Hibru 4 - U Bulunagana U Niga

¹ U raranga te hopö kapiin e Sunahan te la uama i tarara e poeiena, ara ena tatei husaria i tanen. Kaba ragi hanei sil ta töa i tarara ena mots na la uanei nonei tara makumun hahusa teka.

² U Bulungana u Niga e la uama i tarara, temar la has uamen turu katuun teka i manasa. Nori i hengoe u bulungana, kaba u raranga teka ema taguhu raien, taraha nori i hengo papala tuneien bate hahamanar.

³ Kaba ra te kamera u nihamana tere Sunahan na ra e tatei la uara tara makumun husa i tanen. Nonei e pei, “Alia u raharaha koru me ranga hamana gia iasa me poeiegu, ‘Alimiou u katuun te hahamana miou ema antunan la koru uamoi tara hanin husa i tar!’” E Sunahan e mar ranga uu teka, noahasina te kapa uu a toukui i tanen tara pöata te kui hakape ien a han i puta, nonei e solon husa noa.

⁴ A töa makum turu Buku u Göagono e hatei nena u hatohitina u lan bate poeiena, “E Sunahan e kato hakapi a man toukui hoboto i tanen ba turu hatohitina u lan banonei e husana.”

⁵ Kaba nonei a makumun raranga teka e ranga lel pon nena, “Nori ema antunan la koru uari tara hanin husa i tar.”

⁶ U katuun ti hengo mami u Bulungana u Niga ima la ii tara hanin husa tere Sunahan, taraha nori i hahamana. Kaba e Sunahan e haniga nena tegi la uu a palair u katuun tara hanin husa i tanen.

⁷ Kaba i murina a pöata tara hun katuun teka, turu lahisa u hiningal te la hakapa, be Sunahan e habulungana sila nenama u raranga teka i runguna e Devit timar ranga mam uu, “I romana, te hengoe moa limiou u raranga i tar, alia e Sunahan, ba limiou tema tatei hipus mi.”

⁸ Sanena e Josua te hala raien ta makumun husa, e Sunahan sanena ema ranga hamurimuri lel nai tu taina tu lanin husa len.

⁹ Na ra e ateira u katuun tere Sunahan e kanoa has meriou a makumun husa, bate here nei a pöatan husa tere Sunahan turu hatohitina u lan.

¹⁰ A katuun te husa gono mena e Sunahan e husa mena e kato hakapi a toukui i tanen, te markato has uu e Sunahan e husa mei a pöata te kato hakapeien a toukui i tanen.

¹¹ Te markato uanen teka bara te torohana hatagala silera tegi la uu ra tara makumun husa tere Sunahan. Ta töa i tarara ena mots kukutena ti markato uen i manasa batena rusuna bate taiana.

¹² U raranga tere Sunahan a nitöatöa, na e kana na e kui hatagala nitöana. E here nei u kilata u nou koru, kaba e nou bala nena u kilata te nou hihapalana. Na u raranga i tanen e antunan hamoueiena u namnamei tara katuun. Nonei e tasuna i torina a katuun iogana nitöa, bate oneiena u hakhakats na u ngilngil i tanen.

¹³ E möa ta töa ta ka tegi antunan hamous banai e Sunahan, taraha nonei e tarena a mamanaka na mamanaka hoboto e kana ielesala. E Sunahan puku noahas te antunan oneiena a mamana markato i tarara.

E Iesu a pris a tsunono pan

¹⁴ Aragi pile hakarapotein a ka te hamane rara. Taraha, ara e ka mera a pris a tsunono pan te la nitöa uu tara makum te kana e Sunahan. Nonei e Iesu, a Pien Tson tere Sunahan.

¹⁵ Kaba ra egima tatei hakats ii bate poeiera a pris a tsunono pan i tarara ema antunan taatagi ranei ra tara pöata tema tagala ria ra. E möa. Kaba man torohana te ron butuna i tarara, e butu hasia i tanen tego torohana menaien. Kaba nonei ema kato homi ii.

¹⁶ Na aragi ongolo tala bate la hasukusuku uara tara makum a göagono tere Sunahan tara pöata te singo ria ra, taraha nonei e taatagi ranoura ra. Na saha pöata tema tagala reia ra, nonei e taatagi ranou ra bate taguhu ranou ra.