Hibru 6 - U Bulunagana U Niga

^1-2 Aragi hatakui talei a man hihatuts pan bate hapolasera a markato te taatate tuun menari a man hihatuts tutuun tere Kristo. Ara i solon atei sil hakapi a man hihatuts tutuun teka, hena: Aragi habirits ban a markatona i tarara i manasa tema la gono menei a nitöatöa tere Sunahan, na aragi hamana uu tere Sunahan, na aragi kukute u hihatutsina te lu menari a baptais na te hatakopo menari ualima tara katuun, na ragi kukute u hihatutsina te takei pouts uaria tara tou mate na u hihatutsina te lu menari a nihahuna te ka nitöana. Kaba, ra gima tatei kaan töa mei a man raranga tutunina i manasa. E möa.

³ Tega haniga naia e Sunahan a ka teka bara te luera u hihatuts u kapan.

⁴ E möa koru tegi antunan palis lel menai u katuun u hakhakats i taren ti hapolasa ba menaien e Sunahan. Nori i ka mamia turu ualesala tere Sunahan. Na nori i atei ia i peisaren, a ka a nigana i Kolö, na nori i ka hasia turu Namnamei u Göagono.

⁵ Nori i atei sil te niga uana u raranga tere Sunahan, na nori i atei sil hasi a man nitagala tara pöata i murimuri.

⁶ Kaba nori i hapolasa ba noa hasiin e Sunahan. Na e möa koru tegi antunan palis lel menaien u hakhakats i taren, taraha e here nei nori e nila lel naria a Pien tere Sunahan tara kuruse, bate hamatsingolo lele rien i matar u katuun.

⁷ E Sunahan e kalaleiena a kui te ue iena a langits te polona i tanen, taraha a kui teka e habutena a kannou a niga te taguhena a katuun terena kui.

⁸ Kaba a kui te habutena a manka a man hihitoka na kolits a omi ema niga nei. E Sunahan e hamal nanouen ba tena hakulupu ba naria turu tula. Na e markato has uana iesana turu katuun u omi.

⁹ Alam e mar ranga uaiem teka, kaba lam e hamanem a markato i tamilimiou e niga bala nena a markato a omi teka, taraha e Sunahan e lu pouts raiou limiou.

¹⁰ E Sunahan ema solopale nei a toukui i tamilimiou na niniganiga na u ngilngil ti taguhu merai limiou u katuun i tanen te la noahasina i romana.

¹¹ Na lam e ngilem alimiou a man tötöa ego markato haniga noahas uaiam teka, antunana te butu hamana noa romana a manka te hamana silemi limiou.

¹² Alimiou goma here rami u katuun u karous. Alimiou go kukute raiam u katuun, tara nihamana i taren na te hahaloso haniga uaren, nori ena lueriou a mamanaka te ranga hamanein a Tsunono.

U raranga u tagala te hopö kapiin e Sunahan

¹³ Pöata te hala naia e Sunahan u rangan hamana tere Abraham, nonei e ranga hamanaia i peisanen pouts, taraha e möa ta taina ta katuun tega pania i tanen.

¹⁴ Ba nonei e poeiena, “U mana koru, alia e kalale gou lö balö te hatuhane mou a pien ba lia te katoe goi lö e tubur u katuun u parpara koru.”

¹⁵ E Abraham e hahaloso haniga nitöa, ba nonei e lueiena a ka te ranga hamanein e Sunahan.

¹⁶ Tara pöata te hamana uana a katuun iasa, nonei e poeiena a solo te pan bala nena a solo i tanen. Na u rangan hamana teka e hapiou nena u raranga turu katuun te ranga sile ren.

¹⁷ E Sunahan e ranga hamanein tego taguhu meraien ra u katuun i tanen. Nonei e ngilin haröto halesala koru raira tema antunan palis menaneien a ka te ngilin katoe nen. Na nonei e kato hasi u tana u ranga te mana uana iasa ti hatagale ii u rangan hamana mam i tanen.

¹⁸ Na u huol u rangan hamana teka ema tatei palis nei, na e Sunahan ema tatei gamo has naneien. Na ka teka e hatagala koruena a torirara, ara u katuun ti la uu tere Sunahan tego hatongo kap meraien ra, bara te pile hakarapoto nera a markato te hamana sil mena rei ra a nihitaguhu tere Sunahan.

¹⁹ A ka te hamana sile rara e hatagala sile nei a torirara tegi ka gono nitöa menai ra e Sunahan. Na ka te hamana sile rara e ka hamatsköna te kana e Sunahan. E here nei a pöata te la hapalis uana a tsunono pan turu pris i hapalana u labalaba pan te kutena bate tasuna tara makum te göagono koruna.

²⁰ Na e Iesu e tasu hakapa has ba raiou ra iahana Luman Lotu Pan i Kolö. Nonei e mam raiou ra tara makum te ka hamatsköna e Sunahan. Na nonei a tsunono pan turu pris te markato has uu e Melkisedek a pris. E Sunahan e katoe ii e Iesu a Pris a kapan saluhe te markato has uu e Melkisedek a pris.