Hibru 5 - U Bulunagana U Niga

¹ U Jiu e markato uaier teka: nori e hopö kap ner a tsunono pan turu pris i taren bate hale rien a toukui tego kui be menaien e Sunahan bate taguhu ranen. A tsunono pan turu pris e hala mena nei a man kaan halhala puku na mamana mar kaan haats tere Sunahan tego luba menaien a man markato a man omi turu katuun.

² Nonei a pris teka ema tagala kap nanei a man markato a man omi, taraha nonei a katuun tuun, ba nonei te tuatami na turu katuun ti moa ta niatei na tema kukutieri a maroro tere Sunahan.

³ Nonei ega haats sil a man markato a man omi turu katuun na man markato a man omi has i tanen, taraha nonei ema tagala has nei.

⁴ A katuun ema lu menei a nitsunono teka u ngil peisa i tanen. E möa. E Sunahan peisa te ngö sile nei a katuun a toukui teka, temar ngö has menaien e Eron a pris i manasa.

⁵ Na e kato has uana iesana tere Kristo. Nonei ema hala sei ii a peisanen tega tsunono pan uaien. E möa. E Sunahan noahas te katoe ii e Kristo a tsunono pan turu pris. Nonei e Sunahan te ranga mei e Kristo me poeiena, “Alö a Pien Tson i tar. I romana alö e hatamana mia i tar.”

⁶ Na nonei e pei hasi tara tana makum turu Buku u Göagono, “Alö e pris nitöa mou tara mamana pöata te markato has uu e Melkisedek a pris.”

⁷ Tara pöata te kaia e Iesu i puta, nonei e singo hatagala koru u tere Sunahan bate ngala hapan koru mena te singo sil menaneien ta hitaguhu, taraha e Sunahan e antunan hatongo kap nanen tara tou mate. Na e Sunahan e hengo haseien, taraha nonei e hengo koru hasi e Sunahan.

⁸ E manana, nonei a Pien tere Sunahan, kaba nonei e sagoho noahasi u kamits, na ka teka e hatutseien a markato te hengo haniga menaien e Sunahan.

⁹ Be Sunahan e katoe neien a pris te niga saluhe koru. Ba nonei te taguhu rena u katuun hoboto ti hengoeien bate hala raneien a nitöatöa te ka nitöana.

¹⁰ E Sunahan e katoe ii e Iesu a Pris a kapan saluhe te markato has uu e Melkisedek a pris.

Ara gima hapolasa bana ii e Sunahan

¹¹ U raranga u parpara tara ka teka e kanoana, kaba alam e lagi hahatarare namen i tamilimiou, taraha alimiou e lagi atei koru miou.

¹² Alam u solon hatuts raiou limiou antunana alimiou go hihatuts hamanasa iam. Kaba e möa. Alimiou e ngil noa hasemiou a tana katuun tega hatuts lel railimiou a man markato turu raranga tere Sunahan ti hatuts tutuun railimiou. Alimiou e here pouts lel rami u göama te sus noar, tema antunan noueri a kannou a kihil.

¹³ U katuun temar kato uar teka ema tatei tara hanigeri a ka te nigana na ka te omina.

¹⁴ Kaba u hihatuts pan e ka uana turu katuun ti solon atei sil a markato a matskö, bate tatei hamoueier a ka te nigana na ka te omina.