turu pris, ba lo turu pris te tatei palis hasina.

^13-14 U raranga teka e hatei nena a Tsunono i tarara. Ara e atei silera nonei e pala uu tere Juda na ema pala ua ii tere Livai. Na e möa ta töa ta katuun tere Juda tega kui ia tara makumun haats. Pöata te ranga naia e Mosis a toukui turu pris, nonei ema katoe ii tu töa tu raranga tara pala tere Juda. E möa.

A taina pris te markato has uana tere Melkisedek

¹⁵ Na tana pris e butu hakapa tala te markato uana tere Melkisedek. Nonei e Kristo.

¹⁶ Ara e atei silera nonei ima katoe ii a pris iahana a Lo te poeiena nonei ega hatubunaia tere Livai. E möa. E Sunahan te katoeien a pris tara nitagala tara nitöatöa i tanen tema antunan kapa nei.

¹⁷ Taraha, u Buku u Göagono e poeiena: “Alö e pris nitöa mou tara mamana pöata te markato uu e Melkisedek.”

¹⁸ Na e Sunahan e hakapa mei a lo na i manasa, taraha nonei a lo teka ema tagala ii, e ka pinopino tuun.

¹⁹ A Lo tere Mosis ema kato hanige ii ta töa ta ka na ta katuun. Kaba a maroro a niga bala koru e butu hakapa, na ra e tatei la uara tere Sunahan te sila uara ra tara maroro teka.

²⁰ E Iesu e butun pris gono mei u raranga tere Sunahan te mana uana iasa.

²¹ A pal tson i lui a toukui tara pris i manasa be möana ta katuun tega hamana uu iasa. Kaba e Sunahan e katoe ii e Iesu a pris me ranga hamana has uana iasa me poeiena i tanen, “Alia a Tsunono u kato hakapi u ranga te mana uana iasa. Alia ema tatei palisegi u hakats i tar. ‘Alö e pris nitöa mou tara mamana pöata.’”

²² U ranga teka te manana iasa, e haröto nena e Iesu e hatagalena u raranga tere Sunahan te kits gono meraien u katuun na e niga bala nena u rangana tara Lo na i manasa.

²³ U pris ra i manasa i parpara koru, taraha, pöata te mateia a töa turu pris ba tai te palise nen bate la lasina.

²⁴ Kaba e Iesu e ka nitöa nou, na toukuin pris i tanen e möa ta kapakapa nen.

²⁵ Na e Iesu e antunan lu pouts rena u katuun hoboto tara mamana pöata te la sila rima i tanen bate la uaier tere Sunahan, taraha nonei e ka nitöa silena tego singo sil meraien tere Sunahan.

²⁶ Na e niga koruna te ka menareira a pris a kapan koru te göagono koruna na tema ka töa koru menei ta ka ta omi i tanen na e möa ta ka tega kato homieien na e ka halhal barena u katuun u omi. Na nonei e söata sei korue ria tara han tere tamanen i Kolö.

²⁷ Nonei ema here ranei a palair u tsunono pan turu pris te roron haatsir turu mamana u lan bate haats mam sileier a man markato a man omi i taren bate töan haats sileier a man markato a man omi turu katuun. Kaba e Iesu e möa. Tara pöata te hala naien a peisanen tara tou mate, nonei e katoeien u töa puku lasi u haats te hakapi u haats hoboto.

²⁸ A Lo tere Mosis e hopö kap rena u katuun tuun tegi tsunono pan uaien turu pris, kaba nori ema tagala nitöa sileri a markato a omi. Kaba u raranga u mana koru te lama i murina a pöata tara Lo, te hopö kapiin a Pien tson tere Sunahan te matskö nitöana tara toukuin pris teka te ka nitöa nou tara mamana pöata tema antunan kapa nei.